1 Na, duwangˈllaw giˈ boˈ Hinang Paglakad maka Hinang Tinapay Halam Pasuligna. Manjari saga kaimaman alanga maka saga guru saraˈ agama magisun na paˈin bang buwattingga eˈ sigām anaggaw si Isa ma halam aniyaˈ makataˈu, boˈ supaya iya pinapatay. 2 "Daˈa pasaltaˈta ma pagjamu," yuk sigām, "boˈ mbal ahiluhalaˈ saga aˈa kamemon." 3 Na, inaˈan si Isa ma Betani, ma lumaˈ si Simun aˈa bay niˈipul. Ma pagkakanan paˈin si Isa, aniyaˈ pinaˈan ni iya dakayuˈ dˈnda amowa bingkiˈ-bingkiˈ nihinang min batu poteˈ, isihan nsˈllan pahamut. Nsˈllan itu nsˈllan narda halam aniyaˈ lamudna, landuˈ ahalgaˈ. Jari pinateˈ eˈ dˈnda kˈllong bingkiˈ-bingkiˈ ati binusugan kōk si Isa maka nsˈllanna. 4 Aniyaˈ mainaˈan saga aˈa magdugal kabowa kagit atay sigām. Magbissala sigām dangan-parangan, yuk-i, "Angay nsˈllan ahalgaˈ itu pinakaˈat? 5 Arapun pinabˈllihan labi tˈllu hatus pilak ati bˈllihanna inān pamuwan ni kamiskinan." Jari sinoway sidda eˈ sigām dˈnda bay amusug nsˈllan eˈ. 6 Sagōˈ ahˈlling si Isa, yukna, "Pasagarinbi na iya. Angay iya sasawbi? Ahāp sidda hinangna ma aku itu. 7 Sabab paddas na paˈin aniyaˈ aˈa miskin ma kaˈam. Makatabang du kam ma sigām bang sumiyan-sumiyan kabayaˈanbi. Saguwāˈ aku itu mbal du paddas ma kaˈam. 8 Dˈnda itu bay makahinang ya takoleˈna, hatina buˈusanna nsˈllan pahamut ni baranku pangawal llaw pagkubul ma aku. 9 Bˈnnal ya pahˈllingku itu ma kaˈam," yuk si Isa, "piˈingga-piˈingga lahat pagnasihatan lapal ahāp ma kaluhaˈan dunya, kinissa du pasal bay hinang dˈnda itu pangentoman ma iya." 10 Puwas paˈin inaˈan, si Judas Iskariyut, dakayuˈ mulid si Isa min kasangpūˈ maka duwa, bay pehēˈ ni kaimaman alanga magisun anōngan si Isa ni sigām. 11 Pagkale sigām bang ai gawi si Judas itu, magtūy sigām kinōgan ati anganjanjiˈ sigām anambahan iya maka sīn. Pagubus, amiha iya waktu ahāp panōngna si Isa ni sigām. 12 Na, taˈabut tagnaˈan llaw paghinang saga Yahudi ma Hinang Tinapay Halam Pasuligna. Ya na inaˈan llaw panumbaliˈ saga anak bili-bili ya kinakan eˈ sigām pangentoman waktu bay kapangalappas Tuhan ma kaˈmboˈ-mboˈan sigām. Tinilaw si Isa eˈ saga mulidna, yuk-i, "Maingga kabayaˈannu panakapan kami pagjamuhannu ma Hinang Paglakad?" 13 Jari sinohoˈ eˈ si Isa duwangan mulidna, yukna, "Pehēˈ kam ni deyom daˈira inān. Sinampang du kam eˈ dakayuˈ lˈlla amowa kibut isihan boheˈ. Turulunbi iya 14 sampay iya pasōd na ni deyom lumaˈ. Amissala kam isab ni tag-dapu lumaˈ ya pasōranna, yukbi, 'Sinōˈ ka tinilaw eˈ Guru bang maingga bilik pagjamuhanna maka saga mulidna ma Hinang Paglakad?' 15 Jari pinaˈndaˈan du kam bilik aluha ma diyataˈ angkap," yuk si Isa. "Panyap asal bilik inān ati mainaˈan kam magsakap kinakantam." 16 Na, pehēˈ duwangan mulid eˈ ni deyom daˈira. Taˈndaˈ eˈ sigā mahēˈ buwat bay pamissala ma sigā eˈ si Isa, ati sinakap eˈ sigā kinakan ma Hinang Paglakad. 