1 Mbal atˈggol minnēˈ, nilatag eˈ si Isa saga daˈira maka kalumaˈan anganasihat lapal ahāp pasal pagparinta Tuhan. Ameyaˈ ma iya mulidna kasangpūˈ maka duwa, 2 maka aniyaˈ isab saga dˈnda parongan. Kaseheˈan saga dˈnda itu bay kapaluwasan saitan eˈ si Isa, kaseheˈan bay kauliˈan saki sigām. Inaˈan si Mariyam, dˈnda min Magdala ya bay kapaluwasan saitan pituˈ hekana. 3 Inaˈan isab si Joanna hˈnda si Kusa, ya alanga kapatutna ma deyom astanaˈ sultan Herod, maka inaˈan si Susanna, maka aheka giˈ saga dˈnda saddī. Saga dˈnda heˈ bay angatasan disi Isa. 4 Na, aheka saga aˈa min baˈanan kauman patimuk na paˈin pehēˈ ni si Isa. Pasalta, binissalahan sigām kissa paralilan. Yukna, 5 "Aniyaˈ inān dakayuˈ aˈa pehēˈ ni humana anaboran bigi-tinanom. Pagsabodna itu aniyaˈ bigi-tinanom kaseheˈ apakpak ni bihing lān, sagōˈ giniˈik eˈ aˈa maglaulabay maka tinittuk eˈ saga manuk-manuk sampay halam na aniyaˈ takapin. 6 Aniyaˈ bigi-tinanom kaseheˈ apakpak ni tanaˈ kabatuhan. Makatomoˈ paˈin, alˈkkas alanos sabab tanaˈ heˈ halam aniyaˈ boheˈna. 7 Aniyaˈ isab bigi-tinanom kaseheˈ apakpak ni tˈngngaˈ sagmot itingan ati katalungan tinanom sabab magbeyaˈ patomoˈ maka sagmot eˈ. 8 Na, ya bigi-tinanom kaseheˈ apakpak ni tanaˈ ahāp, ati ahāp tomoˈna. Pasōng amuwan buwaˈ lumanduˈan hekana. "Na," yuk si Isa, "sasuku kam makakale, ikutunbi toˈongan." 9 Tinilaw si Isa eˈ saga mulidna bang ai hati kissa ya bay pamaralilna inān. 10 Anambung iya, yukna, "Kaˈam ilu kabuwanan kataˈu boˈ supaya tahatibi pasal kapagparinta Tuhan ma saga aˈana, ya halam bay pinataˈu eˈna ni manusiyaˈ kaseheˈ. Sagōˈ saga aˈa kaseheˈan inān subay kinissahan saga kissa pamaralilan, ati nindaˈ sadja eˈ sigām sagōˈ mbal pasobsob ni deyom pikilan sigām. Kinale eˈ sigām sagōˈ mbal tahati. 11 "Na," yuk si Isa, "ya na itu hati kissa bay pamaralilku heˈ. Ya bigi-tinanom inān, ya na palman Tuhan. 12 Ya bigi-tinanom bay apakpak ni lān inān, ya dalilna saga aˈa makakale palman Tuhan. Manjari pinaˈan nakuraˈ saitan angagaw palman min deyom pikilan sigām boˈ supaya sigām mbal amˈnnal ati mbal alappas. 13 Ya bigi-tinanom bay apakpak ni tanaˈ kabatuhan inān, ya dalilna saga aˈa makakale ma palman Tuhan. Magtūy sigām kinōgan anaimaˈ lapal palman eˈ sagōˈ mbal anganggamut palalom ma deyom atay sigām. Daiˈ-daiˈ du pagkahagad sigām. Taˈabut paˈin sigām sinasat eˈ nakuraˈ saitan, magtūy sigām angˈbba min bay pagkahagad sigām. 14 Ya bigi-tinanom bay apakpak ni sagmot itingan inān, ya dalilna saga aˈa makakale ma palman Tuhan. Sagōˈ alimbit pikilan sigām eˈ kahālan deyom dunya itu. Ya na paˈin ahalgaˈ ma sigām saga pangaltaˈ maka napsu sigām. Saliˈ sigām dalil tinanom katalungan, mbal magkatoˈa buwaˈna. 15 Manjari ya bay sinaboran ni tanaˈ ahāp inān, ya dalilna saga aˈa akale ma palman Tuhan magatay poteˈ. Tinauˈ eˈ sigām ma deyom itikad maka atuyuˈ sigām ameyaˈan iya. Jari palman inān saliˈ dalil tinanom amuwan buwaˈ ma deyom atay, hatina ahāp kamaujuranna." 16 Amanduˈ giˈ si Isa, yukna, "Halam aniyaˈ aˈa amakeyat palitaˈan boˈ yampa saˈobanna maka undam atawa patˈnnaˈna ma deyoˈ kantil. Tantu subay pinatˈnnaˈ eˈna ma diyataˈ papaganna boˈ taˈndaˈ sawana eˈ sasuku pasōd ni deyom lumaˈ. 