1 Saga dauranakanku, pagka kam ameyaˈ ma si Isa Al-Masi, ya Panghūˈtam bangsahan, subay mbal papagbiddaˈbi aˈa minsan sai-na. 2 Saupama aniyaˈ duwangan aˈa pasōd ni deyom pagtimukanbi, dakayuˈ inān dayahan magsingsing bulawan maka magsˈmmek ahalgaˈ, boˈ dakayuˈ inān miskin, ndang asal sˈmmekna. 3 Saupama palabi pagaddatbi ma aˈa ahalgaˈ sˈmmekna, ati yukbi ma iya, "Tuwan, aningkōˈ ka konoˈ ma tingkōˈan ahāp itu." Sagōˈ yukbi ni aˈa miskin eˈ, "Anˈngge sadja ka mailu," atawa "Aningkōˈ ka maitu ma lantay, ma atag tapeˈku". 4 Na, bang buwattēˈ hinangbi, asāˈ kam pagka papagbiddaˈbi saga pagkahibi bebeyaˈan si Isa. Alaˈat deyom pikilanbi, pagka yukbi alanga dakayuˈ, boˈ areyoˈ dakayuˈ. 5 Pakale kam, saga dauranakanku kinalasahan. Tapeneˈ asal eˈ Tuhan saga aˈa ya binista miskin ma dunya itu, boˈ aniyaˈ karaya sigām bˈnnal, hatina pangandol sigām ma iya. Pineneˈ isab sigām boˈ binuwanan palsukuˈan ma deyom pagparintahanna, buwat asal panganjanjiˈna ma sasuku alasahan iya. 6 Sagōˈ ilu pagtunggīnganbi saga aˈa miskin! Sai bahāˈ anigpitan kaˈam, maka sai anukbalan kaˈam ni pagsaraˈan? Aˈa dayahan koˈ heˈ. 7 Sai bahāˈ amissalahan laˈat ma pasal ōn bangsahan ya pangōn tag-sukuˈ ma kaˈam? Aˈa dayahan! 8 Ahāp hinangbi bang beyaˈbi toˈongan saraˈ Tuhan, saraˈ umbul dakayuˈ. Tasulat asal saraˈ itu ma deyom Kitab, ya yuk-i, "Kalasahinbi pagkahibi buwat eˈbi alasahan baranbi." 9 Sagōˈ bang papagbiddaˈbi aˈa ma sabab luwana, makarusa kam, maka taluwaˈ kam hukuman sabab langgal saraˈ kam. 10 Saraˈ Tuhan itu, minsan bogboganbi kahekaˈanna boˈ paˈin lakaranbi hal dakayuˈ, talanggalbi du kamemonna. 11 Sabab yuk Tuhan ma deyom saraˈna, "Daˈa ka angaliyu-lakad ni nggaˈi ka pagholaˈnu," maka yukna isab, "Daˈa ka amapatay". Manjari minsan kam mbal angaliyu-lakad, boˈ amapatay kam, masi du talanggalbi saraˈ Tuhan. 12 Subay kitam ahantap ma kaul maka piˈil sabab sinaraˈ kitam ma saraˈ ya makabuwan kalimayahan. 13 Sabab bang Tuhan ya angahukum ma manusiyaˈ, boˈ aniyaˈ aˈa halam bay maˈaseˈ ma pagkahina, mbal du isab kinaˈaseˈan eˈ Tuhan. Saguwāˈ bang aˈa maˈaseˈ ma pagkahina, mbal iya tināw sinaraˈ sabab maˈaseˈ du Tuhan ma iya. 14 Saga dauranakanku, bang aniyaˈ aˈa gantaˈ ahˈlling in iya angandol ma Tuhan, boˈ mbal taluwaˈ saga hinangna, pangandolna inān halam aniyaˈ pūsna, maka halam aniyaˈ dapat makalappas iya min hukuman dusa. 15 Saupama aniyaˈ pagkahibi bebeyaˈan si Isa kulang-kabus ma panˈmmek maka ma pagkakan, 16 ai kapūsanna bang hal yukbi ni sigām, "Mura-murahan, bang paˈin ahāp kahālanbi. Magsˈmmek kam akapal boˈ kam mbal nihaggut! Amangan kam pahāp!" Bang kam hal amissala sadja boˈ mbal amuwan ai-ai panabangbi kulang-kabus sigām, na, tantu halam aniyaˈ pūsna. 17 Damikiyanna bang takdil ni pangandol. Bang yukbi in kaˈam angandol ma Tuhan, boˈ halam aniyaˈ hinangbi ahāp tumabeyaˈ, mbal bˈnnal pangandolbi. 18 Kalu aniyaˈ anganjawab, yuk-i, "Aniyaˈ angandol ma Tuhan, aniyaˈ maghinang kahāpan." Na, bang buwattēˈ panganjawabna, buwattitu panambungku, "Paˈndaˈin aku pangandolnu ma halam aniyaˈ hinang tumabeyaˈ tandaˈ saksiˈ, ati paˈndaˈanta ka pangandolku luwas min kahinanganku ahāp." 19 Amˈnnal ka bahāˈ in Tuhan dakayuˈ du? Na, ahāp isab. Sagōˈ minsan saga saitan, amˈnnal isab sigām in Tuhan dakayuˈ du, ati amidpid sigām sabab min tāw sigām. 20 Dupang pahāp ka! Bilahi ka bahāˈ kabˈnnalan pasal pangandolta halam aniyaˈ pūsna bang mbal pinabeyaˈan kahinangan ahāp? 21 Pikilun si Ibrahim ya kaˈmboˈ-mboˈantam. Angkan iya bay binista abontol eˈ Tuhan ma sabab tahinang eˈna panohoˈan Tuhan. Bay tukbalanna ni Tuhan anakna si Isaˈak, pinatˈnnaˈ eˈna ma diyataˈ batu pagkulban. 22 Mbal bahāˈ tahatinu? Ya pangandol si Ibrahim inān bay magbeyaˈ maka hinangna. Min hinangna angkan jukup pangandolna ma Tuhan. 23 Jari tahatita na in bay tasulat ma deyom Kitab pasal si Ibrahim, ya yuk-i, "Si Ibrahim bay amˈnnal ma Tuhan, ati binista iya abontol eˈ Tuhan sabab min kapamˈnnalna." Angkan iya bay kaōnan bagay Tuhan. 24 Na, minnēˈ kataˈuwannu in kitam itu binista abontol eˈ Tuhan bang aniyaˈ isab hinangta ahāp. Mbal jukup bang kita hal angandol. In pangandolta subay magbeyaˈ maka hinangta. 25 Buwattēˈ isab si Rahab, dˈnda pagtatambahan ma masa awal eˈ. Sagōˈ binista iya abontol eˈ Tuhan ma sabab hinangna ahāp. Bay patuntulna saga mata-mata bangsa Israˈil bay pinaˈan anganyataˈ lahatna. Pinanduˈan sigā eˈna lān saddī pamoleˈan sigā. 26 Manjari in pangandolta ma Tuhan sapantun baran, amatay bang halam aniyaˈ napasna. Damikiyanna pangandolta ma Tuhan, amatay isāb bang halam aniyaˈ kahinangan ahāp tumabeyaˈ.