17 Taˈabut paˈin abay kohap magbeyaˈ si Isa maka mulidna kasangpūˈ maka duwa pinaˈan ni lumaˈ pagsakapan kinakan eˈ. 18 Jari itu, hinabu sigām amangan, amissala si Isa ni sigām, yukna, "Bˈnnal ya pamissalaku itu ma kaˈam, aniyaˈ dangan min kaˈam magbantu anōngan aku ni bantaku. Itiyaˈ iya maitu magsalu maka aku." 19 Magtūy katˈkkahan susa saga mulid eˈ ati atilaw sigām ma si Isa magsunuˈ-sunuˈ. Yuk-i, "Nggaˈi ka bahāˈ aku?" 20 Yuk sambung si Isa, "Aˈa du min kaˈam kasangpūˈ maka duwa, seheˈku magsalu anˈnnoˈan tinapayna ni deyom pinggan itu. 21 Aku itu, Anak Manusiyaˈ," yuk si Isa, "amatay du buwat bay tasulat ma pasalanku ma deyom Kitab. Saguwāˈ siya-siya du aˈa ya anōngan Anak Manusiyaˈ ni bantana. Ahāp lagiˈ aˈa inān halam bay nianakan." 22 Sabu sigām masi amangan, niāˈ tinapay eˈ si Isa. Niamuˈan eˈna pagsukulan boˈ yampa pinagpōng-pōng eˈna ati pamuwanna ma saga mulidna. "Sambutunbi," yukna, "sabab tinapay itu baranku koˈ." 23 Niāˈ isab eˈna dakayuˈ sawan ati niamuˈan eˈna isab pagsukulan boˈ yampa sōnganna ni sigām panginuman sigām kamemon. 24 Yukna, "Lahaˈku koˈ itu, tandaˈ sin kapagsulutan Tuhan maka manusiyaˈ. Lahaˈku song pinabuˈus ma sababan aˈa aheka, supaya sigām kalappasan. 25 Bˈnnal ya pangahakaku itu ma kaˈam, puwas itu mbal na aku anginum binu-anggul itu pabīng. Subay aku ma deyom pagparintahan Tuhan na boˈ yampa aku anginum binu-anggul pabalik." 26 Puwas eˈ, aubus paˈin eˈ sigām bay angalang dakayuˈ kalangan pamudji Tuhan, paluwas na sigām minnēˈ tudju ni būd Kayu Jaitun. 27 Manjari ahˈlling si Isa ni sigām, yukna, "Alahi du kam kamemon angˈbba min aku sabab tasulat koˈ inān ma deyom Kitab, ya yuk-i, 'Bonoˈku,' yuk Tuhan, 'aˈa bay angupiksaˈ bili-bili ati akaukanat saga bili-bili bay daumpigan.' 28 Sagōˈ bang aku tapakallum na pabīng min kamatayku, parahū du aku min kaˈam tudju ni lahat Jalil." 29 Ahˈlling si Petros ni iya, yukna, "Mbal toˈongan ka bbahanku minsan ka niˈbbahan eˈ kaseheˈan itu." 30 Yuk si Isa, "Hakaˈanta ka toˈongan, ma sangom itu, ma halam giˈ kaminduwa pangukkuˈuk manuk, amalilu du ka min tˈllu in aku mbal kataˈuwannu." 31 Gom paˈin akosog eˈ si Petros ahˈlling, yukna, "Minsan aku paunung amatay ma kaˈa mbal du ka paliluhanku." Ya du saga mulid kaseheˈan, buwattēˈ isab pahˈlling sigām. 32 Manjari palanjal giˈ sigām ni kabbun niōnan Getsemane ati yuk si Isa ni saga mulidna, "Maitu giˈ kam aningkōˈ. Pinaˈan lagiˈ aku anabbut ni Tuhan." 33 Ya binowa eˈ si Isa seheˈna pinaˈan si Petros, si Yakub maka si Yahiya. Sakali magkasusahan iya, magkˈbba-kˈbba atayna. 34 Yukna ni tˈllungan mulidna heˈ, "Aku itu agon magkamamatay ma sabab kasusahan itu. Angagad kam maitu magjaga." 