1 Pagkˈllat llaw Ahad boˈ subu-subu toˈongan, pehēˈ saga dˈnda heˈ ni kubul amowa saga laksiˈ bay sakap sigām. 2 Pagtˈkka pehēˈ, taˈndaˈ eˈ sigām taplok batu waˈi bay ginulungan min lowang kubul. 3 Pasōd sigām ni deyom sagōˈ taˈndaˈ in mayat si Isa halam na mainaˈan, 4 ati asasaw pikilan sigām ma sabab inaˈan-i. Sakali aniyaˈ anˈngge ma bihing sigām duwangan lˈlla, makasilaw sidda sˈmmek sigā. 5 Sinōd tāw saga dˈnda inaˈan, angkan sigām hal patondok. Sagōˈ yuk duwangan lˈlla inān, "Angay pihabi aˈa allum maitu ma deyom kakubulan saga aˈa magpatayan? 6 Halam na maitu si Isa. Allum na iya pabalik. Entomunbi bay pahˈllingna ma kaˈam, waktu kamaheˈna lagiˈ ma lahat Jalil. 7 Yukna heˈ, 'In aku, Anak Manusiyaˈ, sinōngan du pehēˈ ni pangˈntanan saga aˈa dusahan boˈ nilansang eˈ sigām ni hāg pinapatay. Ma katˈllu llawna, allum du aku pabīng.' " 8 Jari taentom eˈ saga dˈnda itu bay pahˈlling si Isa heˈ, 9 ati amoleˈ sigām min kubul ni lumaˈ. Nihaka eˈ sigām saga pakaradjaˈan itu kamemon ma saga mulid si Isa kasangpūˈ maka ssa, maka ma saga mulidna kaseheˈ. 10 Ya dˈnda angahaka itu si Mariyam aˈa min Magdala, maka si Joanna, maka si Mariyam inaˈ si Yakub, maka saga dˈnda saddī bay seheˈ sigām. 11 Sagōˈ mbal amˈnnal saga aˈa kawakilan ma haka saga dˈnda inān sabab kinabāˈ hal magligaw. 12 Sagōˈ anˈngge si Petros min baina boˈ paragan ni kubul. Pagtˈkkana pehēˈ, pakuruˈ iya pasīb, sagōˈ halam aniyaˈ taˈndaˈna ma deyom, luwal saga saput patˈnnaˈan di-na. Jari alaˈan iya minnēˈ maka eˈna ainu-inu ma bay paniyaˈ inān. 13 Ma llaw inaˈan-i aniyaˈ duwangan mulid si Isa palˈngngan tudju ni kalumaˈan Emmaus, lawakna saga sangpūˈ maka dda kilometro (atawa batu) min Awrusalam. 14 Magsuli-suli na paˈin sigā pasal kamemon ya bahaˈu bay patˈkka inān. 15 Hinabu paˈin sigā magsuli-suli, pasekot pinaˈan si Isa boˈ magdongan maka sigā. 16 Taˈndaˈ iya eˈ sigā sagōˈ halam takilā in iya si Isa. 17 Yukna ma sigā, "Ai pagsuli-sulihanbi ma palˈngngananbi ilu?" Pahoggaˈ sigā magtūy, maka alaˈat pamaihuˈan sigā sabab asusa. 18 Jari anambung dangan inān, ya niōnan Kleyopas. "Alō!" yukna, "Hal du kaˈa ma deyom daˈira Awrusalam aˈawam pasal pakaradjaˈan ya bahaˈu bay patˈkka mainaˈan siˈ, sabab kinataˈuwan na eˈ aˈa kamemon!" 19 "Angay? Pakaradjaˈan ai?" yuk si Isa. "Ya tahinang ma si Isa, aˈa Nasaret," yuk sigā. "Nabi asal iya, taga-kawasa ma pamissalana kamemon maka ma kahinanganna kamemon ma pangˈndaˈ Tuhan maka ma pangˈndaˈ manusiyaˈ. 20 Bay iya niˈndeˈan ni gubnul eˈ saga kaimaman kami alanga maka eˈ saga aˈa pagnakuraˈan kami. Niˈndeˈan iya pehēˈ supaya pinatˈnnaˈan hukuman ni kamatay, ati nilansang iya ni hāg boˈ pinapatay. 21 Na, bay kami angasa-ngasa toˈongan in iya itu dakayuˈ-kayuˈ pinabeyaˈ eˈ Tuhan amaluwas kami saga tubuˈ si Israˈil min kasigpitan. Saguwāˈ halam dapat, sabab aniyaˈ na tˈllumbahangi min bay kapamapatay sigām ma iya. 22 Lāgi, aniyaˈ isab saga dˈnda seheˈ kami bay amowahan kami haka makakuddat insiniˈ. Daiˈ llaw sīˈ bay sigām pehēˈ konoˈ paluˈaw ni kubul si Isa, 23 sagōˈ halam na mainaˈan mayatna. Jari pabalik sigām ni kamainaˈanan kami. Yuk sigām aniyaˈ saga malaˈikat bay magpanyataˈ ni sigām. Bay ahˈlling konoˈ malaˈikat eˈ in si Isa allum na. 24 Sakali aniyaˈ saga seheˈ kami bay anganyataˈ pehēˈ ni kubul ati taˈndaˈ eˈ sigām buwat bay pangahaka saga karˈndahan eˈ. Sagōˈ halam taˈndaˈ si Isa." 25 Manjari ahˈlling si Isa ni duwangan itu, yukna, "Ndūˈ, babbal pahāp kaˈam ilu! Angay halam kahagadbi kamemon bay pangabtang eˈ kanabi-nabihan? 26 Sabab bang ma sigām in Al-Masi wajib subay makalabay kabinasahan dahū boˈ yampa pinabangsa." 