17 Sabab ai-ai tinapukan ma buwattinaˈan pinaluwas du ma sinosōng, maka ai-ai nilimbungan ma buwattinaˈan tahati du ma waktu sinōng. 18 Angkan subay kalehunbi pahāp sabab sai-sai aniyaˈ kataˈuna, kinˈnnopan giˈ ma iya. Saguwāˈ sai-sai mbal makahati, kinulangan lagiˈ bay panghatina." 19 Manjari itu atˈkka pinaˈan inaˈ si Isa maka saga danakanna lˈlla sagōˈ mbal sigām makasekot ni iya ma sabab kaheka aˈa. 20 Aniyaˈ anambukuhan si Isa, yukna, "Tuwan, inaˈan inaˈnu maka saga danakannu anˈngge ma luwasan, bilahi magˈndaˈ maka kaˈa." 21 Ahˈlling si Isa ni saga aˈa mainaˈan, yukna, "Sai-sai akale ma palman Tuhan maka ameyaˈ, sigām ya inaˈku maka dauranakanku." 22 Pagabut llaw dakayuˈ, paruwaˈ si Isa maka saga mulidna ni bayanan. Yukna ni sigām, "Sūng kitam pauntas ni dambilaˈ danaw eˈ." 23 Aleha paˈin sigām, tatuli si Isa. Sakali itu aniyaˈ hunus parugpak ni danaw inān. Sōng-sōng na sigām abuhaw sabab sinampoyakan eˈ goyak, maka aheya kapiligduhan sigām. 24 Pasekot ni si Isa saga mulidna amatiˈ iya. "O Tuwan! Tuwan!" yuk sigām, "Abuhaw na kitam!" Jari pabungkal si Isa boˈ yampa sohoˈna baliyu maka goyak inān pahondong. Saruˈun-duˈun du pahali, ati tˈddoˈ na toˈongan. 25 Puwas eˈ ahˈlling si Isa ni saga mulidna, yukna, "Angay? Mbal kam bahāˈ angandol ma aku?" Sagōˈ tināw sigām maka ainu-inu angkan sigām magtilaw-tilawan di-sigām, yuk-i, "Sai bahāˈ aˈa itu? Tasohoˈna baliyu maka goyak ati bineyaˈ iya." 26 Manjari palanjal sigām sampay makatandan ni lahat bangsa Gerasa, ya ma anggopan lahat Jalil. 27 Pagdeyoˈ paˈin si Isa, sinampang iya eˈ aˈa min daˈira inān, aˈa sinōd saitan. Atˈggol na iya halam magsinˈmmek atawa patˈnnaˈ ma deyom lumaˈ sagōˈ lowang kubul ya patˈnnaˈanna na paˈin. 28 Na, pagˈndaˈ aˈa itu ma si Isa, angolang iya pakosog maka pasujud ma dahuanna. Akosog pangalinganna, yukna, "O Isa, Anak Tuhan Mahatinggi! Ai kabayaˈannu min aku? Angamuˈ aku junjung ni kaˈa, daˈa aku binasahun." 29 Angkan buwattēˈ junjungna sabab in saitan ma deyom baranna inān bay sinōˈ eˈ si Isa paluwas. Araran asal aˈa inān pagkasangonan saitan. Minsan nihengkotan tapeˈ-tanganna maka kilikili, nijagahan isab eˈ saga aˈa, abˈkkat sadja eˈna ati binowa iya eˈ saitan maglunsul ni lahat halam magaˈa. 30 Jari tinilaw iya eˈ si Isa, yukna, "Sai ōnnu?" Yuk sambung saitan inān, "Ōnku Laksaˈan." Sabab aheka saitan bay pasōd ni deyom baran aˈa inān. 31 Anganjunjung saga saitan eˈ ni si Isa bang paˈin sigām mbal papehēˈna ni deyom nalkaˈ. 32 Ma jadjahan inaˈan aniyaˈ baˈanan bawi, aheka toˈongan, magkakan ma lorosan būd. Na, angamuˈ-ngamuˈ saga saitan inān ma si Isa bang makajari pinasōd ni deyom saga bawi heˈ ati pinabaˈid sigām eˈna. 33 Jari paluwas saitan min baran aˈa inān boˈ pasōd ni bawi. Magtūy maglumpat paragan saga bawi heˈ min pampang tudju ni deyom danaw boˈ yampa alembo kamemon. 34 Pagˈndaˈ itu eˈ saga aˈa bay angipat bawi heˈ, paragan sigām pehēˈ ni daˈira maka ni kalumaˈan deya, angahakaˈan saga aˈa mainaˈan. 