1 Ma dakayuˈ llaw Sabtuˈ, inaˈan disi Isa lumˈngngan labay min tˈngngaˈ huma pananoman pai-tirigu. Aniyaˈ batang pai kinˈttuˈ eˈ saga mulidna eˈ, pinisi-pisi eˈ sigām boˈ yampa niˈintaˈ. 2 Na, aniyaˈ saga Parisi atilaw ma si Isa, yuk-i, "Angay langgalbi saraˈ agamatam?" 3 Anambung si Isa, yukna, "Angay, halam tabassabi bahāˈ pasal bay tahinang eˈ si Daˈud ma masa awal eˈ, waktu bay kaotas sigām maka saga aˈana? 4 Bay pasōd si Daˈud ni deyom lumaˈ pangarapan ni Tuhan boˈ ningāˈ eˈna saga tinapay ya panukbal ni Tuhan. Jari kinakan eˈna minsan mbal wajib kinakan eˈ saddī min saga kaimaman. Bay pamuwanna isab ni saga seheˈna pagkakan sigām. Sagōˈ halam aniyaˈ dusana maghinang buwattēˈ." 5 Yuk si Isa isab, "Aku itu, Anak Manusiyaˈ, taga-kapatut magbayaˈ ma llaw Sabtuˈ." 6 Ma llaw Sabtuˈ dakayuˈ, pasōd si Isa ni deyom langgal boˈ amanduˈ. Pasaltaˈ, aniyaˈ ma deyom langgal inān aˈa pakongkong tanganna kowan. 7 Aniyaˈ isab mainaˈan saga guru saraˈ agama maka saga Parisi amiha pagsababan panuntut sigām ma si Isa. Angkan iya pineyanan eˈ sigām bang kalu amauliˈ saki ma llaw paghali. 8 Sagōˈ kinataˈuwan eˈ si Isa bang ai pinikil eˈ sigām, ati ahˈlling iya ni aˈa pakongkong tanganna inān. "Piˈitu ka," yukna. "Anˈngge ka ma tˈngngaˈ itu." Sakali pabuhat aˈa inān anˈngge. 9 Puwas eˈ ahˈlling si Isa ni saga aˈa inān, yukna, "Aniyaˈ tilawku ni kaˈam. Bang ma saraˈtam, ai ya apatut nihinang ma llaw paghali? Hinang makahāp ka atawa hinang makalaˈat? Amakallum aˈa ka, atawa amapatay?" 10 Pinatongan eˈ si Isa saga aˈa inān kamemon boˈ yampa ahˈlling ni aˈa pakongkong tanganna. "Pahˈnnatun tangannu ilu," yukna. Na, pinahˈnnat eˈna, manjari kauliˈan na toˈongan. 11 Sagōˈ akagit toˈongan atay saga Parisi maka saga guru inān, angkan sigām magisun-isun bang inay sigām si Isa. 12 Na, ma waktu inaˈan patukad si Isa ni būd angarap ni Tuhan. Mainaˈan iya angamuˈ-ngamuˈ ni Tuhan animpus sangom. 13 Pagkˈllat llaw, nilinganan eˈna saga mulidna pinaˈan ni iya. Pineneˈ eˈna min sigām sangpūˈ maka duwa aˈa ati ōnanna sigām aˈana kawakilan. 14 Ya na itu ōn saga aˈa bay kawakilan inān: si Simun ya ōnanna isab Petros, maka si Andariyas danakan si Simun, boˈ si Yakub maka si Yahiya, si Pilip maka si Bartolome. 15 Pasunuˈ si Matiyu maka si Tomas, boˈ si Yakub anak si Alpa, maka si Simun ya niōnan eˈ sigām Pangangatu, 16 boˈ si Judas anak si Yakub, maka si Judas Iskariyut ya anōngan si Isa ni saga bantana ma waktu damuli minnēˈ. 17 Manjari puwas inaˈan, palūd si Isa maka saga aˈa kawakilanna, ati anˈngge iya ma lugal apantay. Aheka saga mulid bay mainaˈan maka landuˈ aheka aˈa kaseheˈan, aˈa min lahat Yahudiya, min daˈira Awrusalam, maka min Tira maka Sidun ya ma bihing tahik. 