1 Sulat itu min aku, si Judas, dakayuˈ sosohoˈan si Isa Al-Masi, maka danakan si Yakub. Pasampayku sulat itu ni kaˈam saga aˈa tapeneˈ maka kinalasahan eˈ Tuhan, ya niokoman eˈ si Isa Al-Masi. 2 Mura-murahan, bang paˈin kam pinaniyaˈan aseˈ maka lasa ballabi-labihan, sampay kasannangan deyom atay. 3 Sagay bagayku kinalasahan, landuˈ aku bilahi anulatan kaˈam pasal kalappasan ya pagkahagarantam saliˈ-saliˈ, sagōˈ saddī ya panulatku ma kaˈam buwattinaˈan. Ya pangamay-ngamayku ma kaˈam: tˈnggehinbi panduˈ bˈnnal ya bay pangandol pinamˈntˈdda eˈ Tuhan ma saga aˈa sukuˈna. 4 Aniyaˈ saga aˈa mbal magmatāw ma Tuhan makalamud ni kaˈam ma halam kataˈuwanbi, angkan kam amay-amayanku pahāp. Pinabengkok eˈ sigām pamanduˈ pasal aseˈ maka lasa Tuhantam, boˈ aniyaˈ pangandaˈawahan sigām maghinang kalumuˈan. Tapaliluhan eˈ sigām si Isa Al-Masi, ya tunggal Panghūˈtam Sangat Kawasa. Tasulat asal ma masa awal lagiˈ pasal hukuman ya panganggantaˈ ma saga aˈa buwattēˈ. 5 Minsan kasakupanbi bay kahālan bangsa Israˈil ma masa awal, bilahi giˈ aku amaentoman kaˈam pasal waktu kabanyagaˈ sigām ma lahat Misil. Bay sigām niliyus eˈ Panghūˈ min lahat Misil sagōˈ puwas eˈ bay papatayna sasuku mbal magkahagad ma iya. 6 Entomunbi isāb pasal saga malaˈikat kaseheˈ, ya bay angaliyu-lakad min kapatutan bay panganggantaˈ Tuhan ma sigām boˈ angˈbba min patˈnnaˈan sigām luggiyaˈ. Waˈi sigām tinambolan eˈ Tuhan ma deyom kalendoman bitu-bituhan, binaggot maka kili-kili kakkal ni kasaumulan, sampay taˈabut Llaw Aheya pangahukum Tuhan ma sigām. 7 Entomunbi isāb saga aˈa bay ma daˈira Sodom maka Gomora sampay ma saga kalumaˈan ma sakalibutna. Tagihan sigām maghinang kalumuˈan maka kasabulan makatamparasa, ati pinatˈkkahan sigām api mbal magkapˈdda boˈ aniyaˈ pamintāngan ma aˈa kamemon. 8 Buwattēˈ isāb saga aˈa ma deyomanbi ilu. Anguppi na paˈin sigām ati katamakan anggautaˈ-baran sigām. Sinulak eˈ sigām kapagbayaˈ Tuhan, nilimut bangsa malaˈikat ya landuˈ asahaya. 9 Minsan si Mikaˈil, ya pagnakuraˈan saga malaˈikat, mbal makatawakkal angalimut ma nakuraˈ saitan, waktu kapaglugat sigā. Ya sadja pahˈlling si Mikaˈil, "Panghūˈ Tuhan ya amabukagan kaˈa." 10 Malaingkan maghimumūngan na paˈin saga aˈa ya sambatku ma sulat itu. Akasla pahˈlling sigām pasal ai-ai ya mbal tahati eˈ sigām. Saliˈ sigām hayop angandūlan ai-ai kanapsuhan sigām, angkan sigām kamulahan. 11 Makaˈaseˈ-aseˈ sidda saga aˈa inān sabab sinengoran eˈ sigām kajarihan si Kabil. Bineyaˈ-beyaˈ eˈ sigām kasāˈan si Balaˈam, sabab ya du sigām tabowa eˈ bahaya pilak. Anaggaˈ sigām ma Tuhan, buwat bay kapanaggaˈ disi Kora ma masa awal eˈ, ati alaglag isab sigām. 