1 Manjari nilinganan eˈ si Isa saga mulidna kasangpūˈ maka duwa boˈ buwananna sigām kawasa pamalaˈan saitan min deyom baran aˈa sampay pamauliˈ saki maka lamma indaginis. 2 Ya na itu ōn aˈa kasangpūˈ maka duwa bay kawakilan eˈ si Isa: kaissa, si Simun ya niōnan isab si Petros, maka danakanna si Andariyas, boˈ si Yakub maka danakanna si Yahiya, saga anak si Sibidi. 3 Pasunuˈ si Pilip maka si Bartolome maka si Tomas, boˈ si Matiyu ya bay magāˈ sukay parinta, boˈ si Yakub ya anak si Alpa. Pasunuˈ isab si Taddiyu, 4 boˈ si Simun aˈa pangangatu. Katapusan si Judas Iskariyut, ya anukbalan si Isa ni saga bantana ma waktu damuli minnēˈ. 5 In sangpūˈ maka duwa aˈa itu bay pinanduˈan eˈ si Isa boˈ yampa sinōˈ palˈngngan. Yukna, "Daˈa kam pehēˈ ni kalumaˈan aˈa nggaˈi ka bangsa Israˈil, atawa ni kalumaˈan aˈa Samariya. 6 Sagōˈ pehēˈ kam ni bangsa Israˈil sadja, ya sapantun bili-bili alungay. 7 Pehēˈ kam magnasihat in waktu kapagparinta Tuhan song na atˈkka. 8 Pauliˈunbi sasuku asaki. Pakallumunbi saga aˈa bay magpatayan, palanuˈunbi sasuku niˈipul, maka paluwasunbi saga saitan min deyom baran aˈa. Bay kam anaimaˈ kapatut min aku ma halam aniyaˈ bayadna, angkan kam subay anabang ma halam aniyaˈ tongodna. 9 Daˈa kam amowa bulawan atawa pilak minsan hal pisita ma deyom sabitanbi. 10 Daˈa kam amowa paglutuˈanan, atawa badjuˈ pasalinanbi, atawa taumpaˈ atawa tungkud. Sabab bang aˈa maghinang, wajib iya binuwanan napakana. 11 "Bang kam atˈkka ni daˈira atawa ni kalumaˈan, pihaˈunbi aˈa mainaˈan ahāp kasuddahanna, ati pahantiˈ kam ma iya sampay taˈabut waktu kalaˈanbi min lahat inaˈan-i. 12 Bang kam pasōd ni lumaˈ aˈa, saginahunbi buwattitu, 'Bang paˈin kam kaniyaˈan kasannangan!' 13 Jari bang ahāp kasuddahan sigām ma lumaˈ inān, katˈkkahan du sigām kasannangan ya bay pangamuˈbi. Sagōˈ bang mbal ahāp kasuddahan sigām, papellengunbi ni kaˈam kasannangan heˈ. 14 Bang gantaˈ aniyaˈ saga aˈa mbal anagina kaˈam, atawa mbal bilahi akale ma kaˈam, alaˈan kam min lumaˈ atawa min kauman inān. Paspasinbi dahū bagunbunna min tapeˈbi, tandaˈ saksiˈ in kaˈam apuwas min sigām. 15 Hakaˈanta kam, bang taˈabut llaw pangahukum Tuhan ma manusiyaˈ, kalabihan giˈ buhatna ma saga aˈa ma lahat inān min bay hukuman ma daˈira Sodom maka daˈira Gomora, lahat abantug ma sabab dusa aˈana ma masa awal eˈ." 16 "Pakale kam," yuk si Isa. "Ilu kam song papehēˈku ni deyoman saga aˈa alaˈat. Saliˈ kam sapantun bili-bili pinapehēˈ ni deyoman baˈanan eroˈ talun, ya magpangalˈkkob. Angkan subay atahaˈ akkalbi, maka subay ahatul kajarihanbi. 17 Pahalliˈ kam, sabab aniyaˈ aˈa anˈkkahan kam ni paghukuman maka angandaplosan kam ma deyom kalanggalan. 18 Pinaharap kam ni saga gubnul maka ni saga sultan boˈ pinapariksaˈ eˈ sigām, ati makasaksiˈ du kam ma pasalanku ni sigām sampay ni saga aˈa ya nggaˈi ka Yahudi. 19 Jari bang kam tinandanan ni saraˈ, daˈa kam magsusa bang ai pamissalabi atawa bang buwattingga eˈbi ahˈlling. Tantu kam binuwanan lapal pamissalabi bang taˈabut waktuna. 20 Sabab nggaˈi ka baranbi ya ahˈlling ma waktu heˈ-i, sagōˈ Rū Mmaˈbi Tuhan ya anabangan kaˈam amissala. 21 "Ma waktu sinosōng inān aniyaˈ du saga aˈa anukbalan danakan sigām boˈ pinapatay. Aniyaˈ du isab saga mattoˈa lˈlla anukbalan anak sigām boˈ pinapatay. Saga anak isab amantahan mattoˈa sigām, anohoˈ isab subay pinapatay. 