1 Aheka aˈa bay makatawakkal anulat pasal kamemon bay tahinang ma deyoman kami. 2 Ya tasulat eˈ sigām ai-ai bay pangˈbba ma kami eˈ saga aˈa bay makaˈndaˈ kahinangan si Isa sangay min katagnaˈ. Sigām isab ya magnasihat palman Tuhan. 3 Na, tuwan Teyopilus, pagka tapariksaˈku pahāp kamemon bay tahinang itu sangay min katagnaˈna, tapikilku in aku taga-kapatut anulatan kaˈa. Usulku saga pakaradjaˈan itu kamemon min katagnaˈ sampay ni katapusan 4 boˈ supaya ka manantuhi pasal ai-ai bay pamanduˈ kaˈa. 5 Buwattitu ya tagnaˈanna: ma timpu lagiˈ bay pagsultan sultan Herod ma lahat Yahudiya aniyaˈ imam niōnan si Jakariya. Dakayuˈ imam iya ma tumpukan pagimam si Abiya. Ya du hˈndana si Elesabet, min panubuˈ kaimaman isab sabab tubuˈ min si Harun. 6 Abontol sadja sigā duwangan ma pangˈndaˈ Tuhan. Binogbogan eˈ sigā usulanna maka panohoˈanna kamemon ma halam aniyaˈ sāˈna. 7 Sagōˈ halam sigā taga-anak sabab mbal makaˈanak si Elesabet, maka atoˈa na sigā. 8 Jari itu aniyaˈ dakayuˈ llaw paghinang si Jakariya maka umpiganna ma langgal pagkulbanan, boˈ taˈabut na waktu kapagimamna. 9 Ya addat kaimaman subay magkoˈot-koˈot boˈ tataˈu bang sai pineneˈ pasōd ni deyom langgal pangarapan ni Panghūˈ boˈ anugtug kamanyan. Jari si Jakariya ya tapeneˈ. 10 Taˈabut paˈin waktu pagtugtug kamanyan, anambahayang na saga aˈa ya magtimuk ma halaman langgal eˈ. 11 Jari aniyaˈ malaˈikat min Tuhan panyataˈ ni si Jakariya, inaˈan anˈngge ma bihing panugtugan kamanyan, tampal ni kowan. 12 Pagˈndaˈ si Jakariya ma malaˈikat itu, magtūy iya takuddat maka sinōd tāw. 13 Saguwāˈ ahˈlling malaˈikat ni iya, yukna, "Daˈa ka tināw, Jakariya, sabab takale eˈ Tuhan ya bay amuˈnu ilu. Hˈndanu si Elesabet anganak du lˈlla, ati Yahiya ya pangōnbi iya. 14 Aheya kalasiganbi ma sababna, magkōg-koyag kam maka aheka isab aˈa kaseheˈan palamud ma kalasiganbi bang iya nianakan na. 15 Bangsahan iya ma pangˈndaˈ Tuhan. Mbal iya anginum binu atawa ai-ai makalango. Kahōpan iya eˈ Rū Sussi tinagnaˈan min llaw kapanganak ma iya. 16 Aheka isab aˈa Israˈil tabowana magtaˈat pabīng ni Tuhan ya pagpanghūˈan sigām. 17 Parahū iya min Panghūˈ pagka kapagagihan eˈ Rū Sussi maka pinasukuˈan kawasa buwat bay kahālan nabi Elija masa awal eˈ. Pinapaghāp eˈna mattoˈa maka anak bay magsaggaˈ. Pinapinda eˈna pikilan saga aˈa ya bay amabiyal ma panohoˈan Tuhan, tabowa sigām amikilan pangitaˈu ya sukuˈ ma aˈa aˈadil. Tinagamahan eˈna saga aˈa boˈ aniyaˈ bangsa sakap anambut Panghūˈ sigām." 