1 Na, aniyaˈ dakayuˈ lˈlla asaki, ōnna si Lasarus. Inaˈan iya maglahat ma kalumaˈan Betani maka duwangan danakanna dˈnda, si Mariyam maka si Marta. 2 In si Mariyam dakayuˈ dˈnda ya amuˈusan nsˈllan pahamut ni tapeˈ Panghūˈ Isa boˈ sapuhanna maka buˈunna. 3 Jari itu, pagga abangat saki si Lasarus, aniyaˈ lapal pinabeyaˈ eˈ duwangan danakanna ni si Isa, yuk-i, "Tuwan, asaki bagaynu ya kalasahannu." 4 Takale paˈin lapal itu eˈ si Isa, yukna, "Ya kamaujuran saki si Lasarus inān nggaˈi ka du kamatay, sagōˈ sanglit ni Tuhan, supaya sinanglitan isab Anak Tuhan." 5 Na, alasa asal si Isa ma tˈllungan magdanakan inān, disi Marta maka si Mariyam maka si Lasarus. 6 Sagōˈ pagtaˈuna in si Lasarus waˈi asaki, angagad giˈ iya duwangˈllaw mahēˈ ma patˈnnaˈanna. 7 Yuk si Isa ni saga mulidna, "Sūng kitam pabīng pehēˈ ni lahat Yahudiya." 8 Yuk saga mulidna ni iya, "Tuwan Guru, bahaˈu ka arak pinagbantung eˈ saga Yahudi boˈ ka pinapatay. Ati maggaraˈ na ka isab pabīng pehēˈ?" 9 Anambung si Isa, yukna, "Daˈa kam asusa. Aniyaˈ sangpūˈ maka duwanjām kasawahan ma deyom dangˈllaw. Bang kita gantaˈ lumˈngngan ma waktu llaw mbal makarugtul tapeˈta sabab asawa asal dunya. 10 Sagōˈ bang kita lumˈngngan waktu sangom makarugtul sadja sabab ma deyom kita lendom." 11 Akatis paˈin lling si Isa itu, yukna ni saga mulidna, "Si Lasarus bagaytam inān waˈi tatuli. Sagōˈ pehēˈ aku amatiˈ iya." 12 Yuk saga mulidna ni iya, "Tuwan, pauliˈ du iya bang hal atuli." 13 Kinataˈuwan asal eˈ si Isa in si Lasarus amatay na, sagōˈ bang ma pangannal saga mulidna dī tuli ya pagpaˈinna. 14 Angkan pinatampal eˈ si Isa llingna, yukna, "Amatay na si Lasarus. 15 Ahāp aku halam makamahēˈ ma Betani ma waktu kasaki si Lasarus, sabab tantu du kam angandol ma aku bang taˈndaˈbi ka-eˈku ma iya. Sūng kitam pehēˈ." 16 Manjari si Tomas, ya niranglay Kˈmbal, ahˈlling ni saga pagkahina, yukna, "Sūng. Parongan kitam kamemon minsan kitam paunung ma iya sampay ni kamatay." 17 Atˈkka paˈin disi Isa ni Betani, tataˈuna mpat llaw na bay kapangubul si Lasarus. 18 Betani itu asal asekot ni Awrusalam, saga dabatu lawakna, 19 jari aheka saga aˈa min lahat Yahudiya magbunyug pehēˈ ni si Mariyam maka ni si Marta pasal kamatay danakan sigā lˈlla. 20 Manjari itu, takale paˈin eˈ si Marta pasal si Isa ilu na, pehēˈ iya anampang. Si Mariyam tabba ma deyom lumaˈ. 21 Magbāk paˈin si Marta maka si Isa, yukna ni si Isa, "Tuwan Panghūˈ, bang ka bay maitu mbal du bay amatay danakanku! 22 Sagōˈ kataˈuwanku, minsan ma buwattitu, nirūlan ka eˈ Tuhan ma ai-ai amuˈnu." 23 Yuk si Isa ni iya, "Allum du danakannu pabīng." 24 Yuk si Marta, "Ahoˈ, Tuwan, kataˈuwanku. Pabangun du iya ni kallum ma llaw kahinapusan." 25 Yuk si Isa ni iya, "Aku ya magpakallum saga aˈa magpatayan, maka aku ya poˈonan kallum. Sai-sai angandol ma aku allum du minsan iya amatay na. 26 Sasuku isab allum boˈ angandol ma aku, mbal magkamatay sampay ni kasaumulan." Manjari atilaw si Isa ni si Marta, yukna, "Magkahagad ka bahāˈ?" 27 "Ahoˈ, Panghūˈku," yuk si Marta, "magkahagad aku in kaˈa Al-Masi, Anak Tuhan, ya lagaran kami piˈitu ni dunya." 28 Akatis paˈin lling si Marta itu, pehēˈ iya angalinganan danakanna si Mariyam boˈ yampa singuˈ-singuˈna, yukna, "Itiyaˈ na Tuwan Guru amiha kaˈa." 29 Pagkale itu eˈ si Mariyam, pabuhat iya min paningkōˈanna boˈ paraiˈ-daiˈ pehēˈ ni si Isa. 30 Halam giˈ makasampay si Isa pehēˈ ni kalumaˈan sagōˈ inaˈan iya masi giˈ ma bay pasampangan si Marta ma iya. 31 Aniyaˈ saga aˈa ma lumaˈ magtingkōˈan maka si Mariyam. Jari pagˈndaˈ sigām ma iya pabuhat maka paluwas magdaiˈ-daiˈ, magtūy du sigām paturul. Pangannal sigām in si Mariyam pehēˈ ni kubul maglemong mahēˈ. 