1 Aubus paˈin pamissala si Isa buwattēˈ, alaˈan iya min lahat Jalil tudju ni lahat Yahudiya, ni jadjahan ma liyu sapaˈ Jordan. 2 Aheka toˈongan saga aˈa bay ameyaˈ ma iya, ati kauliˈan eˈna saga saki sigām mainaˈan. 3 Sakali aniyaˈ pinaˈan saga Parisi anulayan iya boˈ supaya iya tajallat ma bissalana. Yuk sigām ma iya, "Bang ma saraˈtam, makajari bahāˈ bang lˈlla animanan hˈndana, minsan ai sababanna?" 4 Anambung si Isa, yukna, "Kilāku halam bay tabassabi ya tasulat ma Kitab, ya yuk-i, 'Ma tagnaˈ pamapanjari Tuhan ma manusiyaˈ, bay sigām pinapanjari eˈna lˈlla maka dˈnda?' 5 Yuk Tuhan eˈ, 'Angkanna lˈlla angˈbba min inaˈ-mmaˈna boˈ parakayuˈ ni hˈndana. Manjari in bay duwa baran, dabaran na.' 6 Nggaˈi ka na sigā duwa baran," yuk si Isa, "sagōˈ dabaran na sigā karuwangan. Angkan subay mbal pinapagbutas eˈ manusiyaˈ ya bay pinapagdakayuˈ eˈ Tuhan." 7 Atilaw saga Parisi ma si Isa, yuk-i, "Na angay bahāˈ? Bang ma panduˈ si Musa, makajari lˈlla animanan hˈndana bang paˈin aniyaˈ sulatna pagpasahan." 8 Ya sambung si Isa, "Ya angkan kam pinarūl eˈ si Musa animanan hˈndabi, sabab agagga kam pinanduˈan. Saguwāˈ nggaˈi ka buwattēˈ bay ma waktu tagnaˈ. 9 Hakaˈanta kam, sai-sai animanan hˈndana ma halam bay angaliyu-lakad min iya, ati maghˈnda iya saddī, taga-dusa iya angaliyu-lakad min hˈndana poˈon." 10 Yuk saga mulid si Isa ma iya, "Bang buwattēˈ kahālanna ma aˈa maglakibini, ahāp lagiˈ subay mbal magpūn." 11 Anambung si Isa, yukna, "Panduˈ ilu mbal kabogbogan eˈ manusiyaˈ kamemon, luwal sigām ya kabuwanan kosog eˈ Tuhan. 12 Magginis isab pagsababan ya angkan lˈlla mbal maghˈnda. Aniyaˈ aˈa mbal makapaghˈnda sabab aniyaˈ sallaˈ ma baranna. Aniyaˈ mbal makapaghˈnda sabab kinabili eˈ aˈa, maka aniyaˈ isab magniyat subay mbal maghˈnda ma sabab pagparinta Tuhan ya pagmatayanna. Sai-sai makataimaˈ panduˈ itu, subay anaimaˈ toˈongan." 13 Na, aniyaˈ saga aˈa bay amowa saga anak sigām ni si Isa boˈ supaya pinatˈnnaˈan tanganna maka niamuˈan kahāpan min Tuhan. Sagōˈ bay pinabukagan saga aˈa amowa inān eˈ kamuliran si Isa. 14 Ahˈlling si Isa, yukna, "Parūlunbi piˈitu ni aku saga kamanahutan itu. Daˈa lāngunbi. Sabab sai-sai makasaliˈ kaul-piˈilna ni buwat kamanahutan ilu, taga-palsukuˈan du ma pagparintahan Tuhan." 15 Jari pinatˈnnaˈ eˈ si Isa tanganna ni saga ondeˈ inān, boˈ yampa alaˈan minnēˈ. 16 Manjari itu aniyaˈ dakayuˈ aˈa pehēˈ ni si Isa. Yukna, "Tuwan Guru, kahāpan ai subay hinangku boˈ supaya aku kaniyaˈan kallum taptap ni kasaumulan?" 17 Yuk si Isa, "Angay aku tilawnu pasal kahāpan? Tunggal du Tuhan ahāp. Bang ka bilahi pinasukuˈan kallum taptap, subay bogbogannu panohoˈan Tuhan." 18 Atilaw giˈ lˈlla, yukna, "Panohoˈan ingga?" Ya sambung si Isa, "Daˈa ka amapatay aˈa. Daˈa ka angaliyu-lakad ni nggaˈi ka pagholaˈnu. Daˈa ka anangkaw. Daˈa ka anaksiˈ puting. 19 Pagaddatin inaˈ-mmaˈnu. Maka kalasahin pagkahinu manusiyaˈ buwat eˈnu alasahan barannu." 20 Yuk lˈlla inān, "Ā, bay na kabogboganku inaˈan-i kamemon. Ai giˈ subay hinangku?" 21 Yuk si Isa ma iya, "Bang ka bilahi tubus kahāp addat-tabiˈatnu, pehēˈ ka, pabˈllihin altaˈnu kamemon boˈ pamuwanun bˈllihanna ma saga aˈa miskin. Manjari aniyaˈ du karayanu ma deyom sulgaˈ. Puwas eˈ piˈitu ka ameyaˈ ma aku." 22 Pagkale aˈa inān ma bissala si Isa, magtūy iya alaˈan, maka eˈna asusa sabab landuˈ aheka altaˈna. 23 Sakali ahˈlling si Isa ni saga mulidna, yukna, "Hakaˈanta kam toˈongan, in aˈa dayahan kahunitan pasōd ni deyom pagparintahan Tuhan. 24 Ahoˈ, hakaˈanta kam, kaluhayan giˈ untaˈ palabay min buliˈ jalum min aˈa dayahan pasōd ni deyom pagparintahan Tuhan." 25 Ainu-inu toˈongan saga mulid pagkale sigām ma bissala si Isa itu. "Bang buwattēˈ," yuk sigām, "sai bahāˈ makasampay ni kasalamatan ma deyom sulgaˈ?" 26 Pinandang eˈ si Isa saga mulidna heˈ maka eˈna anambung. Yukna, "Bang manusiyaˈ mbal toˈongan makarapat. Sagōˈ halam aniyaˈ ahunit ma Tuhan." 27 Anambung lagiˈ si Petros, "Ndaˈun ba kami itu," yukna. "Bay bbahan kami ai-ai kami kamemon boˈ ameyaˈ ma kaˈa. Ai bahāˈ panungbas kami?" 28 Yuk si Isa, "Hakaˈanta kam toˈongan: in aku Anak Manusiyaˈ, bang taˈabut na waktu kapaningkōˈku ma deyom kasahayaˈan, magagi du aku ma dunya bahaˈu. Ya du kaˈam saga bebeyaˈanku, pinatingkōˈ du isab ma tingkōˈan sangpūˈ maka duwa hekana, ati nihukum eˈbi saga bangsa panubuˈ si Israˈil kasangpūˈ maka duwa. 29 Sasuku bay angˈbbahan lumaˈna atawa danakanna, atawa inaˈ-mmaˈna, atawa panganakna, atawa tanaˈna, ma sabab katuyuˈna ma aku, tinungbasan du iya paheka eˈ Tuhan, lipat manglipat min bay bbahanna. Maka kaniyaˈan du iya kallum taptap ni kasaumulan. 30 Sagōˈ aheka aˈa makarahū buwattinaˈan, pinaramuli ma waktu sinōng. Aheka isab taramuli ma buwattinaˈan, pinarahū ma waktu sinōng."