18 Atilaw si Jakariya ma malaˈikat, yukna, "Buwattingga kataˈuku in bissalanu ilu bˈnnal? Atoˈa na aku maka atoˈa isab hˈndaku." 19 Ya sambung malaˈikat, "Aku itu si Jibraˈil, ya patˈnnaˈ na paˈin ma haddarat Tuhan. Bay aku sohoˈna piˈitu amissalahan kaˈa boˈ takalenu lapal ahāp itu. 20 Sagōˈ aumaw du ka pagka halam tabˈnnalnu bissalaku, boˈ paˈin tatuman kamemon bang taˈabut waktuna. Jari mbal ka makapahˈlling min llaw itu sampay patˈkka ya bay pangahakaku ma kaˈa. Angkan buwattēˈ, sabab halam bˈnnalnu lapalku ma kaˈa, ya lapal tantu atuman bang taˈabut waktuna." 21 Pasaltaˈ, nilagaran si Jakariya eˈ saga aˈa ma halaman langgal eˈ. Ainu-inu sigām bang ai katˈggolanna ma deyom langgal. 22 Taˈabut paˈin iya paluwas, mbal na makapahˈlling ma sigām, angkan kinataˈuwan eˈ sigām aniyaˈ bay panyataˈ ni iya hinabuna ma deyom langgal. Aninyal sadja iya ma sigām sabab mbal makapaluwas bissala. 23 Manjari, aubus paˈin waktu paghinangna ma deyom langgal eˈ, magtūy iya amoleˈ ni lahatna. 24 Palabay paˈin daka pilangˈllaw, abˈttong na hˈndana si Elesabet ati limambulan ya tˈggolna mbal makapagluwas-luwas min lumaˈ. 25 Yukna, "Ahāp tabang Tuhan ma aku. Karūlan aku eˈna maka kalaˈanan kaiyaˈanku ma deyoman lūng-kampungku." 26 Taˈabut paˈin nnom bulan kabˈttong si Elesabet, pinabeyaˈ eˈ Tuhan malaˈikatna si Jibraˈil pehēˈ ni kauman Nasaret ya ma lahat Jalil. 27 Sinōˈ iya panyataˈ ni dakayuˈ budjang ōnna si Mariyam, ya magtunang asal maka si Yusup, dakayuˈ panubuˈ sultan Daˈud. 28 Yuk malaˈikat itu ni si Mariyam, "Bang paˈin ka asalamat. Aheya kahāpan Tuhan ma kaˈa, Mariyam. Ilu Tuhan pataptap ma kaˈa." 29 Sagōˈ pagkale paˈin itu eˈ si Mariyam asasaw pikilanna. Kinira-kira eˈna bang ai hatina angkan iya binissalahan buwattēˈ. 30 Manjari ahˈlling giˈ malaˈikat ni iya, yukna, "Daˈa ka agawa, Mariyam, sabab kasulutan Tuhan ma kaˈa. 31 Pakale ka. Sōng ka abˈttong. Anganak ka lˈlla ati Isa ya pangōnnu iya. 32 Bangsahan toˈongan iya, pinagōnan iya Anak Tuhan Mahatinggi. Pinatˈnnaˈ iya magsultan eˈ Panghūˈ Tuhan, buwat bay kapagsultan mboˈna si Daˈud ma masa awal eˈ. 33 Ati magsultan iya ma bangsa Israˈil, ya panubuˈ si Yakub, sampay ni kasaumulan. Halam aniyaˈ katobtoban pagsultanna." 34 Yuk si Mariyam ni malaˈikat, "Buwattingga kapaniyaˈ ya yuknu ilu, pagka aku itu budjang masi?" 35 Ya sambung malaˈikat, "Pahōp du ni kaˈa Rū Sussi maka kalandungan ka eˈ barakat Tuhan Mahatinggi. Angkan asussi ya nianakan eˈnu ati ginˈllal iya Anak Tuhan. 