35 Makalawak-lawak paˈin iya min sigām, pahantak iya ni tanaˈ maka eˈna anabbut ni Tuhan. Ya niamuˈ eˈna bang makajari, mbal na iya pinatˈkkahan kabinasahan ya song taˈabutna. 36 "Arōy, Mmaˈ!" yukna. "Bang makajari laˈanin lagiˈ min aku sawan kabinasahan itu. Sagōˈ nggaˈi ka kabayaˈanku subay nirūlan, bang paˈin min kabayaˈannu." 37 Puwas eˈ pabīng si Isa ni saga mulidna tˈllungan ati tabākna sigām magtulihan. Yukna ni si Petros, "O Simun, atuli ka? Mbal ka bahāˈ makatatas anganjaga minsan laˈa hal danjām? 38 Pajaga kam. Angamuˈ kam tabang ni Tuhan boˈ kam mbal tabowa-bowa eˈ sasat. Lillaˈ deyom ataybi sagōˈ abuhat pamarananbi." 39 Sakali pehēˈ si Isa ni baina anabbut ni Tuhan pabīng buwat bay panabbutna dahū. 40 Makabalik paˈin iya ni disi Petros tabākna isab sigām magtulihan pabīng sabab kinaruˈ sidda. Mbal kinataˈuwan eˈ sigām bang ai panambung sigām ma si Isa. 41 Pagbalik si Isa kamintˈlluna, yukna ni sigām, "Oy, atuli giˈ kam? Pahali-hali giˈ kam? Sarang na koˈ ilu. Taˈabut na waktu. Aku, Anak Manusiyaˈ itu, song na tinukbalan ni pangˈntanan saga aˈa alaˈat. 42 Pabungkal na kam! Sūng na kitam sabab ilu na aˈa ya anōngan aku ni sigām." 43 Na, hinabu si Isa ahˈlling giˈ ni saga mulidna, magtūy atˈkka pinaˈan si Judas, dakayuˈ mulid si Isa min kasangpūˈ maka duwa. Aheka aˈa magbeyaˈ maka iya magpamowa takos maka saga kakakal. Saga aˈa inān bay sinōˈ pinaˈan eˈ saga kaimaman alanga sampay eˈ saga guru saraˈ agama maka saga pagmattoˈahan. 44 Aniyaˈ asal pandoga bay pamuwan si Judas ma saga aˈa heˈ. Bay yukna ma sigām, "Ya aˈa siyumku, ya na heˈ saggawbi. Bowahunbi iya pehēˈ maka jagahinbi iya pahāp." 45 Pagtˈkka si Judas pinaˈan, magtūy iya paˈabut ni si Isa. "Tuwan Guru," yukna. Jari siyumna. 46 Sinaggaw si Isa eˈ saga aˈa inān, binalutan pahogot. 47 Sagōˈ aniyaˈ dakayuˈ min saga aˈa magtˈnggehan mainaˈan angahurusan patakosna. Nilagut eˈna dakayuˈ sosohoˈan Imam Muwallam ati autas dambilaˈ taingana. 48 Ahˈlling si Isa ni saga aˈa bay anaggaw iya, yukna, "Kabāˈbi bahāˈ in aku itu mundu, ya poˈon kam subay amowa takos maka kakakal panaggawbi aku? 49 Llaw-llaw aku bay amanduˈ ma deyom langgal pagkulbanan eˈ. Mahēˈ aku ma kaˈam boˈ halam aku bay saggawbi. Sagōˈ ai-ai bay tasulat ma deyom Kitab subay aniyaˈ kamaksuranna." 50 Manjari maglahian saga mulid si Isa kamemon ati pinasagaran iya mainaˈan. 51 Aniyaˈ isab mainaˈan dakayuˈ subul paturul ma si Isa. Luwal hōs ya pasˈmmekna. Na, arak iya sinaggaw eˈ sigām, 52 sagōˈ niˈbbahan eˈna hōsna ati alahi iya magpanantang. 53 Manjari itu binowa si Isa eˈ sigām ni lumaˈ Imam Muwallam. Inaˈan magsakaum saga kaimaman alanga kamemon maka saga pagmattoˈahan maka saga guru saraˈ agama. 