1 Yuk si Isa ni saga mulidna, "Awalanku pangahakaku itu ma kaˈam boˈ supaya kam mbal angˈbba min pangandolbi ma aku. 2 Kaˈam ilu song mbal tinugutan pasōd ni deyom langgal eˈ saga nakuraˈ agama. Maka atˈkka du waktu, bang aniyaˈ aˈa amapatay kaˈam, ya pangannal sigām in hinang sigām maguyun maka kabayaˈan Tuhan. 3 Angkan buwattēˈ hinang aˈa ma kaˈam sabab halam sigām bay makataˈu pasalan Mmaˈku atawa aku. 4 Hakaˈanta kam pasal itu supaya kam makaentom bang taˈabut waktu pamatˈkka saga pakaradjaˈan itu. Nientom eˈbi bay pangahakaku itu ma kaˈam. Halam kam bay hakaˈanku dahū minnitu sabab masi aku bay ma kaˈam." 5 "Sagōˈ buwattinaˈan tugilaˈku na ni kaˈam sabab song na aku pabalik pehēˈ ni bay amapiˈitu aku, boˈ paˈin halam aniyaˈ min kaˈam atilaw aku bang piˈingga aku. 6 Makalanduˈ na kasusahanbi pagka kam kahakaˈanku na. 7 Sagōˈ bˈnnal sadja ya pangahakaku itu ma kaˈam, aheya giˈ kahāpan ma kaˈam bang aku alaˈan min kaˈam. Sabab bang aku saupama bay mbal alaˈan, mbal du piˈilu ni kaˈam ya Pananabang eˈ. Sagōˈ bang aku alaˈan, papiˈiluku du iya ni kaˈam. 8 Pagpiˈilu paˈin Pananabang itu, amanduˈan iya saga manusiyaˈ ma dunya itu pasal dusa, maka pasal kaˈadilan, maka pasal hukuman Tuhan. 9 Pinahati sigām eˈna pasal dusa sigām pagga mbal magkahagad ma aku. 10 Pinahati isab sigām pasal kaˈadilan, sabab in aku itu pehēˈ na ni Mmaˈku ati mbal taˈndaˈbi. 11 Pinahati du isab sigām pasal hukuman Tuhan, sabab tahukum na nakuraˈ saitan, ya magagi ma babaw dunya itu. 12 "Aheka giˈ pangahakaku ma kaˈam," yuk si Isa, "sagōˈ mbal taˈanggapbi buwattinaˈan. 13 Subay na atˈkka piˈilu in Rū Kasabˈnnalan, boˈ yampa kam bowana ataˈu pasal kasabˈnnalan kamemon. Mbal iya amanduˈ min pagnahuˈ-nahuˈna, sagōˈ ai-ai takalena min Tuhan, ya na heˈ pamanduˈna ma kaˈam. Maka pinataˈu kam eˈna pasal pakaradjaˈan ya patˈkka ma sinosōng. 14 Pinagmahaldikaˈan isab aku, sabab kamemon ya pamataˈu Rū Tuhan ma kaˈam asal min aku. 15 Ai-ai palsukuˈan Mmaˈku, palsukuˈanku du isab, angkan yukku ma kaˈam, in kamemon pamataˈu Rū Tuhan ma kaˈam asal bay min aku." 16 Yuk si Isa, "Mbal atˈggol, mbal na aku taˈndaˈbi. Pagpuwas inaˈan isab, mbal atˈggol taˈndaˈbi du aku pabīng." 17 Magsuli-suli saga mulid si Isa kaseheˈan, yuk sigām, "Ai bahāˈ hatina, ya yukna 'mbal na atˈggol ati mbal na iya taˈndaˈtam, maka puwas inaˈan-i mbal atˈggol ati taˈndaˈta iya pabīng?' Maka bay pahˈllingna isab, ya yukna-i, 'sabab pehēˈ na iya konoˈ ni Mmaˈna?' 18 Ai bahāˈ hatina 'mbal na atˈggol?' Hē! Mbal tahati!" 