36 Sampay kampungnu isab si Elesabet, song anganak minsan atoˈa na. Nnom bulan ya kabˈttongna minsan iya bay pinagbahasa dˈnda mbal makaˈanak. 37 Sabab halam aniyaˈ ahunit ma Tuhan," yuk malaˈikat eˈ. 38 Jari ahˈlling si Mariyam, yukna, "Aku itu sosohoˈan Tuhan. Maglillaˈ aku ma pahˈllingnu ilu." Magtūy alanyap malaˈikat. 39 Na, mbal atˈggol minnēˈ, magsakap si Mariyam boˈ paraiˈ-daiˈ pehēˈ ni dakayuˈ kauman ma kabūd-būran ma lahat Yahudiya. 40 Atˈkka paˈin iya pehēˈ, pasōd iya ni lumaˈ disi Jakariya boˈ magaddatan kampungna si Elesabet. 41 Takale paˈin eˈ si Elesabet bissala si Mariyam, magtūy maghibal ondeˈ ma deyom bˈttongna. Kahōpan iya eˈ Rū Sussi, 42 ati amissala iya patanog ma si Mariyam, yukna, "Kaˈa ilu kabuwanan kahāpan eˈ Tuhan labi min dˈnda kamemon. Damikiyanna isab ondeˈ ya song nianakan eˈnu, ballabihan kahāpan ya pamuwan Tuhan ma iya. 43 Angay aku subay pinaheya eˈ inaˈ Panghūˈku, ya poˈon ka anibaw aku? 44 Pagkaleku ma bissalanu insiniˈ magtūy maghibal ondeˈ ya ma deyom bˈttongku itu, kabowa kakōranna. 45 Aheya kalasigan ma dˈnda ya makapamˈnnal in lapal Tuhan ma iya tatuman du!" 46 Manjari ahˈlling si Mariyam, yukna, "Sanglitanku Tuhan sampay min deyom atayku. 47 Magkōg-koyag aku ma Tuhan ya angalappas ma aku. 48 Atana aku, ati pinagkaˈinagonan aku eˈna minsan areyoˈ kapagaˈaku. Puwas minnitu, sinuli-suli aku eˈ aˈa kamemon magsuring-magsaingsing, in aku dˈnda pinasukuˈan kahāpan, 49 sabab makainu-inu kahinangan Tuhan Patikawasa ya panabangna ma aku. Mahasussi asal iya. 50 Maˈaseˈ iya ma aˈa kamemon magtubuˈ-manubuˈ, sasuku magmahaltabatan iya. 51 Pinaˈndaˈan eˈna kawasana labay min kahinanganna, pinagkaukanat eˈna saga aˈa ya magabbu-abbu ma deyom pangatayan. 52 Nilaˈanan eˈna saga sultan min pagsultanan sigām, pinabangsa eˈna saga aˈa areyoˈ-deyoˈ. 53 Saga aˈa atiksaˈ binuwanan eˈna lidjikiˈ aheka, maka aˈa dayahan pinalaˈan eˈna ma halam aniyaˈ tabowa sigām. 54 Tinabang eˈ Tuhan sosohoˈanna bangsa Israˈil, kaˈaseˈanna sigām buwat bay panganjanjiˈna 55 ma si Ibrahim maka saga panubuˈna sampay ni kasaumulan, tatuman isab bay pangallam Tuhan ma kamattoˈahan." 56 Na, kulang-labi tˈllumbulan ya katˈnnaˈ si Mariyam ma si Elesabet boˈ yampa amoleˈ. 57 Taˈabut paˈin llaw panganak si Elesabet, lˈlla ya anakna. 58 Makakale paˈin saga lūng-kampungna maka lahasiyaˈna pasal kaheya kahāpan Tuhan ma iya, magbeyaˈ sigām maka iya magkōg-koyag. 