1 Amissala giˈ si Isa, yukna, "Bˈnnal ya pahˈllingku itu ma kaˈam, aniyaˈ maitu ma kaˈam mbal amatay satˈggol halam taˈndaˈna pagparinta Tuhan pinatˈnnaˈ beyaˈ maka kawasa aheya." 2 Na, palabay paˈin nnom llaw min waktu heˈ-i, si Petros maka si Yakub maka si Yahiya waˈi binowa eˈ si Isa patukad ni būd alanga, hal sigām sadja. Mainaˈan paˈin, apinda pangluwahan si Isa ma pangˈndaˈ sigām. 3 Apoteˈ toˈongan sˈmmekna, makasilaw sidda. Halam aniyaˈ magdarakdak ma deyom dunya itu makapapoteˈ sˈmmek buwat kapoteˈ sˈmmekna inān. 4 Panyataˈ isab pinaˈan nabi Elija maka nabi Musa, taˈndaˈ eˈ saga mulid eˈ magsuli-suli maka si Isa. 5 Ahˈlling si Petros ni si Isa, yukna, "Tuwan Guru, ahāp toˈongan isab itiyaˈ kami maitu. Angahinang kami tˈllu panggung-panggung pasindunganbi maitu, dakayuˈ ma kaˈa, dakayuˈ ma si Musa, maka dakayuˈ ma si Elija." 6 Buwattēˈ tapamūngna sabab mbal kataˈuwanna bang ai subay pahˈllingna. Aheya sidda tāw saga mulid eˈ. 7 Sakali aniyaˈ gabun bay angalandungan sigām, maka aniyaˈ suwala ahˈlling minnēˈ. Yuk suwala heˈ, "Anakku koˈ itu, ya kalasahanku. Iya ya kalehunbi." 8 Pagˈndaˈ sigām paruruwambilaˈ ma sigām, halam aniyaˈ aˈa taˈndaˈ sigām, luwal si Isa. 9 Manjari itu, paglūd paˈin sigām min būd eˈ, binandaˈan sigām eˈ si Isa, yukna, "Daˈa kam angahaka ni sai-sai pasal bay taˈndaˈbi ma diyataˈ būd. Subay na aku, Anak Manusiyaˈ, tapakallum pabīng min kamatayku boˈ yampa kam angahaka." 10 Niasip eˈ sigām kabtangan si Isa itu sagōˈ magtilaw-tilaw sigām katˈllungan bang ai hatina ya bay yukna pasal kapakallum min kamatay. 11 Sakali tinilaw iya eˈ sigām, yuk-i, "Angay magpaˈin saga guru saraˈ agama in si Elija subay palahil dahū piˈitu?" 12 Anambung si Isa ma sigām, yukna, "Bˈnnal koˈ ilu, palahil dahū si Elija min Al-Masi boˈ anakapan kamemon. Saguwāˈ tasulat asal ma deyom Kitab pasal Anak Manusiyaˈ in iya subay makalabay kabinasahan aheya maka subay nihalipulu. Angay bahāˈ? 13 Sagōˈ hakaˈanta kam pasal si Elija. Bay na iya palahil ati tahinang ma iya eˈ saga manusiyaˈ ai-ai kabayaˈan sigām, buwat bay tasulat asal ma deyom Kitab ma pasalna." 14 Na, makabalik paˈin disi Isa ni saga mulid kaseheˈan, lumanduˈan aheka aˈa taˈndaˈ eˈ sigām magtimuk. Aniyaˈ isab saga guru saraˈ agama taˈndaˈ eˈ sigām magjawab maka saga mulid si Isa kaseheˈ. 15 Pagˈndaˈ kahekaˈan aˈa itu ma si Isa, aheya kainu-inuhan sigām ati paragan sigām anampang iya. 16 Atilaw si Isa, yukna, "Ai pagjawabanbi ilu?" 17 Jari aniyaˈ anambung min deyom katimukan aˈa inān, yukna, "Tuwan Guru, bay bowaku ni kaˈa anakku lˈlla sabab sinōd iya saitan umaw. 18 Kahabaˈ waktu, bang iya kasangonan eˈ saitan itu, pinahantak iya ni tanaˈ. Anuput-nuput bowaˈna, magtageˈot emponna, maka anuwas isab baranna. Bay amuˈku pinalaˈan eˈ saga mulidnu itu sagōˈ mbal takoleˈ eˈ sigām." 