19 Kinataˈuwan asal eˈ si Isa in mulidna inān bilahi atilaw iya pasal bissalana. Angkan yukna ni sigām, "Bay yukku ma kaˈam insiniˈ, 'mbal atˈggol ati mbal aku taˈndaˈbi, maka mbal du isab atˈggol ati taˈndaˈbi du aku pabīng.' Ya na itu bahāˈ pagtilaw-tilawanbi dangan maka dangan? 20 Bˈnnal sadja pangahakaku itu ma kaˈam, kaˈam ilu maglemong du maka magdukka, saltaˈ paˈin kinōgan saga aˈa mbal angisbat Tuhan. Taluwaˈ du kam kasusahan sagōˈ papinda du susabi ni kalasigan. 21 Ya dalilna buwat dˈnda anganak. Asusa iya sasangna song anganak. Sagōˈ pagma-luwasan paˈin anakna, mbal na taentomna pˈddiˈ bay kalabayanna. Gom paˈin iya kinōgan sabab aniyaˈ ondeˈ-ondeˈ palahil ni dunya. 22 Damikiyanna ma kaˈam. Ma buwattinaˈan asusa kam, sagōˈ magˈndaˈ du kitam pabīng. Manjari magkōg-koyag du kam toˈongan ma halam aniyaˈ makalaˈanan kōg-koyagbi inān. 23 "Bang taˈabut llaw pagˈndaˈtam pabalik mbal aniyaˈ panilawanbi aku. Bˈnnal pangahakaku itu ma kaˈam, ai-ai amuˈbi ni Mmaˈku ma sabab ōnku ya pamanyabutanbi, tantu kam nirūlan eˈna. 24 Dahū minnitu halam kam bay angamuˈ ai-ai ma sabab ōnku ya pamanyabutan. Angamuˈ na kam, ati nirūlan sadja kam boˈ ajukup kakōganbi." 25 Yuk si Isa ni sigām, "Dahū, bay aku magparalilan, sagōˈ aniyaˈ waktu mbal na aku magparalilan ma kaˈam. Atampal sadja pamissalaku ma kaˈam pasal Mmaˈku. 26 Taˈabut paˈin llaw inaˈan-i, angamuˈ du kam ni Tuhan ma sabab ōnku ya pamanyabutanbi. Nggaˈi ka na aku angamuˈan kaˈam ni Mmaˈku, 27 sabab Mmaˈku alasa asal ma kaˈam. Kinalasahan kam eˈna ma sabab aku ya kalasahanbi maka ma sabab pamˈnnalbi in aku bay piˈitu min Tuhan. 28 Ahoˈ, bay aku piˈitu min Mmaˈku Tuhan boˈ pasampay ni dunya itu, ati ma buwattinaˈan alaˈan na aku min dunya boˈ pabīng pehēˈ ni Mmaˈku." 29 Yuk saga mulidna ni iya, "Buwattinaˈan ahangpat na pamissalanu, nggaˈi ka bissala paralilan. 30 Kataˈuwan kami na in kaˈa makasakupan kamemon. Mbal na kagunahannu akale ma panilaw saga aˈa sabab kataˈuwannu asal deyom pikilan sigām. Angkanna kami amˈnnal toˈongan in kaˈa bay piˈitu min Tuhan." 31 Yuk si Isa ma sigām, "Magkahagad na kam bahāˈ buwattinaˈan? 32 Sōng na waktu, araiˈ na toˈongan, in kaˈam ilu magkaukanat du. Maglahian du kam ni kalumaˈanbi pakaniya-pakaniya ati bbahanbi du aku dangan-danganku. Sagōˈ ya bˈnnalna, nggaˈi ka aku dangan-danganku sabab patˈttog du Mmaˈku ma aku. 33 Hakaˈanta na kam pasal itu kamemon boˈ supaya asannang deyom ataybi ma sabab kapameyaˈbi ma aku. Maitu ma dunya, bininasa du kam eˈ saga aˈa mbal angisbat Tuhan, sagōˈ daˈa kam tināw. Taraˈugku na sigām."