35 Jari pinaˈan sigām angˈndaˈ bang ai bay paniyaˈ inān. Pagtˈkka sigām ni tongod si Isa, taˈndaˈ aˈa bay sinōd saitan aningkōˈ mainaˈan ma bihing tapeˈ si Isa. Magsinˈmmek na iya maka ahāp na akkal-pikilanna. Manjari tināw sigām. 36 Sinuli-sulihan isab sigām eˈ saga aˈa bay makaˈndaˈ bang buwattingga iya bay kauliˈan. 37 Manjari saga aˈa min kalahat-lahatan Gerasa inān kamemon angamuˈ ma si Isa bang paˈin iya alaˈan minnaˈan sabab mbal kasandalan tāw sigām. Angkan paruwaˈ si Isa ni bayanan boˈ pauntas parambilaˈ. 38 Aˈa bay kapaluwasan saitan eˈ angamuˈ ameyaˈ ma si Isa sagōˈ pinapoleˈ iya. Yuk si Isa ma iya, 39 "Amoleˈ na ka ni lumaˈnu. Hakaˈin saga aˈa mainaˈan pasal hinang aheya bay tahinang eˈ Tuhan ma kaˈa." Manjari alaˈan minnēˈ boˈ angalatag deyom daˈira heˈ angahaka pasal bay tahinang ma iya eˈ si Isa. 40 Na, makatandan paˈin si Isa ni dambilaˈ danaw, kinōgan saga aˈa mainaˈan anampang iya sabab nilagaran iya. 41 Sakali itu, aniyaˈ pinaˈan ni iya dakayuˈ nakuraˈ langgal ma lahat inān, ōnna si Jayrus. Pasujud iya ni si Isa angamuˈ iya pehēˈ ni lumaˈna, 42 sabab aniyaˈ anakna dˈnda dakayuˈ-kayuˈ, sangpūˈ maka duwantahun umulna, song magkamamatay. Jari ameyaˈ si Isa ma iya. Na, ma labayan paˈin si Isa tudju ni lumaˈ nakuraˈ inān, kasigpitan iya eˈ baˈanan aˈa. 43 Aniyaˈ ma kahekaˈan aˈa inān dakayuˈ dˈnda sakihan. Sangpūˈ na maka duwantahun halam atitis paglahaˈna. Aubus na sīnna kamemon panamba doktol sagōˈ halam aniyaˈ makapauliˈ. 44 Pasekot iya min buliˈan boˈ amaˈabut tanganna ni tōng sˈmmek si Isa. Saruˈun-duˈun magtūy pahondong paglahaˈna. 45 Ahˈlling si Isa, yukna. "Sai bay angˈntanan aku?" Amalilu saga aˈa inān kamemon. Yuk si Petros, "Tuwan, kaheka aˈa ma sakalibutnu maggipit ni kaˈa, atilaw giˈ ka?" 46 Sagōˈ ahˈlling si Isa, yukna, "Aniyaˈ bay angˈntanan aku sabab tananamku aniyaˈ barakat paluwas min baranku." 47 Sakali itu, pagka kinataˈuwan eˈ dˈnda in hinangna kasakupan na, pehēˈ iya pasujud ni atag tapeˈ si Isa maka eˈna amidpid. Minsan aheka aˈa makakale, nihakaˈan eˈna si Isa bang angay iya bay amaˈabut tanganna ni iya, maka pasal sakina kauliˈan magtūy. 48 Yuk si Isa ni iya, "Arung, kauliˈan na ka ma sabab pangandolnu ma aku. Palanjal ka ma halam aniyaˈ kasusahan." 49 Manjari itu, hinabu si Isa amissala ni dˈnda, aniyaˈ aˈa atˈkka pinaˈan min lumaˈ si Jayrus. Yukna ni si Jayrus, "Amatay na anaknu. Daˈa pamaleˈun guru ilu!" 50 Sagōˈ takale llingna itu eˈ si Isa ati yukna ni si Jayrus, "Daˈa ka tināw. Magparassaya sadja ka. Allum du anaknu." 51 Pagtˈkka si Isa ni lumaˈ nakuraˈ inān, halam aniyaˈ bay tugutanna magbeyaˈ maka iya pasōd, luwal si Petros, si Yahiya, si Yakub, maka mattoˈa ondeˈ. 52 Magtangisan maka magolang asal saga aˈa mainaˈan kamemon. Sagōˈ nilāng sigām eˈ si Isa, yukna, "Daˈa kam magtangis. Halam amatay ondeˈ itu. Hal iya atuli!" 53 Pinagtittowahan iya eˈ sigām sabab kasakupan eˈ sigām amatay na ondeˈ. 54 Jari binalutan eˈ si Isa tangan ondeˈ boˈ yampa pinatanog suwalana, yukna, "Arung, punduk ka." 55 Sakali pabalik nyawana ati pabuhat magtūy. Sinohoˈ iya eˈ si Isa subay pinakan. 56 Ainu-inu toˈongan mattoˈana sagōˈ sinōˈ sigām eˈ si Isa daˈa angahaka ni sai ni sai pasal inaˈan-i.