54 Bay paturul isab si Petros ma si Isa sagōˈ min katahan. Paturul iya sampay pasōd na ni deyom halaman lumaˈ Imam Muwallam ati mainaˈan iya magtingkōˈan maka saga jaga imam eˈ, parangka ma bihing api. 55 Ya kaimaman alanga maka kamemon saga aˈa ma Tumpukan Maghuhukum amiha sababan panuntut sigām ma si Isa boˈ supaya iya pinatˈnnaˈan hukuman ni kamatay. Saguwāˈ halam aniyaˈ panuntutan tabāk eˈ sigām. 56 Aheka magsaksiˈ puting bahasa iya katuntutan sagōˈ mbal maguyun saksiˈ sigām. 57 Aniyaˈ aˈa kaseheˈ bay anˈngge amuwan saksiˈ itu panuntut sigām ma si Isa boˈ paˈin putingan. 58 Yuk-i, "Bay takale kami aˈa itu angupama in iya angalubu langgal pagkulbanan ya hinangan tangan manusiyaˈ inān. Ma deyom tˈllungˈllaw konoˈ amatˈngge iya langgal saddī, sagōˈ nggaˈi ka manusiyaˈ ya angahinang iya." 59 Malaingkan minsan buwattēˈ panaksiˈ sigām mbal du maguyun bissala sigām. 60 Manjari anˈngge Imam Muwallam ma tˈngngaˈ sigām atilaw ma si Isa. Yukna, "Kaˈa ilu, halam bahāˈ aniyaˈ pangandaˈawanu ma panuntutan kaˈa itu?" 61 Saguwāˈ halam ahˈlling si Isa, halam iya anambung. Amissala pabīng Imam Muwallam, yukna, "Kaˈa bahāˈ Al-Masi, Anak Tuhan?" 62 "Ahoˈ, aku na," yuk si Isa. "Ati taˈndaˈbi du aku, Anak Manusiyaˈ itu, aningkōˈ ma bihing Sangat Kawasa, tampal ni kowan. Maka taˈndaˈbi du aku piˈitu ameyaˈ ma gabun min deyom sulgaˈ." 63 Manjari gineseˈ eˈ Imam Muwallam jubana kabowa astolna. Yukna, "Mbal na kitam amiha saksiˈ saddī! 64 Takalebi na llingna pangkal ni Tuhan! Ai pangahukumbi?" Sakali dauyunan na pangahukum sigām kamemon, in si Isa patut subay pinapatay. 65 Jari aniyaˈ sigām kaseheˈan anagnaˈ angaludjaˈan si Isa. Tinambunan isab matana eˈ sigām boˈ yampa pinagtibuˈ. Yuk sigām ma iya, "Tokorun konoˈ bang sai anibuˈ kaˈa!" Jari binowa si Isa eˈ saga jaga inān boˈ binutug. 66 Na, ma halaman lumaˈ paˈin si Petros, aniyaˈ palabay minnaˈan dakayuˈ dˈnda sosohoˈan Imam Muwallam. 67 Pagˈndaˈna ma si Petros parangka ma api, magtūy ndaˈna pahāp ati yukna, "Kaˈa ilu, bay ameyaˈ ma si Isa, ya aˈa Nasaret inān!" 68 Sagōˈ amalilu magtūy si Petros. "Mbal kataˈuwanku," yukna. "Mbal tahatiku bang ai pahˈllingnu ilu." Ati alaˈan iya minnēˈ tudju ni bowaˈ lawang ya paluwasan min halaman eˈ. Jari angukkuˈuk manuk. 69 Taˈndaˈ na iya pabīng eˈ sosohoˈan dˈnda heˈ ati ahˈlling iya ni saga aˈa magtˈnggehan mainaˈan. Niˈisaban eˈna bay pahˈllingna tagnaˈ. "Aˈa ilu," yukna, "bay seheˈ sigām." 70 Sagōˈ amalilu na isab si Petros. Mbal atˈggol, ahˈlling ni si Petros saga aˈa magtˈnggehan mainaˈan. Yuk sigām, "Kataˈuwan kami in kaˈa bˈnnal bay seheˈ disi Isa sabab aˈa Jalil du ka isab!" 71 Sakali anuknaˈan di-na si Petros ati yukna, "Mbal kataˈuwanku aˈa pagbissalabi ilu!" 72 Saruˈun-duˈun du angukkuˈuk manuk, kaminduwana na, ati taentom eˈ si Petros ya bay lling si Isa ma iya, ya bay yukna, "Ma mbal giˈ angukkuˈuk manuk min duwa, amalilu du ka min tˈllu in aku mbal kataˈuwannu." Pagentom itu eˈ si Petros, magtūy iya anangis, magdukka toˈongan.
