1 Manjari itu magparalilan si Isa. Yukna ni saga mulidna, "Aku itu dalil dī poˈonan tinanom, maka Mmaˈku dalil aˈa angayuput. 2 Sinagpeˈ eˈna kamemon kasangahanku ya mbal amuwan buwaˈ, maka nihawanan eˈna kamemon kasangahanku taga-buwaˈ boˈ paganap buwaˈna. 3 Kaˈam ilu saliˈ dalil sanga ati hawananna kaˈam maka saga lapal pamanduˈku kaˈam. 4 Subay kam patˈttog ma aku ati patˈttog aku ma kaˈam, sabab in sanga mbal abuwaˈan di-na, luwal bang dalos maka poˈonanna. Damikiyanna kaˈam ilu, mbal kam makahinang ahāp luwal bang aku ya paralosanbi kakkal. 5 "Aku itu dī poˈonan tinanom, boˈ kaˈam ya dalil kasangahanku. Sai-sai kam patˈttog ma aku, boˈ aku isab patˈttog ma iya, aheka buwaˈna ma kaul maka piˈil. Sabab bang aˈa gantaˈ autas min aku, halam aniyaˈ tahinangna ahāp. 6 Sai-sai mbal patˈttog ma aku, saliˈ iya dalil sanga asagpeˈ, tinimanan maka alanosan di-na. Manjari saga sanga alanos itu tinimuk du boˈ nilarukan ni deyom api tinunuˈ. 7 Sagōˈ bang kam patˈttog ma aku, maka bang tauˈbi panduˈku ma deyom ataybi, nirūlan du kam eˈ Tuhan ma ai-ai amuˈbi. 8 Bang kam amuwan buwaˈ paheka ma kaul maka piˈil, minahaldikaˈ du Mmaˈku, ati minnēˈ talhakit in kaˈam mulidku sabˈnnal-bˈnnal. 9 "Alasa aku ma kaˈam buwat kalasa Mmaˈku ma aku. Daˈa kam pabutas min lasaku. 10 Bang beyaˈbi saga panohoˈanku, mbal du kam abutas min lasaku. Buwat aku, beyaˈku asal saga panohoˈan Mmaˈku ma aku ati mbal aku abutas min lasana. 11 Angkan buwattitu pahˈllingku ma kaˈam, supaya kam makahampit kakōran, halam aniyaˈ kulangna. 12 Ya na itu panohoˈanku ma kaˈam, subay kam maglasa-liyasahi buwat paglasaku ma kaˈam. 13 Bang aniyaˈ aˈa lillaˈ amatay ma sabab lasana ma bagayna, mbal kaliyuhan lasa buwattēˈ. 14 Kaˈam ilu, bagayku du kam bang hinangbi saga panohoˈanku ma kaˈam. 15 Mbal na kam ōnanku sosohoˈan sabab sosohoˈan itu mbal pinataˈu bang ai na paˈin nihinang eˈ nakuraˈna. Saguwāˈ kaˈam ilu bay na pataˈuku pasal kamemon ya takaleku min Mmaˈku, angkan kam ōnanku na saga bagayku. 16 Nggaˈi ka kaˈam ya bay ameneˈ aku, sagōˈ aku ya bay ameneˈ kaˈam, maka bay angwakilan kaˈam supaya aheka kahāpan tahinangbi, kahāpan mbal apinda, sapantun kayu magbuwaˈ paheka. Jari ai-ai pangamuˈbi ni Tuhan ma sabab ōnku ya panabbutanbi, tantu kam nirūlan eˈna. 17 Ya itu panohoˈanku: maglasa-liyasahi kam." 18 Yuk si Isa ni saga mulidna, "Bang kam gantaˈ kinabˈnsihan eˈ saga aˈa mbal angisbat Tuhan, entomunbi aku. Ya du aku kinabˈnsihan eˈ sigām dahū giˈ min kaˈam. 19 Bang bay kam dambeyaˈan maka saga aˈa mbal angisbat eˈ, bay du kam kinalasahan eˈ sigām pagka dambeyaˈan maka sigām. Sagōˈ saddī na kam. Bay kam peneˈku pinasaddī min saga aˈa inān, angkan kam kinabˈnsihan. 20 Entomunbi bay pahˈllingku ma kaˈam, ya yukku, 'In banyagaˈ mbal alanga min nakuraˈna.' Na, bang aku nakuraˈbi nilaˈat eˈ saga aˈa inān, tantu isab kaˈam nilaˈat du eˈ sigām. Bang sigām bay ameyaˈ ma pamanduˈku, ameyaˈ du isab sigām ma pamanduˈbi. 21 Sagōˈ kinabˈnsihan kam eˈ sigām maka nilaˈat ma sabab sukuˈku kam. Tuˈud sigām halam makakilā ma Tuhan ya bay amapiˈitu aku. 22 Bang bay halam aku piˈitu ni dunya amanduˈan sigām, mbal sigām katōngan dusa. Saguwāˈ ma buwattinaˈan mbal na sigām makaraˈawa pasal saga dusa sigām. 23 Sai-sai abˈnsihan aku, abˈnsi isab iya Mmaˈku. 24 Bang bay halam tahinangku ma pangˈndaˈ sigām saga hinang ya mbal tahinang eˈ aˈa saddī, halam du sigām bay katōngan dusa. Sagōˈ bay na taˈndaˈ eˈ sigām kahinanganku inān, malaingkan masi abˈnsihan aku maka Mmaˈku. 25 Tantu du aku kinabˈnsihan eˈ sigām boˈ supaya atuman ya bay tasulat ma Kitab, ya yuk-i, 'Kinabˈnsihan aku eˈ sigām ma halam aniyaˈ poˈon sababna.' " 26 Ahˈlling giˈ si Isa, yukna, "Piˈilu du ni kaˈam Pananabang, hatina Rū Tuhan ya luwas min haddarat Tuhan. Angahaka ya kasabˈnnalan pasal Tuhan. Papiˈituku iya ni kaˈam min Mmaˈku. Jari pagmailu na iya anaksiˈ iya ma sababku. 27 In kaˈam isab, anaksiˈ du isab ma sababku, sabab seheˈku asal kam sangay min katagnaˈ."
