1 - 4 Dakayuˈ llaw, sōng paˈin waktu paghinang Hinang Paglakad, pehēˈ si Isa ni dambilaˈ danaw Jalil (ya niōnan isab danaw Tibiri). Aheka toˈongan saga aˈa bay paturul ni iya sabab taˈndaˈ eˈ sigām hinangna kawasahan ma saga aˈa taga-saki. Manjari patukad si Isa maka saga mulidna ni bīd-bīd boˈ aningkōˈ mahēˈ. 5 Sakali pagˈndaˈ si Isa aheka toˈongan saga aˈa patudju ni iya, ahˈlling iya ma si Pilip dakayuˈ mulidna, yukna, "Maingga pamˈllihanta kinakan pamakan baˈanan aˈa itu?" 6 Angkan buwattēˈ patilaw si Isa, sabab sinulayan eˈna pangandol si Pilip. Malaingkan kinataˈuwan eˈ si Isa bang ai song hinangna. 7 Anambung si Pilip, yukna, "Minsan gadji walumbulan mbal makabˈllihan tinapay sarang pamakan saga aˈa itu, minsan hal dangkuriˈ pararangan." 8 Manjari ahˈlling giˈ dakayuˈ mulid si Isa saddī, si Andariyas danakan si Simun Petros. 9 Yukna ni si Isa, "Itiyaˈ maitu dakayuˈ ondeˈ-ondeˈ lˈlla, aniyaˈ lima tinapayna maka duwa daingna. Sagōˈ pamagayta bang hal itu pamakan baˈanan aˈa itu?" 10 Yuk si Isa, "Sōˈunbi saga aˈa ilu aningkōˈ." Aniyaˈ mainaˈan parang-parang aluha ati magtingkōˈan sigām kamemon. Aniyaˈ sigām limangibu aˈa bang lˈlla sadja niˈitung, saddī dˈnda maka ondeˈ-ondeˈ. 11 Ningāˈ eˈ si Isa tinapay heˈ. Pinagsukulan eˈna boˈ yampa pagbahagiˈna ma saga aˈa magtingkōˈan inān. Damikiyanna daing, bay binahagiˈ eˈna ma sigām pila-pila ya kabayaˈan sigām. 12 Asso paˈin sigām kamemon, ahˈlling si Isa ni saga mulidna, yukna, "Timukunbi kapinna ilu boˈ mbal kaugun." 13 Magtūy aniyaˈ sangpūˈ maka duwa ambung pinˈnnoˈan eˈ sigām maka kapin tinapay lima hekana inān. 14 Pagˈndaˈ saga aˈa ma paltandaˈan bay tahinang eˈ si Isa inān, yuk sigām, "Bˈnnal koˈ itu, ya na itu nabi asal lagarantam piˈitu ni dunya." 15 Kinataˈuwan eˈ si Isa in saga aˈa inān anganiyat anaggaw iya boˈ nilogos magsultan. Angkan iya alaˈan magtūy minnēˈ ati patukad dangan-danganna ni būd. 16 Logob-logob paˈin lahat, palūd saga mulid si Isa ni bihing danaw. 17 Pasakat sigām ni bayanan boˈ pauntas ni dambilaˈ danaw, tudju ni daˈira Kapirnaum. Sangom na, sagōˈ halam giˈ si Isa bay makaˈabut ni sigām. 18 Akosog na baliyu maka anganggoyak na tahik. 19 Makabusay paˈin sigām saga lima atawa nnom kilometro lawakna, taˈndaˈ eˈ sigām si Isa lumˈngngan min kuwit tahik, pasekot na tudju ni bayanan sigām. Jari tināw sigām toˈongan. 20 Sagōˈ ahˈlling si Isa, yukna, "Daˈa kam tināw. Aku koˈ itu." 21 Minnēˈ sigām bilahi amasakat iya ni bayanan. Pagsakatna paˈin, magtūy sigām saruˈun-duˈun atˈkka ni patudjuhan sigām. 22 Pagˈllaw dakayuˈ, inaˈan ma dambilaˈ danaw saga aˈa bay pinakan eˈ si Isa. Tataˈu asal eˈ sigām dakayuˈ du bayanan bay pameyaˈan saga mulid eˈ. Maka kinataˈuwan isab in si Isa halam bay paruwaˈ ameyaˈ ma saga mulidna. Luwal saga mulid bay pauntas parambilaˈ. 23 Jari itu aniyaˈ saga bayanan saddī bay min daˈira Tibiri parungguˈ ni kasekotan bay pagkakanan sigām tinapay, puwas bay pagsukulan eˈ Panghūˈ Isa. 24 Na, pagˈndaˈ saga aˈa itu in si Isa maka saga mulidna halam na mainaˈan, paruwaˈ sigām ni saga bayanan inān boˈ anumpang tudju ni Kapirnaum amiha si Isa. 25 Tabāk paˈin si Isa eˈ sigām ma dambilaˈ danaw, yuk sigām ni iya, "Tuwan Guru, sumiyan kapiˈitunu?" 