1 Puwas daka pilangˈllaw minnēˈ magpaˈndaˈ si Isa pabīng ni saga mulidna mahēˈ ma bihing danaw Tibiri. Buwattitu ya katuwaˈna ni sigām: 2 Si Simun Petros bay mainaˈan magbeyaˈ maka si Tomas ya niranglay Kˈmbal, maka si Natanael ya min kauman Kana ma lahat Jalil. Inaˈan isab magbeyaˈ saga anak si Sibidi, maka duwangan mulid si Isa saddī. 3 Na, ahˈlling si Simun Petros, yukna. "Kaut giˈ aku amokot." "Ameyaˈ kami," yuk kaseheˈan eˈ. Jari paruwaˈ sigām ni bayanan boˈ pauntas kaut, sagōˈ halam aniyaˈ taˈāˈ sigām sampay ni karaiˈ-llawan. 4 Baya-baya paˈin llaw, inaˈan si Isa anˈngge ma bihing tampe sagōˈ halam iya takilā eˈ saga mulidna. 5 Angalingan iya pehēˈ ni sigām, yukna, "Owaˈ saga bagay, halam bahāˈ aniyaˈ taˈāˈbi?" "Halam," yuk sigām. 6 "Na," yuk si Isa, "hūgunbi pokot min bihingbi kowan ilu ati makaˈāˈ kam." Paghūg paˈin, mbal sigām makahellaˈ pokot ma sabab kaheka daing. 7 Manjari ahˈlling dakayuˈ mulid ya kinalasahan eˈ si Isa. Yukna ni si Petros, "Panghūˈta koˈ inān!" Makakale paˈin si Simun Petros itu, magtūy sulugna pabīng badjuˈ bay urusanna, boˈ pakuppa ni danaw tudju pehēˈ ni si Isa. 8 Saga mulid kaseheˈan paturul min bayanan sigām, maka eˈ sigām angangguyud pokot apˈnnoˈ eˈ daing. Asekot asal sigām ni bihing, aniyaˈ saga limampūˈ dˈppa lawakna. 9 Makaruwaˈi paˈin sigām ni bihing, aniyaˈ taˈndaˈ eˈ sigām api maka saga daing patapa ma bagana, maka aniyaˈ isab saga tinapay. 10 Yuk si Isa ni sigām, "Bowahunbi piˈitu saga daing min bay taˈāˈbi ilu." 11 Angkan pehēˈ si Simun Petros paruwaˈ pabīng ni bayanan sigām boˈ guyudna pokot tudju kaleya. Apˈnnoˈ pokot inān eˈ daing aˈaslag, dahatus maka limampūˈ maka tˈllu hekana. Sagōˈ pokot eˈ halam ageseˈ minsan sōdna aheka makalanduˈ. 12 Yuk si Isa ni sigām, "Daiˈ kam amangan." Halam aniyaˈ ma saga mulidna inān makatawakkal atilaw iya bang sai iya, sabab kinataˈuwan eˈ sigām in iya Panghūˈ sigām. 13 Jari pehēˈ si Isa angāˈ tinapay boˈ pamuwanna ni sigām, damikiyanna saga daing. 14 Kamintˈlluna na itu magpaˈndaˈ si Isa ni saga mulidna damuli paˈin min llaw bay pamakallum iya min kamatay. 15 Aubus paˈin eˈ sigām amangan, amissala si Isa ni si Simun Petros. "Simun anak si Yahiya," yukna, "lasanu ni aku, alabi giˈ bahāˈ min saga seheˈnu itu?" "Ahoˈ Panghūˈ," yuk si Petros, "kataˈuwannu in aku alasa ma kaˈa." Yuk si Isa, "Na, upiksaˈun saga bili-biliku." 16 Atilaw si Isa pabīng, yukna, "Simun anak si Yahiya, kalasahannu aku bahāˈ?" "Ahoˈ, Panghūˈ," yukna, "kataˈuwannu du in aku alasa du ma kaˈa." Yuk si Isa, "Na, ipatun saga bili-biliku." 17 Kamintˈlluna na patilaw si Isa ma si Petros. "Simun anak si Yahiya," yukna, "kalasahannu bahāˈ aku?" Asusa na si Petros sabab pinamintˈllu giˈ eˈ si Isa patilawna ma iya, ya yukna, "Alasa ka bahāˈ ma aku." Angkan anambung si Petros ma si Isa, yukna, "Panghūˈ, kataˈuwannu kamemon. Kataˈuwannu in aku alasa du ma kaˈa." Yuk si Isa ma iya, "Na, upiksaˈun saga bili-biliku. 18 Bˈnnal ya pangahakaku itu ma kaˈa," yuk si Isa, "ma kabataˈnu lagiˈ bay ka amasˈmmekan di-nu. Bay ka lumˈngngan piˈingga-piˈingga kabayaˈannu. Sagōˈ bang ka atoˈa na pahˈnnatnu du tangannu ati aˈa saddī ya angengkotan kaˈa boˈ ka binowa ni papehēˈan ya nggaˈi ka kabayaˈannu." 19 Binissala itu eˈ si Isa pamataˈuna bang ai bowahan kamatay si Petros ma waktu sinōng, kamatay pangamahaldikaˈna ma Tuhan. Puwas eˈ yuk si Isa ma si Petros, "Ameyaˈ sadja ka ma aku." 20 Jari palingiˈ si Petros ati taˈndaˈna paturul ma iya mulid dakayuˈ, ya kinalasahan eˈ si Isa. Ya na itu mulid bay paliˈid ni si Isa ma waktu kapagjamu sigām, maka bay atilaw iya, ya yukna, "Tuwan Panghūˈ, sai bahāˈ song anōngan kaˈa ni saga bantanu?" 21 Pagˈndaˈ si Petros ni mulid dakayuˈ itu, yukna ni si Isa, "Panghūˈ, buwattingga aˈa inaˈan-i?" 22 Yuk si Isa ni si Petros, "Bang kabayaˈanku aˈa inān subay allum sampay ni kabīngku piˈitu, daˈa na kasusahun. Ameyaˈ sadja ka ma aku." 23 Jari tinuhuma eˈ saga bebeyaˈan si Isa pasal mulidna dakayuˈ itu mbal magkamatay. Sagōˈ halam si Isa bay amissala in aˈa inān mbal du amatay. Ya sadja yukna, bang saupama kabayaˈanna mulidna inān subay allum sampay kabīngna ni dunya, nggaˈi ka kasusahan si Petros. 24 Ya mulid pinagsuli-suli itu, ya na aˈa angahaka pasal saga pakaradjaˈan itu, maka iya isab bay anulat itu kamemon. Maka kataˈuwan kami in hakana asal bˈnnal. 25 Aheka toˈongan saga hinang saddī bay tahinang eˈ si Isa. Bang saga hinang itu gantaˈ tasulat kamemon ma saga kitab, kumpasku mbal sˈddong ma deyom dunya saga kitab ya panulatan iya. Tammat
