1 Ma waktu heˈ-i du, pinaˈan ni si Isa saga mulidna atilaw iya, yuk sigām, "Sai alanga katapusan ma deyom pagparintahan Tuhan?" 2 Sakali nilinganan eˈ si Isa dakayuˈ ondeˈ-ondeˈ, sinōˈ anˈngge ma dahuwan sigām. 3 Yuk si Isa, "Hakaˈanta kam toˈongan, sai-sai mbal apinda palantarana ni buwat palantara ondeˈ-ondeˈ itu, mbal toˈongan pinasōd ni deyom pagparintahan Tuhan. 4 Sai-sai amareyoˈ atayna, pinasaliˈ ni buwat atay ondeˈ-ondeˈ itu, ya na katapusan alanga ma deyom pagparintahan Tuhan. 5 Sai-sai isab anaimaˈ dakayuˈ ondeˈ-ondeˈ buwattitu ma sabab ōnku ya pamanyabutanna, saliˈ aku baranku ya tinaimaˈ eˈna." 6 Yuk si Isa lagiˈ, "Bang aniyaˈ aˈa makaparusa ma dakayuˈ ondeˈ-ondeˈ buwattitu ya taga-pangandol ma aku, ahāp lagiˈ kadal aˈa inān bang paˈin iya pinagantungan batu abuhat ma kˈllongna boˈ nihūg ni timbang. 7 "Makaˈaseˈ-aseˈ toˈongan saga manusiyaˈ itu, sabab aniyaˈ na paˈin sasat makaparusa ma sigām. Tantu paniyaˈ saga sasat-manasat, sagōˈ makaˈaseˈ-aseˈ sidda ya pamakadal ma sasuku anasat seheˈna amowa magdusa. 8 Bang tanganbi atawa tapeˈbi gantaˈ amowa kaˈam magdusa, subay paggatunbi. Gom na paˈin pukulinbi boˈ tinimanan. Ahāp lagiˈ kam allum ma deyom sulgaˈ ma apukul dambilaˈ tanganbi atawa tapeˈbi, bang paˈin kam daˈa nilarukan ni deyom api nalkaˈ ya mbal kapˈddahan ma ajukup tapeˈ-tanganbi. 9 Damikiyanna isab bang matabi gantaˈ amowa kaˈam magdusa, gom lagiˈ lugitunbi boˈ tinimanan. Ahāp lagiˈ kam allum ma deyom sulgaˈ ma abuta dambilaˈ matabi, bang paˈin kam daˈa nilarukan ni deyom api nalkaˈ ma ajukup matabi karuwambilaˈ." 10 "Kamayaˈ-mayaˈ kam. Daˈa palehomunbi saga kamanahutan itu. Sabab hakaˈanta kam, inaˈan anungguˈan sigām saga malaˈikat ya paharap na paˈin ni Mmaˈku Tuhan ma deyom sulgaˈ. 11 (In aku, Anak Manusiyaˈ, bay piˈitu ni dunya angalappas saga aˈa ya alawak min Tuhan.) 12 "Bistahunbi: bang saupama aniyaˈ aˈa taga-bili-bili dahatus hekana, boˈ waˈi pasihaˈ dakayuˈ, ai bahāˈ hinangna? Tantu pasagaranna siyampūˈ maka siyam mahēˈ ma kabīd-bīran boˈ iya pasaˈut pehēˈ amiha dakayuˈ bay pasihaˈ heˈ. 13 Jari bang tabākna na, hakaˈanta kam, kinōgan iya toˈongan. Palabi lagiˈ kakōganna ma bili-bili dakayuˈ inān min siyampūˈ maka siyam ya halam bay alungay. 14 Buwattēˈ du isab Mmaˈbi ma deyom sulgaˈ, mbal iya bilahi aniyaˈ alungay dakayuˈ ondeˈ-ondeˈ min okomanna." 15 "Na, bang aniyaˈ pagkahinu gantaˈ makarusa ma kaˈa, pehēˈ ka ni iya ati hakaˈin iya pasal kasāˈanna. Sagōˈ subay hal kaˈam duwangan magbissala. Bang ka kinale eˈna, boˈ kabayaˈanna maghāp maka kaˈa, pahogot gom paˈin kapagbagaybi. 16 Sagōˈ bang hati mbal akuhanna dusana, bowahun dakayuˈ atawa duwa aˈa saddī anaksiˈan ai-ai pagbissalahanbi, boˈ supaya tabeyaˈ panohoˈan bay ma Kitab, ya yuk-i, 'Bang aniyaˈ palkalaˈbi subay aniyaˈ duwangan atawa tˈllungan amuwan saksiˈ boˈ supaya pinagsabˈnnal.' 