26 Yuk sambung si Isa, "Bˈnnal ya pangahakaku itu ma kaˈam, ya angkan aku pihabi sabab asso kam eˈ tinapay. Sagōˈ halam tahatibi paltandaˈan makainu-inu ya bay tahinangku inān ma pangˈndaˈbi. 27 Daˈa pagtuyuˈinbi kinakan magkabalos. Ya pagtuyuˈanbi subay kinakan mbal magkabalos, ya makakallum saumul-umul. Aku Anak Manusiyaˈ ya amuwanan kaˈam kinakan itu sabab aniyaˈ kapatut pamuwan aku eˈ Mmaˈku Tuhan, bainat in aku makasulut atayna." 28 Manjari atilaw sigām ni si Isa, yuk-i, "Na, ai na paˈin subay hinang kami boˈ tabeyaˈ kami kabayaˈan Tuhan?" 29 Anambung si Isa, yukna, "Ya na itu kabayaˈan Tuhan subay hinangbi: subay kam angandol ma aku, ya pinapiˈitu eˈna." 30 - 31 Yuk sigām isab ni si Isa, "Paltandaˈan ai paˈndaˈannu kami supaya kami magkahagad ma kaˈa? Kaˈmboˈ-mboˈantam ma masa awal eˈ bay amangan manna mahēˈ ma lahat paslangan. Tasulat koˈ inān ma deyom Kitab, ya yuk-i, 'Bay sigām buwananna kinakan min sulgaˈ.' Jari ai hinangnu?" 32 Ya sambung si Isa ma sigām, "Bˈnnal ya pangahakaku ma kaˈam, nggaˈi ka si Musa ya bay amuwanan kinakan min sulgaˈ. Mmaˈku Tuhan ya amuwanan kaˈam kinakan bˈnnal min sulgaˈ. 33 Sabab in kinakan pamuwan eˈ Tuhan, ya na aˈa deyoˈ bay min sulgaˈ, ya amuwan kallum ma manusiyaˈ." 34 Manjari angamuˈ saga aˈa inān ni si Isa, yuk-i, "Tuwan, satˈggol kami allum buwanin kami kinakan ya pagbissalanu ilu." 35 Yuk si Isa, "Aku na koˈ kinakan makabuwan kallum. Sasuku ameyaˈ ma aku mbal lingantu pabīng. Maka sasuku angandol ma aku mbal patay boheˈ pabīng. 36 Sagōˈ bay na sa kam hakaˈanku, minsan aku taˈndaˈbi mbal du kam magkahagad. 37 Ameyaˈ du ma aku aˈa kamemon ya pamasukuˈ aku eˈ Mmaˈku, maka mbal sulakku sasuku ameyaˈ ma aku. 38 Ya angkan aku piˈitu min sulgaˈ nggaˈi ka angahinang kabayaˈan baranku, sagōˈ kabayaˈan Tuhan ya bay amapiˈitu aku. 39 Ya kabayaˈan Tuhan subay halam aniyaˈ lungayku saga aˈa bay pamasukuˈna ma aku. Gom paˈin pakallumku sigām kamemon ma llaw katapusan. 40 Sababna ya kabayaˈan Mmaˈku Tuhan ma aˈa kamemon, sasuku angˈndaˈ maka magkahagad ma Anakna, tantu sigām kaniyaˈan kallum kakkal ni kasaumulan. Pakallumku isab sigām ma llaw katapusan." 41 Sakali itu magdugal saga nakuraˈ inān ma pasal pahˈlling si Isa heˈ, ya yuk-i, "Aku itu kinakan min sulgaˈ." 42 Yuk sigām, "Bang kitam mbal asāˈ, aˈa itu si Isa anak si Yusup! Kataˈuwanta inaˈ-mmaˈna. Jari angay iya ahˈlling buwattēˈ, in iya konoˈ min sulgaˈ?" 43 Anambung si Isa ma sigām, yukna. "Pahali kam magdugal. 44 Halam aniyaˈ makapameyaˈ ma aku, luwal bang kabuwanan bayaˈ eˈ Mmaˈku ya bay amapiˈitu aku. Ati sasuku ameyaˈ ma aku pakallumku du ma llaw katapusan. 45 Aniyaˈ tasulat ma deyom Kitab Kanabi-nabihan buwatittu: 'Pinanduˈan sigām kamemon eˈ Tuhan.' Sai-sai," yuk si Isa, "akale maka angikut ma pamanduˈ Mmaˈku, ameyaˈ du isab ma aku. 46 Halam aniyaˈ bay makaˈndaˈ Tuhan, luwal aku ya piˈitu min Tuhan. 47 Bˈnnal ya pangahakaku itu ma kaˈam, sasuku magkahagad ma aku aniyaˈ kallumna kakkal ni kasaumulan. 48 Aku ya kinakan makabuwan kallum," yuk si Isa. 49 "Saga kaˈmboˈ-mboˈanbi bay makakakan manna ma lahat paslangan, sagōˈ waˈi du sigām magpatayan. 