1 Palabay paˈin llaw Sabtuˈ, inaˈan si Mariyam aˈa Magdala, maka si Salome, maka si Mariyam inaˈ si Joses, amˈlli laksiˈ maka nsˈllan pahamut pamahilalaˈ sigām ma mayat si Isa. 2 Manjari pagkˈllat llaw Ahad, boˈ subu-subu toˈongan, pehēˈ sigām ni pagkubulan. 3 Magsuli-suli na paˈin sigām ma labayan, yuk-i, "Sai bahāˈ anganggulungan batu panaplok lowang eˈ boˈ kitam makasōd?" Sabab aheya asal batu inān. 4 Pagtˈkka sigām pinaˈan taˈndaˈ eˈ sigām batu waˈi na bay ginulungan. 5 Jari pasōd sigām ni deyom lowang kubul ati aniyaˈ taˈndaˈ eˈ sigām dakayuˈ lˈlla abataˈ lagiˈ magnijuba poteˈ, aningkōˈ tampal ni kowan. Magtūy sigām takuddat sidda. 6 Yuk lˈlla itu ma sigām, "Daˈa kam tināw. Kataˈuwanku asal, ya pihabi si Isa aˈa Nasaret ya bay nilansang ni hāg pinapatay. Halam na iya maitu. Allum na iya pabīng! Ndaˈunbi lugal bay pamalegehan iya. 7 Na, pehēˈ na kam," yukna, "amowa haka itu ni saga mulidna maka ni si Petros. Yukbi ni sigām, 'Parahū du iya min kaˈam ni lahat Jalil. Mahēˈ du kam angˈndaˈ ma iya buwat bay llingna ma kaˈam.' " 8 Manjari paluwas saga dˈnda heˈ ati paragan min kubul. Angenog-ngenog sigām maka halam aniyaˈ pahˈlling sigām ni sai-sai sabab tināw sigām. 9 Na, allum paˈin si Isa pabīng min kamatayna ma daiˈ-llaw Ahad inān, magtūy iya patuwaˈ dahū ni si Mariyam dˈnda min Magdala, ya bay kapaluwasan eˈna pituˈ saitan. 10 Maka si Mariyam itu bay pehēˈ angahakaˈan saga mulid si Isa. Inaˈan sigām magdukka maka magtangis. 11 Sagōˈ kahakaˈan paˈin sigām eˈ si Mariyam in si Isa allum maka bay konoˈ taˈndaˈna, mbal sigām amˈnnal. 12 Puwas eˈ magpanyataˈ isab si Isa ni duwangan mulidna hinabu sigā lumˈngngan tudju kaleya, boˈ saddī pangluwahanna. 13 Manjari pabalik duwangan mulid eˈ ni Awrusalam angahakaˈan saga seheˈ sigā. Sagōˈ ya du sigā halam binˈnnal eˈ kaseheˈan inān. 14 Puwas eˈ magpanyataˈ na si Isa ni mulidna kasangpūˈ maka ssa hinabu sigām amangan. Pinabukagan sigām eˈna sabab mbal amˈnnal maka atuwas kōk sigām. Mbal sigām bilahi magkahagad minsan sigām nihakaˈan eˈ saga aˈa bay makaˈndaˈ si Isa maka kallumna pabīng min kamatayna. 15 Manjari amissala iya ni sigām, yukna, "Pehēˈ kam ni sabarang lahat ma kaluhaˈan dunya boˈ nasihatunbi lapal ahāp itu ni manusiyaˈ kamemon. 16 Sai-sai amˈnnal sampay pinandi tandaˈ in sigām angandol ma aku," yuk si Isa, "lappasan du saumul-umul. Saguwāˈ sai-sai mbal amˈnnal, pinatˈnnaˈan du iya hukuman. 17 Saga aˈa angandol ma aku kabuwanan du kawasa maghinang saga hinang makainu-inu. Makapalaˈan du sigām saga saitan sabab min kawasa ōnku. Makabissala isab sigām ma saga bahasa saddī halam bay kinataˈuwan eˈ sigām. 18 Bang sigām gantaˈ makaˈntanan sowa, atawa makainum ai-ai makamula, mbal du makainay ma sigām. Maka bang pinaˈabut tangan sigām ni aˈa taga-saki, kauliˈan du saga aˈa inān." 19 Manjari itu, aubus paˈin Panghūˈ Isa bay magbissala maka saga mulidna, tabowa iya paˈangkat tudju ni sulgaˈ ati aningkōˈ iya ma bihing Tuhan tampal ni kowan. 20 Jari lumˈngngan na saga mulidna magnasihat lapal ahāp ma sabarang lahat. Ginapiˈ sigām eˈ Panghūˈ Isa, binuwanan sigām barakat maghinang saga hinang kawasahan boˈ supaya kinataˈuwan in panduˈ sigām asal bˈnnal. Tammat