32 Sagōˈ si Isa ya papehēˈanna. Pagˈndaˈna ma si Isa pasujud iya ni dahuan tapeˈna, maka yukna, "Panghūˈku, bang ka bay maitu, mbal du bay amatay danakanku." 33 Makaˈndaˈ paˈin si Isa ma si Mariyam maglemong, sampay saga seheˈna Yahudi ameyaˈ-meyaˈ isab maglemongan, magtūy iya anganduˈ-nganduˈ maka ahansul deyom atayna. 34 "Maingga," yukna, "bay pangubulanbi iya?" Yuk sigām, "Tuwan, piˈitu ka ndaˈun." 35 Anangis si Isa. 36 Yuk suli-suli saga aˈa heˈ, "Ndaˈunbi ba kaheya lasana ma si Lasarus." 37 Sagōˈ yuk kaseheˈ, "Si Isa itu bay makapakaˈndaˈ saga aˈa buta. Angay halam tatabangna si Lasarus boˈ mbal amatay?" 38 Na, anganduˈ-nganduˈ si Isa pabīng boˈ pehēˈ ni kubul. In kubul inān bay ma deyom songab batu maka aniyaˈ batu panambol iya. 39 Pagtˈkka sigām ni kubul, yuk si Isa, "Laˈaninbi batu ilu." Sagōˈ ahˈlling si Marta, danakan aˈa bay amatay itu. Yukna ni si Isa, "Abau na iya, Tuwan, sabab kaˈmpat llawna na." 40 Yuk si Isa ma iya, "Bay na ka hakaˈanku, makaˈndaˈ ka kawasa Tuhan, bang paˈin ka magkahagad." 41 Sakali nilaˈanan eˈ sigām batu panambol kubul. Pahangad si Isa angamuˈ-ngamuˈ ni Tuhan. "O Mmaˈ," yukna, "magsukul aku sabab takalenu pangamuˈku. 42 Kataˈuwanku in kaˈa akale na paˈin ma aku, sagōˈ paluwasku bissalaku itu ma sabab saga aˈa itu supaya sigām amˈnnal in kaˈa bay amapiˈitu aku." 43 Pagubus bissalana itu, angalingan iya pakosog yukna. "Lasarus! Paluwas ka piˈitu." 44 Magtūy paluwas aˈa bay amatay. Masi saputna ma tapeˈ-tanganna maka masi turung-mukana. Yuk si Isa ni sigām, "Laˈaninbi saputna ilu, boˈ pasagarinbi iya palˈngnganan di-na." 45 Aheka saga aˈa, bay pinaˈan ni si Mariyam, makaˈndaˈ hinang si Isa itu ati magkahagad na sigām ma iya. 46 Sagōˈ aniyaˈ sigām kaseheˈ pehēˈ ni saga Parisi anumbung pasal bay hinang si Isa. 47 Angkanna saga Parisi maka saga imam nakuraˈ bay amapagtipun Tumpukan Maghuhukum. Yuk sigām, "Ai bahāˈ hinangtam ni aˈa itu? Aheka na paltandaˈan kainu-inuhan aˈa, tahinang eˈna. 48 Bang iya pasangdantam," yuk sigām, "tantu magkahagad saga aˈa kamemon ma iya. Ati piˈitu saga nakuraˈ Rōm angamula bangsatam sampay langgaltam." 49 Aniyaˈ dakayuˈ anambung, ōnna si Kayapas. Imam Muwallam iya ma tahun inaˈan-i. Yuk si Kayapas itu, "Saliˈ halam aniyaˈ panghatibi. 50 Hatiunbi itu: padpad magmula katibuˈukan bangsatam kamemon, ahāp lagiˈ bang dakayuˈ aˈa sadja amatay gantiˈtam kamemon." 51 Ya pinagbaˈat itu eˈ si Kayapas nggaˈi ka min baranna. Buwattēˈ pahˈllingna sabab in iya Imam Muwallam ma tahun inaˈan-i. Angkan tapagbaˈat eˈna in si Isa subay pinapatay panganggantiˈ bangsa Israˈil. 52 Nggaˈi ka hal bangsa Israˈil, saguwāˈ amatay iya panganggantiˈ saga panganak Tuhan ya apulak-palik ma kalahat-lahatan boˈ supaya sigām pinapagdakayuˈ. 53 Jari itu, tinagnaˈan min llaw inaˈan-i, maggaraˈ na saga aˈa inān amapatay si Isa. 54 Angkan iya mbal na patampal ni kahekaˈan aˈa mahēˈ ma lahat Yahudiya. Gom paˈin iya maka saga mulidna alaˈan pehēˈ ni Epraˈim, kauman ma bihing lahat paslangan, ati mainaˈan iya patˈnnaˈ maka saga mulidna. 55 Manjari asekot na paghinang saga Yahudi ya niōnan Hinang Paglakad. Aheka saga aˈa min kalahat-lahatan waˈi patukad ni Awrusalam magpandi sussi boˈ supaya sigām manjari palamud ma paghinang. 56 Amiha na paˈin sigām ma si Isa kalu iya inaˈan ma Awrusalam, jari atipun paˈin sigām ma deyom langgal pagkulbanan, magkihaka sigām dangan maka dangan. Yuk sigām, "Ai ma pikilanbi? Piˈitu bahāˈ si Isa ni paghinangan? Araiˈ mbal, ā?" 57 Buwattēˈ pagbissala sigām sabab aniyaˈ bay panohoˈan saga imam alanga maka saga Parisi, bang aniyaˈ konoˈ makataˈuwan kamainaˈanan si Isa, subay pataˈuna magtūy saga nakuraˈ supaya iya sinaggaw.