59 Na, pagka walungˈllaw na ondeˈ ma luwasan, waktu pangislam ma iya, patimuk pehēˈ baˈanan kaukampung. Arak iya niōnan Jakariya buwat ōn mmaˈna, 60 sagōˈ mbal si Elesabet. Yukna, "Daˈa. Subay iya niōnan Yahiya." 61 "Angay?" yuk sigām. "Halam aniyaˈ min kahekanu niōnan Yahiya." 62 Manjari aninyal sigām ni mmaˈ ondeˈ boˈ kinataˈuwan bang ai kabayaˈanna. 63 Aninyal isab si Jakariya angamuˈ panulatan ati anulat buwattitu: "Ōnna Yahiya!" Ainu-inu makalanduˈ saga aˈa inān kamemon. 64 Saruˈun-duˈun du makabissala si Jakariya pabīng maka sinanglitan eˈna Tuhan. 65 Sinōd tāw saga lūng-kampung disi Jakariya, maka habal pasal bay tahinang inān pasaplag na paˈin ni kareya-reyahan ma lahat Yahudiya. 66 Amikil-mikil na paˈin sasuku makakale pasal pakaradjaˈan itu, yuk-i, "Ai bahāˈ panganggantaˈ Tuhan ma ondeˈ inān?" Sabab atampal in ondeˈ inān kaniyaˈan barakat min Tuhan. 67 Manjari si Jakariya, mmaˈ si Yahiya, bay kahōpan Rū Sussi ati pinaluwas eˈna lapal deyoˈ bay min Tuhan, yukna, 68 "Sanglitantam Panghūˈ, ya pagtuhanan bangsatam Israˈil, sabab piˈitu na iya anabangan kitam sukuˈna, maka angaliyusan kitam min kasigpitan. 69 Pinaniyaˈan kitam aˈa gaˈosan angalappas kitam, panubuˈ sultan Daˈud, ya bay sosohoˈan Tuhan eˈ. 70 Paljanjiˈan Tuhan koˈ itu, ya bay pangallam eˈ kanabi-nabihan sussi ma masa awal. 71 Yuk janjiˈ heˈ, in kitam pinuwasan eˈna min gaˈosan palbantahantam. maka min pangˈntanan saga aˈa abˈnsihan kitam. 72 Jari taˈndaˈ minnēˈ kaheya aseˈ Tuhan ma kaˈmboˈ-mboˈantam. Tinuman isab janjiˈ ya bay pagsulutanna maka sigām. 73 Ya na janjiˈ bay panganjanjiˈna ma si Ibrahim, pinapagtapil maka sibahatna. 74 Bay iya anibahat in kitam panubuˈ si Ibrahim pinuwasan du min pangˈntanan saga bantatam, jari makaisbat kitam ma Tuhan ma halam aniyaˈ amakitāw, 75 ma asussi pangatayantam maka abontol kahinangantam satˈggol kitam ma dunya itu." 76 Amissala lagiˈ si Jakariya ma anakna, yukna, "Kaˈa, Otoˈ, niōnan du ka nabi min Tuhan Mahatinggi. Kaˈa ya parahū min Panghūˈnu amahāp lān palabayanna. 77 Pataˈunu saga aˈana in sigām lappasan min mulkaˈ, pagka niampun dusa sigām. 78 Sabab patiaseˈun Tuhantam, alunuk pangatayanna. Angkan kitam pinabeyaˈan sawa min deyom sulgaˈ, saliˈ hantang llaw pasobang. 79 Sasuku bay kaˈddasan ma deyom kalendoman ma sabab katāw sigām ma kamatay, taluwaˈ sahaya na, ati pinanduˈan kitam lān ahāp ya amowa kita ni kasannangan." 80 Manjari anak si Jakariya inān pasulig na paˈin maka pasōng akkal-pikilanna. Patˈnnaˈ na paˈin iya ma lahat paslangan sampay taˈabut llaw katuwaˈna ni saga aˈa Israˈil.
