1 Aubus paˈin kamemon bissala si Isa itu ma saga aˈa, pasōd iya ni deyom daˈira Kapirnaum. 2 Na, aniyaˈ mainaˈan dakayuˈ kapitan bangsa Rōm taga-sosohoˈan kalasahanna. Asaki na sosohoˈan itu, song na magkamamatay. 3 Makakale paˈin kapitan pasal si Isa, magtūy aniyaˈ pagmattoˈahan bangsa Yahudi pinapinaˈan eˈna ni si Isa angamuˈ pinauliˈ sosohoˈanna eˈ. 4 Manjari pasampay saga pagmattoˈahan inān ni si Isa boˈ anganjunjung toˈongan, yuk-i, "Patut subay tabangannu kapitan itu, 5 sabab amagay toˈongan iya ma bangsatam Yahudi, maka iya ya bay magbaran anganggastuhan langgaltam." 6 Jari ameyaˈ si Isa ma sigām. Asekot paˈin iya ni lumaˈ, sinohoˈ eˈ kapitan saga bagayna amowahan si Isa lapal, yuk-i, "Tuwan, daˈa ka amaluˈug di-nu pasampay piˈitu sabab mbal aku tōp amapiˈitu kaˈa ni lumaˈku. 7 Bangsahan toˈongan ka angkan pikilku in aku mbal tōp anampang kaˈa magbaran. Sagōˈ angalapal sadja ka minnilu ati kauliˈan du sosohoˈanku itu. 8 Minsan aku, biyaksa aku pinagbayaˈan eˈ aˈa min diyataˈanku maka aniyaˈ isab sundalu pagbayaˈanku. Bang sohoˈku dangan pehēˈ, pehēˈ du iya. Bang sohoˈku dangan piˈitu, piˈitu du iya. Damikiyanna bang aniyaˈ pahinangku ma saga sosohoˈanku, magtūy du nihinang eˈ sigām." 9 Pagkale paˈin pahˈlling kapitan inān eˈ si Isa, ainu-inu iya. Jari palingiˈ iya ni saga kahekaˈan aˈa ya paurul min buliˈanna. Yukna ma sigām, "Hakaˈanta kam, minsan ma deyom bangsatam Israˈil, halam aku bay makabāk aˈa buwattitu kosog imanna. " 10 Jari amoleˈ na saga aˈa bay sinōˈ eˈ kapitan. Pagtˈkka sigām ni lumaˈ, taˈndaˈ eˈ sigām sosohoˈan inān kauliˈan na. 11 Mbal atˈggol minnaˈan pehēˈ si Isa ni dakayuˈ kalumaˈan niōnan Nain. Sineheˈan iya eˈ saga mulidna maka baˈanan saga aˈa kaseheˈan. 12 Makasekot paˈin iya ni lawang ya pasōran kauman inān, aniyaˈ mainaˈan saga aˈa ananggung patay aˈa, binowa paluwas ni pagkubulan. Lˈlla ya amatay heˈ, anak tunggal dakayuˈ balu dˈnda. Jari aheka aˈa min kalumaˈan inān bay pabunyug angubul. 13 Na, pagˈndaˈ paˈin Panghūˈ Isa ma dˈnda itu, magtūy iya tˈkkahan aseˈ. Yukna ma dˈnda inān, "Daˈa ka anangis." 14 Puwas eˈ pasōng si Isa ni tanggungan boˈ ntananna, angkan pahoggaˈ saga aˈa ananggung eˈ. Ahˈlling si Isa, yukna, "Otoˈ, punduk ka!" 15 Magtūy allum pabalik aˈa amatay heˈ. Punduk iya maka eˈna amissala, ati sinōngan iya eˈ si Isa ni inaˈna. 16 Sinōd tāw saga aˈa mainaˈan kamemon maka sinanglitan Tuhan eˈ sigām, yuk-i, "Aniyaˈ na nabi abarakat palahil piˈitu. Makapiˈitu na Tuhan anabangan kitam saga aˈa sukuˈna." 17 Manjari ya habal pasal bay hinang si Isa itu pasaplag na paˈin ma kaluhaˈan lahat Yahudiya, sampay ma sakalibutna. 18 Na, kahakaˈan si Yahiya eˈ saga mulidna pasal pakaradjaˈan itu. Jari nilinganan eˈna duwangan mulidna, 19 sinohoˈ pehēˈ ni Panghūˈ Isa. Sinōˈ sigā atilaw iya bang iya bahāˈ bay pinagbissala piˈitu ni dunya, atawa bang aniyaˈ giˈ saddī nilagaran. 