12 Saga aˈa ilu saliˈ dalil tamak ma pagjamubi, ya hinangbi tandaˈ sin paglasabi. Mbal sigām ataˈu aiyaˈ sabab halam aniyaˈ pangannal sigām saddī, luwal baran sigām. Sapantun sigām gabun mbal amuwan ulan, gabun tabowa paleyang eˈ baliyu. Sapantun isab sigām poˈon kayu mbal amuwan buwaˈ minsan musimna na, angkan binubut sampay gamutna. Jari minduwa kamatay saga aˈa inān. 13 Sapantun sigām goyak ma timpu badju. In kaiyaˈan sigām saliˈ bulaˈ-bulaˈ goyak bang amˈssaˈ. Ibarat sigām bituˈun maglensa, mbal tapamandogahan. Kalendoman bitu-bituhan ya katobtoban sigām sampay ni kasaumulan. 14 Bay angallam nabi Idris, ya panubuˈ si Adam min nnom pangkat, ma pasal aˈa buwattilu, yuk-i, "Pataˈu kam. Piˈitu du Panghūˈtam maka malaˈikatna sussi magibu-ibuhan, 15 boˈ tahukum eˈna manusiyaˈ kamemon. Pinatōngan eˈna dusa saga aˈa agagga ma iya, ma sabab kalaˈatan ya tahinang sigām luwas min kajarihan sigām alaˈat, maka ma sabab lling pangkal kamemon bay pamissala eˈ sigām ni Tuhan." 16 Magdurugal maka magsosoway saga aˈa inān. Tagihan sigām angandūlan napsu sigām alaˈat, maka magbantug-bantug di-sigām. Nilanahan eˈ sigām aˈa kaseheˈan boˈ supaya karūlan ai-ai kabayaˈan sigām. 17 Sagōˈ saddī ma kaˈam, saga bagayku. Entomunbi bay pangallam eˈ saga aˈa kawakilan eˈ Panghūˈtam si Isa Al-Masi. 18 Yuk sigām ma kaˈam, "Bang song na kahinapusan masa itu, paniyaˈ saga aˈa angudjuˈ-ngudjuˈ kaˈam, aˈa hal angandūlan napsu sigām minsan pangalāngan eˈ Tuhan." 19 Bilahi saga aˈa inān angahinang okatan ma saga jamaˈa Al-Masi. Pinagbayaˈan sigām eˈ napsu baran sigām maka halam ma sigām Rū Tuhan. 20 Saguwāˈ kaˈam, saga bagay, subay magpakosog di-bi boˈ ahogot pagkahagadbi ma panduˈ sussi ya pangandolanbi. Subay kam angamuˈ duwaˈa isab min kawasa Rū Sussi. 21 Pahogot kam ma lasa Tuhan samantalaˈ kam angalagaran si Isa Al-Masi Panghūˈtam, ya amuwanan kaˈam kallum taptap ni kasaumulan ma sabab kaˈaseˈna. 22 Maˈaseˈ kam ma saga seheˈbi ya magāng-āng angandol ma si Isa. 23 Liyusunbi saga aˈa ya song magnikalaˈatan, ibarat aˈa song ahūg ni api. Kaˈaseˈinbi pahāp saga aˈa kaseheˈan, sagōˈ tangkisinbi kalaˈatan sigām boˈ kam mbal kalaminan. Kabˈnsihinbi napsu sigām, ya saliˈ hantang lˈmmis makatupak badjuˈ. 24 Magpudji kitam ni Tuhan. Luwal iya taga-kawasa angahampanan kitam boˈ mbal tabowa maghinang dusa pabīng. Pinatampal kitam eˈna ni haddaratna asahaya ma halam aniyaˈ tamak atay. Aheya isab pagkōg-koyagtam. 25 Luwal Tuhan dakayuˈ-kayuˈ ya amuwasan kitam min hukuman dusa, angkan iya subay pudjitam labay min Panghūˈtam si Isa Al-Masi. Sabab ma iya kasanglitan, kabantugan, gaˈosan maka kawasahan, min awal tagnaˈ sampay ni kabuwattituhan, sampay ni kasaumulan. Amin. Wassalam