18 Bay sigām pinaˈan boˈ akale ma panduˈ si Isa. Bilahi isab kauliˈan saga saki sigām. Sasuku isab sigām sinasat eˈ saitan bay kauliˈan. 19 Ati baˈanan aˈa inān kamemon bay pasulay amaˈabut tangan sigām ni iya sabab aniyaˈ barakat paluwas min baranna, ya angkan sigām kauliˈan kamemon. 20 Manjari pinatongan eˈ si Isa saga mulidna boˈ yampa ahˈlling, yukna, "Aheya kahāpan sasuku kam halam aniyaˈ kaniyaˈbi ma dunya itu, sabab tantu du aniyaˈ palsukuˈanbi ma deyom pagparintahan Tuhan. 21 Aheya kahāpan sasuku kam kasigpitan ma buwattinaˈan, sabab magˈssohan du kam ma sinosōng. Aheya kahāpan sasuku kam magtangis ma buwattinaˈan, sabab magtittowa du kam ma sinosōng. 22 Aheya kahāpan ma kaˈam abila kam kinabˈnsihan eˈ aˈa, bang kam mbal tinaimaˈ eˈ sigām, bang kam nihalipulu maka pinamūng-mūngan alaˈat ma sabab pameyaˈbi ma aku, Anak Manusiyaˈ. 23 "Buwattēˈ isab bay hinang kamattoˈahan sigām ma saga kanabi-nabihan. Angkan kam subay magkalasigan maka magkōg-koyag bang kam nilaˈat buwattēˈ sabab tantu aheya tungbasbi ma deyom sulgaˈ. 24 Sagōˈ makaˈaseˈ-aseˈ kaˈam saga dayahan ma buwattinaˈan, sabab tasambutbi kahāpanbi ma dunya itu sadja. 25 Makaˈaseˈ-aseˈ isab kaˈam ya magˈssohan ma buwattinaˈan, sabab aniyaˈ waktu ma sinosōng lingantu du kam. Makaˈaseˈ-aseˈ isab kaˈam magtittowa ilu, sabab aniyaˈ waktu ma sinosōng magkasusahan kam maka magkarukkaˈan. 26 Makaˈaseˈ-aseˈ kaˈam bang kam sinanglitan eˈ aˈa kamemon, sabab ya du saga aˈa maglaku-laku in sigām nabi. Bay du isab sigām sinanglitan eˈ kaˈmboˈ-mboˈanbi." 27 Amanduˈ giˈ si Isa, yukna, "Ya na itu pahˈllingku ma kaˈam sasuku kam akale ma aku, kalasahinbi bantabi. Hinangunbi ahāp ma saga aˈa abˈnsihan kaˈam. 28 Amuˈ-amuˈinbi kahāpan min Tuhan sasuku anuknaˈan kaˈam. Sambahayanginbi sasuku angalaˈat kaˈam. 29 Abila aniyaˈ anampak kaˈa ma baihuˈnu dambilaˈ, patampalun isab dambilaˈ panampakanna. Abila aniyaˈ angagaw badjuˈnu, pangahilasun sampay kamisitanu. 30 Sai-sai angamuˈ ni kaˈa, buwanin. Maka bang aniyaˈ gantaˈ angāˈ palsukuˈannu daˈa na paˈndeˈin pabalik. 31 Ai-ai kabayaˈanbi nihinang ma kaˈam eˈ aˈa kaseheˈan, ya na heˈ subay hinangunbi ma sigām. 32 "Bang hal aˈa alasahan kaˈam ya kalasahanbi, angay kam subay tinungbasan pahalaˈ? Sabab minsan aˈa alaˈat, alasa du ma sasuku alasahan sigām. 33 Damikiyanna, bang hal aˈa bay makatabangan kaˈam ya tabanganbi, angay kam subay binuwanan pahalaˈ? Sabab minsan aˈa alaˈat, buwattēˈ du isab addat sigām. 34 Bang ya sadja pautanganbi aˈa tantu amayad, angay kam subay aholat pinahalaˈan? Sabab minsan aˈa alaˈat amaindam du ma seheˈ sigām alaˈat, bang paˈin tantu binayaran. 