20 Jari pagtˈkka duwangan itu ni si Isa, yuk sigā, "Sinōˈ kami piˈitu eˈ si Yahiya Magpapandi sabab aniyaˈ tilawna ni kaˈa. Kaˈa bahāˈ ya pinagbissala piˈitu ni dunya? Atawa aniyaˈ giˈ saddī min kaˈa subay lagaran kami?" 21 Na, ma waktu inaˈan-i aheka aˈa kauliˈan eˈ si Isa ya lamma maka saki sigām indaginis, maka aheka bay kapaluwasan saitan. Aheka isab saga aˈa buta bay tapaˈndaˈna pabīng. 22 Manjari sinambungan eˈ si Isa duwangan mulid si Yahiya heˈ. Yukna, "Pabīng kam pehēˈ. Hakaˈinbi si Yahiya pasal ai-ai taˈndaˈbi maka takalebi maitu. Saga aˈa bay buta makaˈndaˈ na. Aˈa bay pengkaˈ makalˈngngan na toˈongan. Aˈa bay niˈipul tapalanuˈ na. Aˈa bay bisu makakale na, maka aˈa bay amatay tapakallum na pabīng. Sampay aˈa kulang-kabus kanasihatan na lapal ahāp. 23 Aheya du kahāpan sasuku mbal magduwa-ruwa pikilanna ma aku." 24 Makalaˈan paˈin minnēˈ saga sosohoˈan si Yahiya heˈ, amissala si Isa ni kahekaˈan aˈa inān pasal si Yahiya. Yukna, "Ai bahāˈ bay pihabi, ya angkan kam bay pehēˈ ni lahat paslangan? Kabayaˈanbi bahāˈ angˈndaˈ dakayuˈ aˈa sapantun dansolag parang-parang, tabowa papˈllay eˈ baliyu? 25 Bang nggaˈi ka heˈ-i, ai bahāˈ bay ndaˈbi pehēˈ? Aˈa bahāˈ magsinˈmmek ahalgaˈ? Maraiˈ nggaˈi ka, sabab bang aˈa magsinˈmmek buwattēˈ maka magpalasahan toˈongan, inaˈan sigām ma deyom astanaˈ. 26 Hakaˈin aku toˈongan bang ai bay ndaˈbi pehēˈ? Dakayuˈ nabi bahāˈ? Ahoˈ, bˈnnal nabi, sagōˈ labi giˈ min saga nabi kamemon. 27 Sabab si Yahiya itu bay pinagbissala ma deyom Kitab, ya yuk-i, 'Itiyaˈ sosohoˈanku, yuk Tuhan. Sohoˈku iya parahū min kaˈa, boˈ supaya sakapanna lān palabayannu.' 28 Hakaˈanta kam," yuk si Isa, "si Yahiya Magpapandi itu halam aniyaˈ abangsa saddī min iya ma deyom binangsa manusiyaˈ. Sagōˈ sai-sai ma deyoman pagparinta Tuhan, minsan aˈa areyoˈ kapagaˈana, alanga lagiˈ min si Yahiya." 29 Saga aˈa kamemon bay akale toˈongan ma si Isa, ya lagiˈna saga magaˈāˈ sukay parinta. Angahoˈ sigām in kahandak Tuhan asal abontol, ya angkan sigām bay pinandi taubat eˈ si Yahiya. 30 Sagōˈ saga aˈa Parisi maka saga guru apanday ma saraˈ agama, mbal bilahi pinandi taubat eˈ si Yahiya sabab sinulak eˈ sigām ya pamatˈnnaˈ Tuhan ma sigām. 31 Amissala giˈ si Isa, yukna, "Ai pamaralilanku saga aˈa ahil jaman itu? Ai pamasaliˈan sigām? 32 Saliˈ sigām hantang ondeˈ-ondeˈ magtingkōˈan ma halaman tabuˈ magpangongkaˈ. Angalingan saga ondeˈ min dambilaˈ ni kaseheˈan sigām, yuk-i, 'Oy! Kaˈam ilu! Bay kami angalisagan kaˈam sagōˈ halam kam magpangigal! Bay kami magsindilan sagōˈ halam kam ameyaˈ magtangis.' 33 Kaˈam ilu saliˈ sapantun ondeˈ mbal tasulut. Bay piˈitu si Yahiya Magpapandi, aˈa magpupuwasa maka mbal anginum inuman makalango. Jari pahˈllinganbi iya in iya konoˈ sinōd saitan. 