27 Jari pinahati duwangan itu eˈ si Isa pasal kamemon ya tasulat ma deyom Kitab ma sababna. Tinagnaˈan eˈna min kasulatan si Musa, sampay ni kasulatan kanabi-nabihan kamemon. 28 Makasekot paˈin sigā ni kalumaˈan ya papeheˈan sigā, magbauˈ-bauˈ si Isa palanjal giˈ. 29 Mandaˈ iya tinaggahan eˈ sigā, yuk-i, "Piˈitu na ka ameyaˈ ma kami sabab kohap na toˈongan. Sōng na sangom." Angkan pasōd si Isa boˈ pahantiˈ ma sigā. 30 Makatingkōˈ paˈin sigām magsalu, niāˈ eˈna tinapay ati niamuˈan pagsukulan ni Tuhan. Puwas eˈ pinagpōng-pōng eˈna boˈ yampa pamuwanna ma sigā. 31 Minnēˈ pasawa pangˈndaˈ sigā ati takilā iya. Sagōˈ alanyap iya magtūy. 32 Jari magsuli-suli sigā duwangan. "Angkan du kita landuˈ kahōpan ma hˈllingna ma palˈngnganan eˈ, pagpahatina ma kita pasal Kitab." 33 Pabuhat sigā magtūy boˈ pabīng ni Awrusalam. Pagtˈkka sigā pehēˈ, tabāk saga mulid si Isa kasangpūˈ maka ssa magtimuk maka mulid kaseheˈan. 34 Yuk sigām ma duwangan itu, "Allum na Panghūˈtam pabalik! Allum iya toˈongan! Bay iya patuwaˈ ni si Simun!" 35 Manjari anuli-nuli isab duwangan itu pasal bay kalabayan sigā ma lān, maka pasal pakakilā sigā ma si Isa ma saltaˈna magpōng-pōng tinapay. 36 Hinabu paˈin magsuli-suli duwangan eˈ, pinaˈan si Isa anˈngge ma tˈngngaˈ-tˈngngaˈ sigām. Ahˈlling iya, yukna, "Bang paˈin kam kaniyaˈan kasannangan." 37 Takuddat sigām magtūy maka nileyaˈ-leyaˈ toˈongan, sabab pangannal sigām in si Isa inān umagad. 38 Sagōˈ yukna ma sigām, "Angay takˈbbal deyom ataybi? Angay kam masi magduwa-ruwa? 39 Ndaˈunbi tanganku maka tapeˈku itu. Aku na koˈ itu. Ntaninbi ba baranku itu boˈ kataˈuwanbi in aku itu nggaˈi ka umagad. Sabab umagad itu halam aniyaˈ baranna aponod. Taˈndaˈbi du aku, aniyaˈ baranku." 40 Buwattēˈ pahˈllingna ma sigām. Ati paˈndaˈanna tanganna maka tapeˈna ma sigām. 41 Sagōˈ masi sigām kahunitan magkahagad in inaˈan bˈnnal, sabab mamarahi sidda kakōgan maka kainu-inuhan sigām. Angkan yuk si Isa ma sigām, "Aniyaˈ bahāˈ maitu ai-ai takakan?" 42 Sinōngan iya dangkuriˈ daing tinapa. 43 Niāˈ eˈna ati kinakan eˈna ma pangˈndaˈ sigām. 44 Puwas eˈ ahˈlling iya, yukna, "Ya na koˈ itu bay pahˈllingku ma kaˈam tagnaˈ, waktu kapameyaˈku giˈ ma kaˈam. Yukku tantu aniyaˈ kamaujuran ma kamemon bay tasulat ma pasal aku, ya tasulat ma Kitab Tawrat maka ma Kanabi-nabihan, maka ma Jūd Kalangan. Ai-ai patˈkka itu ma aku, ya na kamaujuran saga sulat sigām." 45 Manjari pinasawa eˈ si Isa pikilan sigām boˈ supaya makahati ma lapal Kitab eˈ. 46 Yukna ma sigām, "Ya na itu asal tasulat ma deyom Kitab: in Al-Masi subay pinananaman kabinasahan sampay pinapatay. Jari taˈabut paˈin katˈllu llaw min kamatayna allum du iya pabīng. 47 Subay pinagnasihatan isab saga bangsa kamemon pasal kaˈampunan dusa. Bang sigām magtaubat sampay angˈbbahan dusa sigām, niampun sigām eˈ Tuhan ma sabab Al-Masi. Subay tinagnaˈan pagnasihat itu min Awrusalam. 48 Kaˈam ya bay makaˈndaˈ ma ai-ai patˈkka ma aku, jari kaˈam ya subay amuwan saksiˈ. 49 Pabeyaˈanku kaˈam ya bay panganjanjiˈ Mmaˈku Tuhan. Sagōˈ daˈa kam alaˈan min daˈira itu satˈggol kam halam pinahōpan kawasa min sulgaˈ." 50 Jari binowa sigām eˈ si Isa paluwas min Awrusalam sampay makaˈabut na ni kauman Betani. Pagabut sigām pinaˈan, pinatˈngge eˈ si Isa tanganna pangamuˈna kahāpan ma sigām. 51 Pasaltaˈ paˈin iya angamuˈ-ngamuˈ ni Tuhan, alaˈan iya min sigām ati tabowa paˈangkat ni sulgaˈ. 52 Amudji sigām ma iya mainaˈan boˈ yampa pabīng tudju ni Awrusalam. Landuˈ aheya kakōgan sigām, 53 ati mainaˈan na paˈin sigām ananglitan Tuhan ma langgal pagkulbanan. Tammat
