1 Pagka buwattēˈ kawasa Anak Tuhan, subay isbatta panduˈ bˈnnal bay takaleta ma pasalna, supaya kita mbal tabowa palaran. 2 Sabab bang mbal katangkisan saraˈ ya bay pinalatun eˈ malaˈikat ni kaˈmboˈ-mboˈantam, maka bang sasuku makahinang kasāˈan atawa dusa bay pinatˈnnaˈan kabinasahan pinapagtongod maka dusana, 3 na, buwattingga kita apuwas min mulkaˈ bang palehomta kalappas landuˈ aheya itu? Panghūˈ Isa baranna bay magnasihat pasal kalappas itu, ati tinuman kasabˈnnalanna eˈ saga aˈa bay makakale iya. 4 Tinapilan isab saksiˈ sigām eˈ Tuhan, pagka sigām buwananna barakat maghinang paltandaˈan maka hinang kainu-inuhan aˈa. Katulunan sigām ginis kapandayan min Rū Sussi, min kahandak Tuhan isab. 5 Na nggaˈi ka bangsa malaˈikat ya ginˈllal eˈ Tuhan makapagbayaˈ ma dunya sinosōng ya pagsambatta itu. 6 Manusiyaˈ ya pinapagbayaˈ, buwat tasulat ma deyom Kitab, ya yuk-i, "Ai kapūsan manusiyaˈ angkan pagkaˈinagonannu? Ai anak manusiyaˈ angkan parulinu? 7 Patˈnnaˈnu iya areyoˈ dangkuriˈ min bangsa malaˈikat. Buwanannu iya kasanglitan maka kabantugan, 8 sampay kapatut magbayaˈ ma kamemon ai-ai." Bang ma bissala Kitab itu, aniyaˈ kapatut pamuwan eˈ Tuhan ma Anak Manusiyaˈ boˈ kapagbayaˈan eˈna ai-ai kamemon. Halam aniyaˈ mbal tumabeyaˈ pinagbayaˈan. Malaingkan mbal giˈ taˈndaˈta manusiyaˈ magbayaˈ ma kamemon. 9 Taˈndaˈta si Isa, ya bay pinareyoˈ daiˈ-daiˈ min saga malaˈikat, minahaldikaˈan na maka sinanglitan ma sabab kamatayna gantiˈ manusiyaˈ kamemon, sabab min aseˈ maka lasa Tuhan. 10 Tuhan ya poˈonan ma kamemon maka kamattihan ma kamemon, angkan patut bang iya amasampulnaˈ si Isa labay min saga kabinasahan bay kalabayanna. Aheka aˈa tahinang panganak Tuhan bay binowa eˈ si Isa ni kasahayaˈanna, sabab iya ya pagmakōkan maka Manglalappas sigām. 11 Sinussi eˈna pangatayan manusiyaˈ, jari daˈmmaˈ iya maka saga aˈa ya sinussi. Angkan iya mbal aiyaˈ angaku in sigām danakanna. 12 Buwattitu ya bay pahˈllingna ni Tuhan, yuk-i: "Bissalahanku saga danakanku ma pasal kahinangannu. Sanglitanta ka ma palhimpunan sigām." 13 Yukna isab, "Pasangdol aku ma Tuhan." Maka aniyaˈ isab ayat dakayuˈ, ya yuk-i, "Itiyaˈ aku maka dauranakan ya bay pamaipat aku eˈ Tuhan." 14 In niōnan dauranakan itu dalahaˈ maka daisi sabab manusiyaˈ sigām saliˈ-saliˈ, angkan si Isa bay tahinang manusiyaˈ boˈ supaya makananam kamatay. Jari itu, pagka kalabayanna kamatay, taraˈug eˈna nakuraˈ saitan ya bay taga-gaˈosan ma kamatay manusiyaˈ. 15 Pagka buwattēˈ kapangandaˈug si Isa min nakuraˈ saitan, tapalimaya eˈna sasuku bay tabanyagaˈ eˈ tāw sigām ma kamatay, sangay lagiˈ min kaondeˈ sigām. 16 Atampal koˈ itu, nggaˈi ka malaˈikat ya tinabang eˈ si Isa, sagōˈ saga panubuˈ si Ibrahim." 17 Ya itu sababanna angkan si Isa subay magsaliˈ toˈongan maka dauranakanna manusiyaˈ boˈ supaya tananamna ai-ai kalabayan sigām. Manjari maˈaseˈ iya maka kapangandolan, jari patut iya nihinang Imam Muwallam magpatillot ma sigām maka Tuhan boˈ supaya aniyaˈ kaˈampunan dusa sigām. 18 Ma buwattinaˈan makatabang na si Isa ma sasuku sinasat sabab bay kalabayanna sasat maka kabinasahan.
