1 Ya itu kapangkatan si Isa Al-Masi, panubuˈ si Daˈud ya panubuˈ si Ibrahim. 2 - 6 Si Ibrahim bay mmaˈ si Isaˈak, ya Isaˈak bay mmaˈ si Yakub. Si Yakub bay mmaˈ si Yuda maka saga danakanna, si Yuda bay mmaˈ si Peres maka si Sera (si Tamar ya inaˈ sigām). Si Peres bay mmaˈ si Hesdon, ya si Hesdon bay mmaˈ si Aram. Si Aram bay mmaˈ si Amminadab, ya Amminadab bay mmaˈ si Nasson. Si Nasson bay mmaˈ si Salmon, ya Salmon bay mmaˈ si Bowas (si Rahab ya inaˈna). Si Bowas bay mmaˈ si Obed, inaˈna bay si Rūt. Si Obed bay mmaˈ si Jesse, ya Jesse bay mmaˈ sultan Daˈud. Si Daˈud inān bay mmaˈ si Sulayman, inaˈna bay hˈnda si Uriya. 7 - 11 Si Sulayman bay mmaˈ si Rehobowam, ya Rehobowam bay mmaˈ si Abiya, ya Abiya bay mmaˈ si Asa. Si Asa bay mmaˈ si Josapat, ya Josapat bay mmaˈ si Joram, ya Joram bay mmaˈ si Usiya. Si Usiya bay mmaˈ si Jotam, ya Jotam bay mmaˈ si Ahas, ya Ahas bay mmaˈ si Hijikiya. Si Hijikiya bay mmaˈ si Manasse, ya si Manasse bay mmaˈ si Amon, ya Amon bay mmaˈ si Jusiya. Si Jusiya bay mmaˈ si Jekoniya maka saga danakanna. 12 - 16 Min waktu kapamowa bangsa Israˈil ni lahat Babilon sampay ni waktu kapaganak ma si Isa, buwattitu ya sugsuganna. Si Jekoniya inān bay mmaˈ si Salati, ya Salati bay mmaˈ si Sirubbabil. Si Sirubbabil bay mmaˈ si Abiyud, ya Abiyud bay mmaˈ si Eliyakim, ya Eliyakim bay mmaˈ si Asor. Si Asor bay mmaˈ si Sadok, ya Sadok bay mmaˈ si Akim, ya Akim bay mmaˈ si Eliyud. Si Eliyud bay mmaˈ si Eleyasar, ya Eleyasar bay mmaˈ si Mattan, ya Mattan bay mmaˈ si Yakub. Si Yakub bay mmaˈ si Yusup ya hˈlla si Mariyam inaˈ si Isa, ya niōnan Al-Masi. 17 Manjari aniyaˈ sangpūˈ maka mpat pangkatan min si Ibrahim sampay ni si Daˈud, sangpūˈ maka mpat pangkatan min si Daˈud sampay ni waktu bay pamalaˈan saga aˈa Israˈil ni Babilon, ati sangpūˈ maka mpat pangkatan isab minnēˈ sampay ni waktu kapaganak ma Al-Masi. 18 Buwattitu ya kalˈngnganan kapanganak ma si Isa Al-Masi. Inaˈna si Mariyam bay makapagbintak asal maka si Yusup, sagōˈ ma halam giˈ sigā takawin tananam eˈ si Mariyam in iya angiram sabab min kawasa Rū Sussi. 19 Aˈa adil asal si Yusup ya tunang si Mariyam eˈ, angkan iya agaraˈ pabaibad min iya ma halam aniyaˈ makataˈu. Mbal iya bilahi amuwanan si Mariyam kaiyaˈan ma mata mairan. 20 Na, sabu paˈin si Yusup amikil-mikil pasal pakaradjaˈan itu, aniyaˈ malaˈikat min Tuhan pauppi ni iya. Yuk malaˈikat, "O Yusup panubuˈ si Daˈud, daˈa ka ahawal-hawal magdakayuˈ maka si Mariyam ilu, sabab min kawasa Rū Tuhan ya angkan aniyaˈ kabˈttonganna. 21 Anganak du iya lˈlla, ati Isa ya pangōnnu ma iya sabab iya ya angalappas bangsana Israˈil min paldusahan sigām." 22 Na, pinatˈkka saga pakaradjaˈan itu kamemon boˈ aniyaˈ katumanan ma bay pangallam Tuhan ma dakayuˈ nabi, ya yuk-i, 23 "Aniyaˈ inān budjang angiram, ati anganak iya lˈlla, Emmanuwel ya pangōn sigām ma iya." Hatina 'Tuhan patˈnnaˈ ma kitam.' 24 Pagbatiˈ paˈin si Yusup min uppina, bineyaˈ eˈna panohoˈan malaˈikat ati pahˈndana si Mariyam. 25 Sagōˈ subay na apuwas bay kapanganak si Mariyam boˈ yampa sigā magpūn. Jari anganak si Mariyam lˈlla ati Isa ya pangōn si Yusup ma iya.