22 Maka kaˈam saga mulidku," yuk si Isa, "kinabˈnsihan du eˈ aˈa kamemon ma sabab aku ya pameyaˈanbi. Sagōˈ sasuku ahogot imanna sampay ni kahinapusan, makasampay ni kasalamatan ma deyom sulgaˈ. 23 Bang kam gantaˈ bininasa ma kalumaˈan dakayuˈ, alahi kam ni kalumaˈan saddī. Hakaˈanta kam, ma halam giˈ talatagbi kalahatan Israˈil kamemon, in aku Anak Manusiyaˈ pabalik du piˈitu. 24 "Halam aniyaˈ mulid palanga min guruna. Halam aniyaˈ ata palanga min nakuraˈna. 25 In mulid subay magsukul bang makasaliˈ ni guruna, maka sosohoˈan subay magsukul bang makasaliˈ ni nakuraˈna. Na, bang aku nakuraˈbi pinagōnan eˈ sigām Beˈelsebul, hatina nakuraˈ saitan, lubaˈ-lagiˈna na kaˈam sosohoˈanku niōnan alaˈat du eˈ sigām." 26 "Daˈa kam tināw ma saga manusiyaˈ. Kamemon bay nilimbungan tantu du pinaluwas. Kamemon bay tinauˈ ma deyom atay tantu du pinataˈu. 27 Ai-ai pangahakaku kaˈam ma deyom kalendoman, pahˈllingunbi ma kasawahan. Maka ai-ai nihagas-hagas ma taingabi, patanyagunbi ma mairan. 28 Daˈa kam tināw ma aˈa ya makapatay baranbi, sabab mbal taˈabut palnyawahanbi. Ahāp lagiˈ bang Tuhan ya katāwanbi, sabab in iya taga-kawasa aniksaˈ baranbi sampay nyawabi ma deyom nalkaˈ. 29 Pikilunbi manuk-manuk paupit ilu, tabˈllita duwa hekana maka pisita, sagōˈ minsan areyoˈ halgaˈna halam aniyaˈ paupit minsan dakayuˈ ahūg ni tanaˈ bang nggaˈi ka min kabayaˈan Mmaˈbi Tuhan. 30 Ya lagiˈna kaˈam. Minsan lamba buˈunbi ilu, taitung eˈ Tuhan bang pila hekana. 31 Angkan kam subay mbal tināw, sabab ahalgaˈ giˈ kam min baˈanan paupit." 32 "Sai-sai angahaka ma alopan kahekaˈan aˈa in aku pameyaˈanna, angahaka du aku ma alopan Mmaˈku ma deyom sulgaˈ, in aˈa inān palsukuˈanku. 33 Sagōˈ sai-sai amalilu ma alopan kahekaˈan in aku nggaˈi ka pameyaˈanna, paliluhanku du isab aˈa inān ma alopan Mmaˈku ma deyom sulgaˈ." 34 "Araiˈ pangannalbi in maksudku piˈitu amowa kasannangan ni dunya, boˈ nggaˈi ka. Ya maksudku piˈitu nggaˈi ka kasannangan sagōˈ pagsaggaˈan. 35 Bay aku piˈitu amapagsaggaˈ manusiyaˈ dangan maka dangan. Anak lˈlla magbonoˈ maka mmaˈna, anak dˈnda maka inaˈna, ayuwan dˈnda maka matoˈana dˈnda. 36 Binantahan aˈa eˈ seheˈna magdalumaˈ. 37 "Bang aˈa alasahan mmaˈna maka inaˈna palabi min aku, mbal iya wajib tahinang mulidku. Damikiyanna isab bang aˈa alasahan anakna lˈlla-dˈnda palabi min aku, mbal iya manjari tahinang mulidku. 38 Sai-sai bilahi anunuran aku subay tanggungna hāgna pamapatayan iya. Bang hati mbal paglillaˈna, mbal iya manjari tahinang mulidku. 39 Sai-sai allogan kallum baranna, halam du aniyaˈ kallumna taptap. Sagōˈ sai-sai mbal allogan kallum baranna boˈ lillaˈ isab amatay ma sababku, makabāk iya kallum kakkal." 40 "Sai-sai anaimaˈ kaˈam, aku ya tinaimaˈ eˈ sigām, sampay Tuhan ya bay amapiˈitu aku ni dunya. 41 Sasuku anaimaˈ nabi ma sabab lapal Tuhan ya pamissalana, aˈa inān katungbasan kahāpan ya panungbas nabi. Damikiyanna, sasuku anaimaˈ aˈa adil ma sabab kaˈadilna, katungbasan iya kahāpan ya panungbas saga aˈa adil. 42 Hakaˈanta kam toˈongan, sai-sai amuwan minsan laˈa hal dasawan boheˈ dingin ma dakayuˈ aˈa areyoˈ kapagaˈana pagka mulidku iya, tantu aˈa inān tinungbasan kahāpan."
