MATIYU 14

1Ma waktu he'-i sultan Herod ya bay magbaya' ma lahat Jalil. Manjari itu makakale iya pasal kahinangan si Isa 2ati ah'lling iya ni saga a'ana pangandolan, yukna, "Si Yahiya Magpapandi ko' inān, pinakallum na pabīng min kamatayna. Angkan tahinangna saga hinang makainu-inu inān." 3- 4Angkan buwattē' pah'lling si Herod, sabab iya ya bay magpanoho'an amapatay si Yahiya. Buwattitu bay kahālanna, sultan Herod itu bay magkabaya' maka ipalna si Herodiyas, bo' allum lagi' siyalina si Pilip, ya h'lla si Herodiyas e'. Pinabukagan na pa'in si Herod e' si Yahiya, yukna, "Mbal manjari bang ka magtimbul maka h'nda danakannu! Dusahan ka!" Angkanna si Yahiya bay sinō' sinaggaw e' sultan, sinō' niekang-ekangan bo' yampa ni'isi ni deyom kalabusu. 5Bilahi si Herod amapatay si Yahiya sagō' tināw iya ma kaheka'an a'a, sabab magkahagad sigām in si Yahiya nabi. 6Jari magpajamu sultan Herod panabuna ma llaw kapaganak ma iya. Angigal anak si Herodiyas budjang ma pang'nda' saga luruk ati kasulutan sidda si Herod, 7angkan janji'anna budjang inān. Yukna, "Janji'anta ka. Ai-ai amu'nu ni aku pamuwanku to'ongan." 8Na, in budjang inān bay kapitnahan asal e' ina'na angkan yukna ni sultan, "Buwanin aku kōk si Yahiya Magpapandi, pinat'nna' ma talam." 9Sidda asusa sultan inān, sagō' mbal kapindahan bay panganjanji'na ma alopan saga luruk e', angkan soho'na subay nirūlan budjang inān ma bay amu'na he'. 10Jari magpanoho'an si Herod subay pinonggolan kōk si Yahiya ma deyom kalabusu. 11Puwas e' pinat'nna' kōkna ma talam bo' yampa binowa ni budjang, ati ni'nde'an e'na ni ina'na. 12Sakali pina'an saga mulid si Yahiya angā' patayna kinubul. Puwas e' pehē' sigām ni si Isa angahaka'an iya. 13Na, pagkale si Isa ma pasal ina'an-i, ala'an iya minnē' amusay ni lahat halam maga'a, hal iya dangan-danganna. Kinata'uwan pa'in kamahē'anna, magla'anan saga a'a min ba'anan kauman sigām bo' paturul ma iya, amaklay min bihing susulan. 14Pagdeyo' pa'in si Isa min bayananna, ta'nda'na saga a'a inān landu' to'ongan aheka. Sakali t'kkahan iya ase' ma sigām, maka kauli'an e'na sasuku taga-saki. 15Pagka abay kohap na, pehē' ni si Isa saga mulidna. Yuk sigām, "Sōng sangom na, maka itiya' kitam ma lahat l'ngngaw-l'ngngawan. Sō'un lagi' saga a'a itu pehē' ni kaluma'an inān bo' makab'llihan di-sigām kinakan." 16Anambung si Isa, yukna, "Minsan sigām mbal ala'an minnitu. Ka'am na ya amakan sigām." 17Yuk saga mulid e', "Lima du tinapay ma kami maka duwa du daing!" 18"Na," yuk si Isa, "bowahunbi pi'itu." 19Jari pinatingkō' sigām e'na ma kaparangan. Puwas e' niā' e'na lima tinapay maka duwa daing bo' pahangad ni langit magsukul ni Tuhan. Pinagpōng-pōng e'na tinapay bo' yampa sōnganna ni saga mulidna, ati tinopod-toporan e' sigām saga a'a inān. 20Magkakanan na saga a'a inān kamemon sampay mag'ssohan. Pagubus sigām amangan, tinipun kapin kinakan inān e' saga mulid e' ati ap'nno' sangpū' maka duwa ambung aheya. 21Aniya' saga limangibu a'a bay amangan inān, bang hal l'lla ya ni'itung. Saddī gi' d'nda maka onde'-onde'. 22Puwas e' sinoho' e' si Isa saga mulidna paruwa' ni bayanan. Pinarahū sigām min iya tudju ni dambila' danaw, sabuna amapole' kaheka'an a'a inān. 23Tapapole' pa'in saga a'a he', patukad si Isa dangan-danganna anambahayang ma bīd-bīd. Sangom pa'in lahat, maina'an iya dangan-danganna, 24bo' saga mulidna atā na min bihing. Taluwa' sigām goyak sabab anagga' baliyu. 25Pagdai' llaw pa'in, pehē' na si Isa tudju ni sigām, lum'ngngan min kuwit tahik. 26Ta'nda' pa'in iya e' saga mulidna lum'ngngan min kuwit tahik, nileya'-leya' sigām. "Umagad ko' ilu," yuk sigām, maka e' sigām magsilawak kabowa tāw. 27Sagō' amissala magtūy si Isa ni sigām. "Paiman kam!" yukna. "Aku ko' itu. Da'a kam tināw." 28Sakali ah'lling si Petros, yukna, "Nakura', bang ka'a to'ongan ilu, sō'un aku pi'ilu ni ka'a lum'ngngan min kuwit tahik." 29"Na, pi'itu na ka," yuk si Isa. Jari pareyo' si Petros min bayanan inān anagna' lum'ngngan min kuwit tahik tudju ni si Isa. 30Sagō' pagnanamna ma baliyu inān, sinōd iya tāw ati inut-inut iya pat'nnob. Magtūy iya angalingan, yukna, "Nakura', tabangun aku!" 31Magtūy iya niabut e' si Isa bo' binalutan. Yuk si Isa, "Kulang pahāp imannu ilu! Angay aku pagduwa-duwahannu?" 32Makariyata' pa'in sigā ni bayanan e', pahali na baliyu. 33Pinudji si Isa e' saga mulid kasehe'an inān, yuk-i, "B'nnal, ka'a ilu Anak Tuhan!" 34Jari itu, makat'kka pa'in sigām ni dambila' danaw, parunggu' sigām ni lahat Gennesaret. 35Takilā si Isa e' saga a'a mahē', ya angkan sigām bay anambukuhan sasuku taga-saki ma jadjahan ina'an-i, sinō' binowa ni si Isa. 36Angamu' sigām junjung ni si Isa, bang pa'in dūlanna saga a'a sakihan ang'ntan minsan la'a hal tōng s'mmekna. Manjari sai-sai bay maka'ntanan s'mmek si Isa saru'un-du'un kauli'an sakina.

will be added

X\