1 Na, in pasal Imam Muwallam bangsa Yahudi: bang aniyaˈ pineneˈ magimam muwallam, pineneˈ iya min pagkahina manusiyaˈ. Kawakilan iya maghinang ni Tuhan pagantiˈ min pagkahina. Tinukbalan eˈna lalabotan ni Tuhan, kinulban eˈna saga hayop supaya aniyaˈ pangampunan dusa saga aˈa. 2 Biyaksa iya tˈkkahan lamma angkan ahanunut eˈna amissalahan saga aˈa halam kapanduˈan, aˈa bay paokat min lān tudju ni Tuhan. 3 Nggaˈi ka isab hal dusa aˈa kaseheˈan ya pinagkulbanan, sampay dusa baranna isab, sabab manusiyaˈ iya magkalamma. 4 Halam aniyaˈ anganggˈllal di-na Imam Muwallam bang hal min baranna, saguwāˈ Tuhan sadja ya ameneˈ, buwat bay pameneˈna ma si Harun waktu palabay. 5 Damikiyanna Al-Masi, halam iya bay maglaku-laku di-na in iya subay imam muwallam, saguwāˈ Tuhan bay anganggˈllal. Buwattitu pamissala Tuhan ma iya: "Kaˈa ya Anakku, maka aku ya mmaˈnu min llaw itu." 6 Aniyaˈ isab bay pamissalana ma ayat saddī, ya yuk-i, "Kaˈa ya tahinang imam salama-lama tahun. Saliˈ du pagimamnu maka bay pagimam si Malkisadik waktu tagnaˈ." 7 Hinabu paˈin si Isa ma dunya itu, bay iya angamuˈ duwaˈa maka anganjunjung ni Tuhan, ya taga-kapatut amuwasan iya min kamatay. Akosog panangisna sabuna angamuˈ-ngamuˈ, ati kinale iya eˈ Tuhan ma sabab kapagmalulusna ma kahandakna. 8 Makananam si Isa katiksaˈan minsan iya Anak Tuhan, manjari atukid pameyaˈna ma panohoˈan Tuhan pagka kapamintānganna tiksaˈ inān. 9 Taˈabut paˈin iya atubus ma kamemon, tahinang iya tunggal manglalappas ma sasuku ameyaˈ ma iya, boˈ supaya sigām pinaniyaˈan kallum kakkal. 10 Lāgi pinatˈnnaˈ iya Imam Muwallam eˈ Tuhan, buwat bay kapagimam si Malkisadik ma masa awal eˈ. 11 Na, aheka lagiˈ arak pamataˈu kami ma kaˈam ma pasal inaˈan-i, saguwāˈ kahunitan aku amahati kaˈam sabab agagga kam pinanduˈan. 12 Atˈggol na kapameyaˈbi ma si Isa, sagōˈ mbal giˈ kam makapanduˈ ma pagkahibi ilu. Subay aniyaˈ aˈa saddī amanduˈan kaˈam pabalik pasal lapal Tuhan. Saliˈ kam hantang ondeˈ-ondeˈ ya mbal makakakan atuwas, subay hal gatas. 13 Bang aˈa mbal makakakan saddī min gatas, masi iya ondeˈ-ondeˈ ya mbal giˈ makapanilang ahāp maka alaˈat. 14 Subay kam asangpot boˈ yampa makakakan pagkakan atuwas. Hatulanna, bang aˈa asangpot pangandolna, biyaksa iya amiˈat baranna boˈ tasilangna ahāp maka alaˈat.