17 Sagōˈ bang aˈa inān agagga angasip ma saga aˈa saddī ya bowanu inān, na, hakaˈin saga seheˈbi dajamaˈahan kamemon. Jari bang iya mbal bilahi akale ma kagaraˈan saga jamaˈa kamemon, aˈa inān subay niniyat eˈbi saliˈ aˈa halam aniyaˈ tuhanna, atawa aˈa magaˈāˈ sukay parinta." 18 "Hakaˈanta kam toˈongan, ai-ai lāngbi ma deyom dunya itu nilāng du isab ma deyom sulgaˈ, maka ai-ai parūlbi ma deyom dunya itu pinarūl du isab ma deyom sulgaˈ. 19 Aniyaˈ isab pangahakaku ma kaˈam, bang duwangan kam ma dunya itu maguyun angamuˈ-ngamuˈ ai-ai, tantu kam nirūlan eˈ Mmaˈku ma deyom sulgaˈ. 20 Sababna bang aniyaˈ duwangan atawa tˈllungan aˈa magtimuk pagka ōnku ya pamanyabutan sigām, inaˈan du aku ma deyoman sigām." 21 Puwas inaˈan pehēˈ si Petros ni si Isa atilaw. "Tuwan Panghūˈ," yukna, "min pila subay ampunku pagkahiku bang iya makarusa ma aku? Min pituˈ bahāˈ?" 22 Yuk si Isa, "Nggaˈi ka hal min pituˈ, sagōˈ min pitumpūˈ maka pituˈ." 23 Jari magparalilan si Isa, yukna, "In kapagparinta Tuhan saliˈ dalil dakayuˈ sultan ya bilahi amista palutangan saga tendogna. 24 Sakali itu, hinabuna magbista utang, aniyaˈ binowa ni iya dakayuˈ tendogna taga-utang laksaˈan pilak. 25 Jari in sīn ma tendog inān mbal makabayaran utangna, angkan magpanohoˈan sultan in aˈa inān sampay anak-hˈndana subay pinabˈllihan nihinang ata. Subay pinabˈllihan isab ai-aina kamemon pamayad utangna. 26 Na, angōk-tuˈut magtūy tendog itu ma alopan sultan angamuˈ junjung ni iya. 'O tuwan,' yukna, 'patangguhun giˈ aku. Bayaranku du utangku kamemon.' 27 Manjari maˈaseˈ sultan inān ma tendogna. Pinahalam na utangna ati pinapoleˈ iya. 28 "Na, pagluwas tendog inān min alopan sultan, aniyaˈ talanggalna pagkahina, tendog sultan isab. In tendog damuli itu taga-utang dangkuriˈ ma tendog tagnaˈ. Magtūy iya niragtuˈ maka pinˈkkol eˈ tendog tagnaˈ. Yukna, 'Bayarin na utangnu ma aku.' 29 Magtūy angōk-tuˈut tendog damuli itu anganjunjung, yukna, 'Patangguhun giˈ aku. Bayaranta du ka.' 30 Sagōˈ mbal pinatanggu, gom paˈin niˈisi ni deyom kalabusu satˈggol mbal makapuwasan utangna kamemon. 31 Pagˈndaˈ paˈin eˈ saga tendog kaseheˈan ma kahinangan tendog tagnaˈ inān, magtūy sigām landuˈ asukkal, ati pehēˈ ni sultan angahaka pasal pakaradjaˈan inān. 32 "Jari pinalinganan eˈ sultan tendog bay aheka utangna heˈ. 'Jahulakaˈ pahāp ka ilu!' yukna. 'bay pahalamku utangnu kamemon ma sabab panganjunjungnu ma aku. 33 Arapun kaˈaseˈannu pagkahinu heˈ, buwat bay kaˈaseˈku ma kaˈa!' 34 Jari sidda angastol sultan inān ma iya, angkan sohoˈna tendog eˈ niˈisi ni deyom kalabusu sampay tiniksaˈ satˈggol halam giˈ kabayaranna utangna." 35 Yuk si Isa, "Buwattēˈ du isab nihinang eˈ Mmaˈku ma sulgaˈ ma kaˈam dangan maka dangan, bang mbal ampunbi pagkahibi min deyom ataybi."