35 Sagōˈ ya na itu pamanduˈku ma kaˈam," yuk si Isa. "Kalasahinbi bantabi maka tabanginbi sigām. Bang aniyaˈ angutang ni kaˈam, pautanginbi minsan halam aniyaˈ bayad niholat. Jari aheya pahalaˈ panungbas kaˈam ati manjari na kam anak Tuhan Mahatinggi. Sabab ahāp kajarihan Tuhan minsan ma saga aˈa alaˈat, minsan ma aˈa mbal magsukul. 36 Subay kam maˈaseˈ, buwat kaˈaseˈ Mmaˈbi Tuhan." 37 "Daˈa sāˈunbi pagkahibi boˈ kam mbal sināˈ eˈ Tuhan. Daˈa patˈkkahunbi dusa ni aˈa kaseheˈan boˈ kam mbal pinatˈkkahan dusa eˈ Tuhan. Ampununbi pagkahibi boˈ kam niampun isab eˈ Tuhan. 38 Amuwan kam ma kaseheˈanbi ati aniyaˈ pamuwan kaˈam eˈ Tuhan. Ya sapantun tˈppongan aheya bang tinumpahan ni deyom pangisihanbi. Minsan nirasok, minsan pinaponod, mbal paisi sabab hekana. Hatina ai-ai panˈppongbi ma seheˈbi ya du isab panˈppong Tuhan ma kaˈam." 39 Binissala eˈ si Isa dakayuˈ kissa pamaralil. Yukna ma saga aˈa, "Bang buta angambit seheˈna buta, tantu sigā karuwangan ahūg ni deyom lowang. 40 Halam aniyaˈ mulid palanga min guruna. Sagōˈ in mulid kamemon, bang atammat na pangadjiˈna, magsaliˈ du maka guruna. 41 "Kaˈam magsoway seheˈbi ilu, angay taˈndaˈbi bukbuk kayu ma deyom mata seheˈbi ati mbal tananambi batang kayu ya ma matabi? 42 Mamarahi pahāp kaˈam ilu! Yukbi ma seheˈbi, 'Tabiyaˈ, laˈananta bukbuk min matanu ilu,' boˈ paˈin halam tananambi batang kayu ya ma matabi! Maglaku-laku kam in kaˈam ilu halam taga-sāˈ! Laˈaninbi giˈ dahū ya batang kayu ma matabi, manjari asawa pangˈndaˈbi ati makalaˈanan kam bukbuk kayu min mata seheˈbi." 43 Ahˈlling giˈ si Isa, yukna, "Bang saupama kayu ahāp, mbal amuwan buwaˈ alaˈat. Damikiyanna isab bang kayu alaˈat suligna, mbal amuwan buwaˈ ahāp. 44 Kinataˈuwan asal kayu min buwaˈna. Mbal kita angāˈ buwaˈ igira min puhung atawa buwaˈ anggul min sampinit. 45 Buwattēˈ du isab ma manusiyaˈ, saliˈ dalil kayu. Bang aˈa ahāp addatna makapaluwas iya bissala ahāp ma sabab kahāpan ya bay tauˈna ma deyom atayna. Sagōˈ bang aˈa alaˈat, luwal kalaˈatan ya pinaluwas eˈna sabab alaˈat ya tatauˈna ma deyom atayna. Ai-ai ma deyom atay manusiyaˈ, ya na heˈ paluwas min bowaˈna." 46 "Angay yukbi in aku Panghūˈbi, boˈ paˈin mbal hinangbi panohoˈanku ma kaˈam? 47 Sasuku piˈitu ni aku boˈ akale ma panduˈku sampay ameyaˈ, pahatita kam bang buwattingga kahālanna. 48 Aˈa inān saliˈ hantang aˈa maghinang lumaˈ. Niosolan hāgna ma diyataˈ batu. Aubus paˈin nihinang, angandunuk kasapaˈan ati sinampoyakan lumaˈ inān sagōˈ mbal tajogjog sabab ahogot asal osolanna. 49 Bang aˈa isab akale ma panduˈku boˈ mbal ameyaˈ, ya dalilna aˈa maghinang lumaˈ ma halam ahogot paosolanna. Bang lumaˈ inaˈan-i taluwaˈ dunuk ahˈbbaˈ magtūy, abulangkayat toˈongan."