19 Anambung si Isa, yukna, "Kaˈam saga aˈa ma tahun itu, halam toˈongan aniyaˈ imanbi! Subay buwattingga giˈ tˈggolku ma kaˈam anandalan kabuwattilubi? Bowahun piˈitu ondeˈ ilu," yukna. 20 Jari binowa iya ni si Isa. Taˈndaˈ paˈin si Isa eˈ saitan, magtūy sinawan eˈna ondeˈ inān ati pinahantak ni tanaˈ amaspad. Anuput-nuput isab bowaˈna. 21 Atilaw si Isa ma mmaˈ ondeˈ inān, yukna. "Sumiyan giˈ bay kabuwattituna itu?" "Sangay min karikiˈ-dikiˈna," yuk mmaˈna. 22 "Araran iya pinahantak eˈ saitan ni deyom api atawa ni deyom boheˈ boˈ pinapatay. Ndūˈ tuwan, bang takoleˈnu, maˈaseˈ ka ba. Tabangun kami!" 23 Yuk si Isa ma iya, "Angay tilawnu bang takoleˈku? Bang aˈa taga-iman," yukna, "takoleˈna kamemon." 24 Atanog magtūy pahˈlling mmaˈ ondeˈ heˈ, yukna, "Aniyaˈ imanku sagōˈ kulang lagiˈ. Tabangin aku boˈ supaya pasōng kosogna." 25 Pagˈndaˈ si Isa ma kahekaˈan aˈa inān song na pagipit ni iya, magtūy lāngna saitan eˈ. "Kaˈa saitan umaw maka bisu," yukna, "sohoˈta ka alaˈan min deyom baran ondeˈ ilu. Daˈa ka pasōd piˈilu pabīng!" 26 Jari itu, aubus paˈin eˈ saitan angolang pakosog maka eˈna amaspad ondeˈ inān, paluwas iya min baranna. Sakali angaluwa patay ondeˈ inān, angkan yuk kahekaˈan aˈa inān, "Na! Amatay na!" 27 Sagōˈ binalutan tangan ondeˈ inaˈan eˈ si Isa boˈ tabanganna papunduk. Anˈngge iya magtūy. 28 Na, makasōd paˈin si Isa ni deyom lumaˈ, tinilaw iya eˈ saga mulidna pagka sigām-sigām laˈa. Yuk-i, "Angay kami bay mbal makapaluwas saitan eˈ?" 29 Yuk si Isa, "Ya ginis saitan inaˈan mbal tapaluwas, luwal bang niamuˈan tabang min Tuhan." 30 Manjari palanjal na disi Isa minnaˈan boˈ palabay min tˈngngaˈ lahat Jalil. Ya kabayaˈan si Isa subay halam aniyaˈ makataˈu bang piˈingga palˈngngananna, 31 sabab inaˈan iya amanduˈan saga mulidna. Yukna ni sigām, "Aku, Anak Manusiyaˈ itu, araiˈ na sinōngan ni pangˈntanan saga aˈa ati pinapatay du aku eˈ sigām. Sagōˈ puwas tˈllumbahangi min kapamapatay ma aku, allum du aku pabīng." 32 Saguwāˈ halam tahati bissala si Isa inān eˈ saga mulidna, maka mbal isab sigām makatawakkal anilaw iya. 33 Manjari itu atˈkka na sigām ni daˈira Kapirnaum. Makasōd paˈin si Isa ni deyom lumaˈ, tinilaw eˈna saga mulidna, yukna, "Ai bay paglugatanbi ma labayan eˈ?" 34 Sagōˈ mbal sigām bilahi anambung sabab ya paglugatan sigām bang sai ya katapusan alanga. 35 Jari aningkōˈ si Isa boˈ lingananna saga mulidna kasangpūˈ maka duwa inaˈan pabihing ni iya. Yukna ma sigām, "Sai-sai bilahi pinalanga toˈongan subay magpatireyoˈ di-na min kamemon. Subay iya magsosohoˈan ni pagkahina kamemon." 