34 Puwas eˈ aku, Anak Manusiyaˈ, bay piˈitu amangan maka anginum. Magtūy aku pahˈllinganbi. Yukbi, 'He! Ndaˈunbi aˈa itu, dahagaˈ! Panginginum! Magbagay iya maka saga aˈa magaˈāˈ sukay parinta maka aˈa baldusa kaseheˈan.' 35 Sagōˈ," yuk si Isa, "kataˈuwanbi na min sasuku ameyaˈ ma Tuhan in pangitaˈuna taluwaˈ sadja." 36 Aniyaˈ dakayuˈ aˈa Parisi bay amowa si Isa amangan ma lumaˈna. Jari pehēˈ si Isa ati aningkōˈ ma pagkakanan. 37 Na, aniyaˈ dakayuˈ dˈnda ma lahat inān alaˈat asal hinangna. Makataˈu paˈin iya in si Isa inaˈan amangan ma lumaˈ Parisi, pinaˈan iya amowa bingkiˈ-bingkiˈ bay nihinang min batu poteˈ, isihan nsˈllan pahamut. 38 Pinaˈan iya anˈngge min bukutan si Isa, ma tongod tapeˈna. Anangis na paˈin iya sampay abaseˈ na tapeˈ si Isa eˈ boheˈ matana. Sinapuhan eˈna maka buˈunna, siniyum isab eˈna tapeˈ si Isa boˈ yampa binuˈusan eˈna maka nsˈllan pahamut eˈ. 39 Taˈndaˈ paˈin itu eˈ Parisi ya bay amowa si Isa amangan, yukna ma deyom atayna, "Bang si Isa itu nabi toˈongan bay du kataˈuwanna bang sai dˈnda ya angˈntanan tapeˈna itu. Bay kataˈuwanna in dˈnda itu asal dusahan." 40 Sinambungan iya eˈ si Isa. "Simun," yukna, "aniyaˈ pahˈllingku ni kaˈa." "Ahoˈ, Tuwan Guru, pahˈllingun konoˈ," yuk si Simun. 41 Amissala si Isa, yukna, "Aniyaˈ duwangan aˈa taga-utang saliˈ-saliˈ ma aˈa pangutangan. Dangan inān taga-utang lima hatus pilak, dangan taga-utang limampūˈ. 42 Saliˈ-saliˈ sigām mbal makabayad angkan pinapasan utang sigām eˈ aˈa bay pangutangan heˈ. Na," yuk si Isa ma si Simun, "bang ma kaˈa, ingga ma aˈa duwangan eˈ ya aheya lasana ma aˈa bay pangutangan sigām?" 43 Anambung si Simun, yukna, "Bang ma aku, ya aˈa bay pinapasan utang aheya." "Tauwaˈ sambungnu ilu," yuk si Isa. 44 Jari niharap dˈnda eˈ si Isa ati ahˈlling iya ni si Simun, yukna, "Taˈndaˈnu dˈnda itu? Makasōd paˈin aku ni lumaˈnu insiniˈ, halam aku bay sakapannu boheˈ pangoseˈ tapeˈku. Sagōˈ dˈnda itu bay angoseˈan tapeˈku maka boheˈ matana, ati sapuhanna maka buˈunna. 45 Halam aku bay siyumnu, sagōˈ dˈnda itu, sangay min kapiˈituku, halam bay pahali aniyum tapeˈku. 46 Halam bay nsˈllanannu kōkku pagaddatnu ma aku, sagōˈ dˈnda itu bay amuˈusan nsˈllan ahalgaˈ ma tapeˈku. 47 Angkan buwattitu pangahakaku ma kaˈa, aheya lasa dˈnda itu ma aku sabab taˈampun dusana aheka. Bang aˈa akulang dusana niampun, kulang du isab lasana." 48 Jari ahˈlling si Isa ni dˈnda, yukna, "Niampun na paldusahannu." 49 Minnēˈ saga seheˈ si Isa magsalu inān anagnaˈ magtilaw-tilawan di-sigām, yuk-i, "Sai bahāˈ aˈa itu angampun saga dusa?" 50 Sagōˈ ahˈlling si Isa ni dˈnda inān, yukna, "Apuwas du ka min mulkaˈ Tuhan ma sabab pangandolnu ma aku. Palanjal na ka ma halam aniyaˈ kasusahannu."
