1 Palabay paˈin duwangˈllaw, aniyaˈ pagkawin ma kalumaˈan Kana ya ma lahat Jalil. Waˈi inaˈ si Isa paluruk pehēˈ. 2 Ya du disi Isa maka saga mulidna bay sinōˈ paluruk. 3 Ahagin paˈin binu-anggul, ahˈlling inaˈ si Isa ni iya, yukna, "Halam na aniyaˈ binu-anggul sigām." 4 Ya sambung si Isa, "Inaˈ, minsan aku mbal sohoˈnu, aku ya magkabayaˈan. Halam giˈ taˈabut waktu pamatuwaˈ barakatku." 5 Jari anohoˈ inaˈ si Isa ma saga ipatan ma lumaˈ inān. "Ai-ai panohoˈanna ma kaˈam," yukna, "hinangunbi." 6 Na aniyaˈ nnom poga batu mainaˈan pangisihan boheˈ pagailan saga aˈa, pagka addat sigām bangsa Yahudi. Dakayuˈ poga inān isihan saga dahatus litru. 7 Ahˈlling si Isa ni saga ipatan eˈ, yukna, "Pˈnnoˈinbi saga poga ilu maka boheˈ." Magtūy pinˈnnoˈan eˈ sigām, pinagsamaintib maka bowaˈna. 8 Puwas eˈ anohoˈ si Isa, yukna, "Saukunbi min poga ilu boˈ binowa ni nakuraˈ ya tag-jamuhan." Magtūy binowa eˈ sigām pehēˈ ni nakuraˈ heˈ, 9 ati kininaman eˈna binu-anggul bay boheˈ. Halam kataˈuwanna bang minningga binu inān sagōˈ kinataˈuwan asal eˈ saga ipatan ya bay anauk iya. Pagkinam paˈin eˈ nakuraˈ, magtūy lingananna pangantin lˈlla. 10 "Kamaumuhanna," yukna, "bang ma pagkawinan, binu ahāp ya pamainum dahū ma saga aˈa maglurukan. Subay aheka tainum eˈ sigām boˈ yampa pamainum binu kulang hāpna. Sagōˈ bang kaˈa," yukna, "binu ahāp ya tauˈnu sampay ma buwattinaˈan." 11 Ya na itu paltandaˈan tagnaˈ nihinang eˈ si Isa. Nihinang eˈna mahēˈ ma Kana ya ma lahat Jalil. Minnēˈ pinaˈndaˈan eˈna kawasana, manjari magkahagad ma iya saga mulidna. 12 Puwas eˈ, palūd disi Isa pehēˈ ni daˈira Kapirnaum. Ya seheˈna inān inaˈna maka saga danakanna maka saga mulidna. Inaˈan sigām pahantiˈ daka pilambahangi. 13 Manjari itu asekot na waktu paghinang Yahudi ya niōnan Hinang Paglakad, angkan si Isa patukad ni Awrusalam. 14 Pagtˈkkana pehēˈ, pasōd iya ni deyom langgal pagkulbanan. Aniyaˈ taˈndaˈna ma deyomna inān saga aˈa magdagang sapiˈ maka bili-bili maka assang. Taˈndaˈna isab saga aˈa pagsasambiˈan sīn aningkōˈ ma lamisahan sigām. 15 Pagˈndaˈ itu eˈ si Isa, angāˈ iya lubid nihinang lulubak boˈ sˈssolna saga aˈa kamemon paluwas min deyom langgal, beyaˈ isab saga sapiˈ maka saga bili-bili. Binulangkayat eˈna saga lamisahan aˈa magsasambiˈ sīn, maka pinakaukanat sīn sigām. 16 Yukna ni saga magdaragang assang. "Laˈaninbi daganganbi ilu! Langgal itu mbal manjari nihinang tabuˈ sabab lumaˈ Mmaˈku Tuhan!" 17 Pagˈndaˈ saga mulid si Isa ma hinangna itu, taentom eˈ sigām sulat Kitab, ya yuk-i, "Pagtuyuˈku ma lumaˈnu, O Tuhan, saliˈ hantang api ma deyom atayku agon makamula." 18 Sakali tinilaw si Isa eˈ saga nakuraˈ Yahudi, yuk-i, "Ai kapatutnu maghinang saga hinangnu ilu? Pandaˈin kami hinang makainu-inu tandaˈ saksiˈ in kaˈa taga-kapatut." 19 Anambung si Isa, yukna, "Lubuhunbi langgal itu ati bangunku pabalik ma deyom tˈllungˈllaw." 20 "Ōy!" yuk saga nakuraˈ heˈ. "Langgal itu, mpatpūˈ maka nnom tahun bay kapangahinang iya. Tabangunnu pabīng bahāˈ ma deyom tˈllungˈllaw sadja?" 21 Malaingkan ya langgal pinagbissala eˈ si Isa inān baranna du. 22 Angkanna, taˈabut paˈin waktu kallum si Isa pabalik min kamatayna, taentom eˈ saga mulidna bissalana itu ati tapagkahagad eˈ sigām sulat Kitab maka bissala si Isa. 23 Mahēˈ paˈin si Isa ma Awrusalam saltaˈ ma Hinang Paglakad, aheka aˈa magkahagad ma iya pagka taˈndaˈ eˈ sigām saga hinangna makainu-inu. 24 Sagōˈ mbal angandol si Isa ma sigām, sabab kataˈuwanna asal kajarihan sigām kamemon. 25 Minsan halam aniyaˈ amataˈu, kataˈuwanna asal bang ai ma deyom atay manusiyaˈ.
