1 Na, pagka masi taga-pūs bay panganjanjiˈ Tuhan ma kitam, hatina in kitam makajari pasōd ni pahalian bay tagamana, angkan kita subay ahalliˈ supaya halam aniyaˈ min kitam mbal makaˈabut pinasōd ni pahalian eˈ. 2 Bay kitam makakale lapal ahāp min Tuhan, buwat bay pinakale ma kaˈmboˈ-mboˈan eˈ. Bay sigām makakale lapal sagōˈ halam aniyaˈ kahāpan taˈāˈ sigām minnēˈ sabab halam bay amˈnnal. 3 Sagōˈ makasōd kitam ni pahalian bay tinagama eˈ Tuhan, pagka amˈnnal ma lapalna. Saguwāˈ sasuku mbal amˈnnal, mbal isab pasōd buwat bay pamissala eˈ Tuhan, yuk-i, "Astolan aku, ya poˈon aku makasubali, yukku, Saga aˈa itu, mbal toˈongan makasōd ni deyom lahat pamahalianku sigām." Buwattēˈ bay janjiˈ Tuhan. Aniyaˈ asal pahalian sabab ajukup hinang Tuhan sangay min waktu bay kapamapanjarina dunya. 4 Sabab aniyaˈ tasulat ma deyom Kitab ma pasal llaw kapituˈna, ya yuk-i, "Taˈabut paˈin llaw kapituˈna, magtūy pahali Tuhan min hinangna kamemon sabab ajukup na." 5 Niˈisaban isab eˈ Tuhan pahˈllingna,, yukna, "Mbal toˈongan makasōd saga aˈa itu ni lahat bay tagamaku pahalian sigām." 6 Jari halam bay makasōd ni deyom pahalian saga aˈa bay makakale tagnaˈ, sabab agagga sigām. Malaingkan aniyaˈ aˈa pinasōd, 7 sabab aniyaˈ giˈ llaw dakayuˈ panganggantaˈ eˈ Tuhan ma manusiyaˈ, ya pinagbahasa "Llaw Ītu". Palabay paˈin daka pilantahun min waktu kaˈmboˈ-mboˈan eˈ, niˈisaban eˈ Tuhan palmanna, pinabissala ma si Daˈud, ati tasulat bissalana ma ayat Kitab bay pagbassata tagnaˈ. Yuk-i, "Ma llaw itu, bang takalebi palman Tuhan, daˈa patuwasunbi kōkbi." 8 Bang si Yussaˈ bay makabuwanan pahalian tantu ma bangsa Israˈil ma masa awal inān, waktu tagnaˈ, mbal bay amissala Tuhan pasal llaw saddī. 9 Sagōˈ aniyaˈ bissalana, maka aniyaˈ pahalian ma aˈa sukuˈ Tuhan, 10 sabab sasuku makasōd ni deyom pahalian bay tinagamahan iya eˈ Tuhan, pahali iya min hinangna buwat kahali Tuhan min bay hinangna. 11 Angkan kitam subay amuspus pasōd ni pahalian Tuhan, boˈ supaya halam aniyaˈ min kitam tinaikutan ma sabab kapameyaˈna ma kajarihan saga aˈa patigaggahun inān. 12 Pahōp asal palman Tuhan, maka apaslod. Atalom giˈ labi min katalom kalis, ati paˈabut toˈongan ni deyom paltubu-tubuhanta maka ni palnyawahanta sampay ni sumsumta. Manjari ai-ai pinikil maka niniyat eˈ manusiyaˈ, tasilang sadja ma sabab palman Tuhan eˈ. 13 Halam aniyaˈ katapukan min pangˈndaˈ Tuhan ma ai-ai pinapanjari kamemon. Atampal sadja ma pangˈndaˈna, ati paharap du kitam ni iya ma sinosōng, magpasabˈnnal ma pasal kamemon bay hinangta. 14 Na, aniyaˈ ma kitam Imam Muwallam landuˈ bangsahan, waˈi na makasampay ni haddarat Tuhan. Ya na si Isa Anak Tuhan. Angkan subay ahogot pamogbogtam ma agama ya pagsabˈnnalantam itu. 15 Sabab si Isa, ya Imamta Muwallam, landuˈ maˈaseˈ ma kitam. Kataˈuwanna asal kalammahantam sabab bay na kalabayanna sasat indaginis buwat makani-kitam. Ya sadja pagbiddaˈanna, in iya halam bay makarusa. 16 Na, pagka aniyaˈ ma kitam Imam Muwallam buwattēˈ, subay mbal agˈmma sumangattam pasekot ni haddarat Tuhan angamuˈ tabang min iya, ya poˈonan tabang. Tantu kitam kinaˈaseˈan maka tinabang ma waktu asigpit.
