1 Na in pasal sultan Malkisadik: si Malkisadik itu bay sultan ma lahat Salem ma masa awal eˈ, maka imam isab iya ma Tuhan Mahatinggi. Jari dakayuˈ llaw, hinabu si Ibrahim amoleˈ min pangandaˈugna ma saga sultan kuntarana, sinampang iya eˈ Malkisadik maka sinibahatan eˈna kahāpan. 2 Kabuwanan bahagiˈ si Malkisadik eˈ si Ibrahim, dambahagiˈ min sangpūˈ ma pangaltaˈ bay taˈagawna ma pagbonoˈan. Bang nihati ōn Malkisadik itu, 'Sultan Kaˈadilan' atawa 'Sultan Kasannangan.' 3 Halam aniyaˈ salsila pasal si Malkisadik bang minningga pangkatanna. Mbal isab kataˈuwanta bang buwattingga kapaganak ma iya maka bang sumiyan kamatayna. Dasaliˈ iya maka Anak Tuhan, sabab anatas kapagimamna ni kasaumulan. 4 Kira-kirahunbi kabangsa si Malkisadik itu, sabab kabuwanan iya bahagiˈ sangpūˈ min pangaltaˈ bay tataban eˈ si Ibraham, pangkattam landuˈ abantug. 5 Aniyaˈ panohoˈan saraˈ pinatˈnnaˈan saga panubuˈ si Libi pasal kapagimam sigām. Sinōˈ sigām animuk altaˈ min pagkahi sigām tubuˈ si Ibrahim, bahagiˈ sangpūˈ min kaniyaˈ sigām. 6 Nggaˈi ka panubuˈ si Libi si Malkisadik itu, sagōˈ makasambut iya bahagiˈ min si Ibrahim. Jari si Ibrahim, aˈa bay kapanganjanjiˈan eˈ Tuhan, bay niamuˈan kahāpan eˈ si Malkisadik. 7 Atampal koˈ itu, ya aˈa angamuˈ kahāpan akawasa lagiˈ min aˈa ya niamuˈan kahāpan. 8 Aˈa magkamatay asal saga kaimaman Yahudi ya animuk bahagiˈ altaˈ min pagkahi sigām. Saguwāˈ si Malkisadik itu, ya bay makasambut bahagiˈ min si Ibrahim, tasulat ma deyom Kitab in iya taptap allum. 9 Taga-kapatut saga imam panubuˈ si Libi animuk altaˈ sagōˈ tumabeyaˈ si Libi ma mboˈna si Ibrahim ma kapanukbal bahagiˈ altaˈ ni si Malkisadik. 10 Halam giˈ bay nianakan si Libi ma waktu kapanukbal si Ibrahim eˈ, sagōˈ inaˈan iya patanam ma deyom kuddarat mboˈna. 11 Na, ma waktu tagnaˈ inān aniyaˈ saraˈ pamatˈnnaˈ eˈ Tuhan ma bangsa Israˈil, maka aniyaˈ kaimaman panubuˈ si Libi bay ginˈllal magsuluhan. Manjari bang panubuˈ si Libi itu bay taga-kawasa amasampulnaˈ kajarihan saga pagkahi sigām, angay subay aniyaˈ bowahan imam saddī buwat kapagimam si Malkisadik? Angay mbal bineyaˈ kapagimam si Harun ya panubuˈ si Libi? 12 Bang ginantiˈan bowahan pagimam tagnaˈ, subay ginantiˈan isab saraˈ ya pameyaˈanna. 13 - 14 Atampal koˈ itu, nggaˈi ka panubuˈ si Libi ya pagbissalahantam itu, sagōˈ si Isa ya Panghūˈtam. Saddī tubuˈanna sabab panubuˈ si Yuda iya, maka halam aniyaˈ panubuˈ si Yuda maghinang ma deyom Lumaˈ Pangarapan ni Tuhan. Halam minsan sinambat eˈ si Musa panubuˈ si Yuda bang takdil ni imam. 15 Atampal toˈongan, aniyaˈ na imam saddī palahil, ma buwat kapagimam si Malkisadik. 16 Nggaˈi ka saraˈ atawa usulan manusiyaˈ ya makabuwanan si Isa kapatut magimam, sagōˈ nihinang iya imam ma sabab kawasana, pagka halam aniyaˈ kahinapusan kallumna. 17 Buwat bay binissala ma deyom Kitab, ya yuk-i, "Kaˈa ya tahinang imam ma salama-lama tahun, buwat bay kapagimam si Malkisadik." 18 Pinapasan na bay saraˈ tagnaˈ pagka halam aniyaˈ kosogna, halam aniyaˈ kapūsanna. 19 Sabab halam aniyaˈ bay tasussi pangatayanna ma sabab saraˈ si Musa ya bogboganna. Maka aniyaˈ na niholat saddī, labi ahāp min saraˈ inān. Minnēˈ kitam taga-kapatut pasekot ni Tuhan. 20 Aniyaˈ giˈ sapa Tuhan pinabeyaˈ ma pagimam si Isa. Halam aniyaˈ sapa ma saga imam tagnaˈ, 21 saguwāˈ si Isa tahinang imam labay min panapa Tuhan, ya yuk-i, "Angallam Panghūˈ ma pasalan kaˈa, yukna, 'Kaˈa ya tahinang imam sampay ni kasaumulan.' Mbal toˈongan apinda sapa pangallamna itu." 22 Na pagka buwattēˈ, labi ahāp kapagsulutan bahaˈu itu, ya niumbangan eˈ si Isa. 23 Aniyaˈ giˈ pagbiddaˈan saga imam tagnaˈ maka si Isa. Magkamatay asal saga imam tagnaˈ inān, angkan subay aheka boˈ aniyaˈ na paˈin pagantiˈ. 24 Saguwāˈ halam aniyaˈ gantiˈ si Isa sabab allum iya salama-lama. 25 Angkan iya makagaˈos angalappas toˈongan ma sasuku angandol ma iya, boˈ supaya makapagsekot maka Tuhan. Makalappas iya min buwattinaˈan sampay ni kasaumulan sabab allum iya salama-lama anganjunjung ni Tuhan ma pasalan sigām. 26 Manjari Imamtam Muwallam si Isa, ya ataˈu anabangan kitam. Asussi pangatayanna, halam aniyaˈ tamakna. Pinabiddaˈ iya min manusiyaˈ dusahan ati pinalanga iya ma deyom sulgaˈ. 27 Biddaˈ isab iya min saga Imam Muwallam kaseheˈan inān. Taga-kapatut sigām anukbalan susumbaliˈan llaw-llaw pamapuwas dusa. Dusa baran sigām ya pinuwas dahū, boˈ yampa dusa kaseheˈan. Sumaguwāˈ mbal magkagunahan buwattēˈ si Isa. Pinamintˈdda panukbalna pagkulban ni Tuhan pamapuwas dusa manusiyaˈ kamemon, pagka paglillaˈna baranna ni kamatay. 28 Bang ma saraˈ si Musa, manusiyaˈ sallaˈan ya pinatˈnnaˈ magimam-nakuraˈ. Saguwāˈ labi ajatu pangwakil Tuhan ma Anakna sabab min janjiˈna ahogot, damuli lagiˈ min waktu kapamuwan saraˈ. Jari Anakna, ya halam aniyaˈ sallaˈ-sallaˈna, tahinang Imam Muwallam sampay ni kasaumulan.