50 Malaingkan saddī in kinakan min sulgaˈ itu. Bang aniyaˈ aˈa amangan kinakan itu, aˈa inān mbal amatay. 51 Aku ya kinakan min sulgaˈ, aku ya kinakan makabuwan kallum. Bang aniyaˈ amangan kinakan itu-i, allum du iya sampay ni kasaumulan. Ya pamakanku manusiyaˈ isiku koˈ, ya paglillaˈku boˈ supaya allum saga manusiyaˈ kamemon sampay ni kasaumulan." 52 Manjari maglugat saga Yahudi ma sabab pamissala si Isa inān, yuk-i "Aˈa itu, buwattingga kapamuwanna isina pamakan ma kitam?" 53 Yuk si Isa ni sigām, "Bˈnnal ya pangahakaku itu ma kaˈam, bang mbal kakanbi isi Anak Manusiyaˈ maka bang mbal inumbi lahaˈna, halam aniyaˈ kallumbi bˈnnal. 54 Sagōˈ sasuku amangan isiku maka anginum lahaˈku, kakkal du kallumna sampay ni kasaumulan. Maka pakallumku iya bang taˈabut llaw kahinapusan, 55 sabab isiku itu asal kinakan bˈnnal, maka lahaˈku itu inuman bˈnnal. 56 Sasuku amangan isiku maka anginum lahaˈku pataptap ma aku, maka aku isab pataptap ma iya. 57 Bay aku pinapiˈitu eˈ Mmaˈku ya kakkal salama-lama, maka kakkal isab kallumku ma sababna. Damikiyanna saga aˈa amangan isiku, allum du isab ma sababku. 58 Ya na itu kinakan deyoˈ bay min sulgaˈ," yuk si Isa. "Saddī koˈ itu min kinakan niōnan manna ya bay takakan eˈ kaˈmboˈ-mboˈanbi ma masa awal eˈ. Minsan sigām bay amangan manna heˈ, magpatayan na paˈin sigām bang taˈabut gantaˈan. Sagōˈ sasuku amangan kinakan min sulgaˈ itu, allum sampay ni kasaumulan." 59 Binissala itu eˈ si Isa waktu kapamanduˈna ma deyom langgal Kapirnaum. 60 Takale paˈin panduˈ si Isa itu, aheka bebeyaˈanna ahˈlling, yuk-i, "Ahunit makalanduˈ pamanduˈ itu. Halam aniyaˈ makasandal akale." 61 Halam aniyaˈ bay angahakaˈan si Isa sagōˈ kataˈuwanna asal in pamanduˈna inān pagdugalan eˈ sigām. Angkan yukna ni sigām, "Alaˈat bahāˈ ataybi ma sabab pamanduˈku inān? 62 Na, buwattingga bahāˈ bang taˈndaˈbi aku, Anak Manusiyaˈ, pabīng ni lahat bay baiku? 63 Hakaˈanta kam," yuk si Isa, "Rū Tuhan ya taga-kawasa amuwan kallum bˈnnal, pangitaˈu manusiyaˈ mbal. Makakallum pamanduˈku itu, sabab luwas koˈ itu min Rū Tuhan. 64 Sagōˈ aniyaˈ ma kaˈam mbal magkahagad ma aku." Buwattēˈ pahˈlling si Isa sabab kataˈuwanna sangay min katagnaˈ bang sai mbal magkahagad ma iya, maka bang sai song anukbalan iya ni bantana. 65 Ahˈlling giˈ si Isa, yukna, "Ya itu sababanna angkan yukku ma kaˈam, halam aniyaˈ ameyaˈ ma aku bang nggaˈi ka Mmaˈku Tuhan ya amuwanan iya bayaˈ." 66 Pagka buwattēˈ pahˈlling si Isa, aheka saga mulidna bay alaˈan min iya maka mbal na ameyaˈ ma iya. 67 Angkan si Isa atilaw ni saga mulidna kasangpūˈ maka duwa, yukna, "Ya du kaˈam bahāˈ, alaˈan isab?" 68 Anambung si Simun Petros, yukna, "Tuwan, sai pameyaˈan kami bang nggaˈi ka kaˈa? Luwal kaˈa taga-lapal bissala ya amuwan kallum kakkal ni kasaumulan. 69 Magkahagad kami ma kaˈa, maka kataˈuwan kami in kaˈa Dakayuˈ-kayuˈ Asussi ya bay piˈitu min Tuhan." 70 Yuk si Isa ni sigām, "Bay kam peneˈku kasangpūˈ maka duwa, sagōˈ aniyaˈ dangan min kaˈam ilu pasōran saitan." 71 Ya pinagbissala inān eˈ si Isa si Judas anak si Simun Iskariyut. Sabab si Judas itu, minsan iya dakayuˈ mulid si Isa min kasangpūˈ maka duwa, tukbalanna du si Isa ni saga bantana ma sinosōng.