36 Sakali niāˈ eˈ si Isa dakayuˈ ondeˈ-ondeˈ pinatˈngge eˈna ma dahuwan sigām. Ginapus paˈin eˈna ondeˈ itu, yukna ni sigām, 37 "Sai-sai anaimaˈ dakayuˈ ondeˈ-ondeˈ buwattitu ma sabab ōnku ya pamanyabutanna, saliˈ du baranku ya tinaimaˈ eˈna. Maka sai-sai isab anaimaˈ aku, nggaˈi ka hal aku ya taimaˈna. Taimaˈna isab Tuhan ya bay amapiˈitu aku ni dunya." 38 Jari itu aniyaˈ pahˈlling si Yahiya ni si Isa, yukna, "Tuwan Guru, aniyaˈ dakayuˈ aˈa taˈndaˈ kami anabbut ōnnu pamaluwasna saitan min deyom baran aˈa. Bay iya lāng kami sabab nggaˈi ka seheˈtam." 39 Saguwāˈ ahˈlling si Isa, yukna, "Daˈa iya lāngunbi sabab bang aˈa makahinang hinang kawasahan ma sabab aku ya panabbutanna, mbal magtūy tapahˈllingna laˈat ma pasalan aku. 40 Sabab sai-sai mbal anaggaˈ kitam amogbog du ma kitam. 41 Hakaˈanta kam toˈongan, sai-sai amuwanan kaˈam minsan laˈa hal dasawan boheˈ ma sabab sukuˈ kam Al-Masi, tantu aˈa inān tinungbasan kahāpan." 42 Yuk si Isa lagiˈ, "Bang aniyaˈ gantaˈ makaparusa ma dakayuˈ aˈa areyoˈ buwat hantang ondeˈ itu, aˈa taga-pangandol ma aku, ahāp lagiˈ bang aˈa makaparusa inān pinagantungan batu abuhat ma kˈllongna boˈ yampa nihūg ni timbang, bang paˈin mbal kalanduˈan hinangna buwattēˈ. 43 Bang tanganbi gantaˈ amowa kaˈam magdusa gom lagiˈ pōnganbi boˈ mbal kalanduˈan dusa heˈ. Ahāp lagiˈ kam pasōd ni deyom sulgaˈ ma apukul dambilaˈ tanganbi, bang paˈin kam daˈa nilarukan ni deyom api nalkaˈ ya mbal kapˈddahan ma ajukup tanganbi karuwambilaˈ. [ 44 Ya kabinasahan aˈa ma deyom nalkaˈ heˈ halam aniyaˈ hāranna, ya pˈddiˈna halam aniyaˈ tobtobanna.] 45 Bang tapeˈbi isab gantaˈ amowa kaˈam magdusa, gom lagiˈ pōnganbi. Ahāp lagiˈ kam pasōd ni deyom sulgaˈ ma apukul dambilaˈ tapeˈbi, bang paˈin kam daˈa nilarukan ni deyom api nalkaˈ ma ajukup tapeˈbi karuwambilaˈ. [ 46 Ya kabinasahan aˈa ma deyom nalkaˈ heˈ halam aniyaˈ hāranna, ya pˈddiˈna halam aniyaˈ tobtobanna.] 47 Bang matabi isab amowa kaˈam magdusa, gom na paˈin lugitunbi boˈ mbal kalanduˈan dusa heˈ. Ahāp lagiˈ kam pasōd ni deyom pagparintahan Tuhan ma abuta dambilaˈ matabi, bang paˈin kam daˈa nilarukan ni deyom api nalkaˈ ma ajukup matabi karuwambilaˈ. 48 Ya kabinasahan aˈa ma deyom nalkaˈ heˈ halam aniyaˈ hāranna, ya pˈddiˈna halam aniyaˈ tobtobanna." 49 Magparalilan giˈ si Isa. "Niasinan saga aˈa kamemon, pinalabay min katiksaˈan ya sapantun api. 50 Ahāp asal asin itu sagōˈ halam aniyaˈ pamabalik nanamna bang magtinuˈ na. Angkan kaˈam isab," yukna, "subay aniyaˈ asin ma kaˈam, hatina subay kam pahatul-hatul boˈ aniyaˈ kasulutanbi."
