1 Na in pasal pangandol itu, hatina aniyaˈ paltantuhanta in ai-ai holatta buwattinaˈan paniyaˈ du ma sinosōng. Min pangandolta, ya angkan kita amˈnnal ma pasal ai-ai ya mbal giˈ taˈndaˈta. 2 Bay kasulutan Tuhan ma saga aˈa ma waktu kaˈmboˈ-mboˈan ma sabab pangandol sigām ma iya. 3 Bang kita angandol, makataˈu kita in alam itu kamemon bay pinapanjari eˈ Tuhan min palmanna sadja. Manjari kakayaˈ-kayaˈanna itu ya taˈndaˈ mata, bay tahinang min ai-ai ya mbal taˈndaˈ. 4 Entomunbi saga aˈa bay ma masa awal eˈ, buwat si Habil. Bay iya angandol ma Tuhan, ya poˈon iya bay makatukbalan pagkulban tudju ni iya, labi ahāp min bay pangalamas siyakana si Kabil. Bay angandol si Habil, ati binista iya abontol eˈ Tuhan sabab kaˈamuhan Tuhan ma panukbalna. Masi aniyaˈ kapamintāngantam min pangandol si Habil minsan atˈggol na kamatayna. 5 Si Idris isab ma masa awal eˈ, halam iya bay makalabay kamatay sabab akosog pangandolna ni Tuhan. Halam tabāk bangkayna sabab bay iya pinaˈangkat eˈ Tuhan hinabuna allum. Angkan buwattēˈ, sabab aˈa iya makasulut atay Tuhan. 6 Halam aniyaˈ manusiyaˈ makasulut atay Tuhan bang mbal angandol ma iya. Sabab sai-sai bilahi angarap ni Tuhan subay magkahagad aniyaˈ Tuhan. Subay isab kahagadna aniyaˈ panungbas Tuhan ma sasuku atuyuˈ amiha iya. 7 Si Nū isab, aniyaˈ pangandolna angkan iya bay angasip ma pagbandaˈ Tuhan pasal balaˈ song pinatˈkka ni dunya. Kinahagad eˈna ma halam giˈ taˈndaˈna. Bineyaˈ eˈna panohoˈan Tuhan, ati nihinang eˈna adjung aheya supaya sigām magtaiˈanak lappasan min latap. Ati minnēˈ, min bowahan hinang si Nū heˈ, talhakit in aˈa kaseheˈan bay ma dunya patut pinatōngan dusa. Boˈ si Nū ya binista abontol ma sabab pangandolna. 8 Si Ibrahim isab, bay iya angandol ma Tuhan angkan beyaˈna panohoˈan Tuhan ati alaˈan min dī lahatna tudju ni lahat saddī, ni bay panganjanjiˈ Tuhan ma iya. Bay iya palintas minsan halam kataˈuwanna bang piˈingga patudjuhanna. 9 Ma sabab pangandolna isab, angkan si Ibrahim bay patˈnnaˈ ma lahat bay panganjanjiˈ Tuhan ma iya, minsan iya saliˈ aˈa liyu mainaˈan. Maglihan-lihan iya, ati lumaˈ tolda ya lumaˈ palihananna. Buwattēˈ du isab anakna si Isaˈak maka mpuna si Yakub, ya tumabeyaˈ ma si Ibrahim panganjanjiˈan lahat inān eˈ Tuhan. 10 Aiman si Ibrahim sabab aniyaˈ lagaranna lahat saddī, hatina daˈira ahogot pangosolanna, ya ginantaˈ maka nihinang eˈ Tuhan. 11 Damikiyanna si Sara hˈnda si Ibrahim, angandol isab ma Tuhan ati kabuwanan iya kosog makapangiram minsan iya aumul na, minsan palabay na bay waktu pangiramna. Tuˈud pangandolanna Tuhan in janjiˈna maujud du. 12 Si Ibrahim itu, minsan iya saliˈ aˈa pinagamatay na, humeka toˈongan tubuˈna. Ya heka panubuˈna buwat heka bituˈun ma bˈttong langit, buwat solagan gusung ma bihing tahik, mbal takoleˈ niˈitung. 13 Manjari kamemon saga aˈa kaōnan inān bay magpangandol ma Tuhan sampay ni kamatay. Ya bay paljanjiˈan Tuhan ma sigām, halam bay tasambut ma dunya lagiˈ, saguwāˈ tapantaw eˈ sigām min katāhan, maka eˈ sigām kinōgan. Bay sigām angahaka patampal in sigām saliˈ aˈa liyu, hal maglihan ma dunya itu. 14 Na, pagka sigām ahˈlling in sigām aˈa liyu, manyatakan du aniyaˈ lahat saddī minohot, hatina lahat sigām luggiyaˈ. 15 Halam isab nientom lahat bay palaˈanan sigām tagnaˈ, sabab bang aniyaˈ bay bayaˈ sigām pabīng ni lahat eˈ, halam aniyaˈ bay makasaggaˈ. 16 Sagōˈ nggaˈi ka lahat tagnaˈ ya nientom eˈ sigām, sagōˈ lahat labi ahāp, lahat sulgaˈ. Angkan Tuhan mbal aiyaˈ niōnan Tuhan eˈ sigām, sabab aniyaˈ daˈira bay tinagama eˈna ma sigām. 17 - 18 Si Ibrahim isab, waktu bay kapanulay Tuhan ma iya, ahogot pangandolna. Angkan iya bay mbal allog amapatay anakna si Isaˈak pagkulban, minsan ya anak bay panganjanjiˈ eˈ Tuhan. Yuk janjiˈ Tuhan eˈ, "Paheka du panubuˈnu luwas min si Isaˈak." Sagōˈ angandol si Ibrahim, angkan iya magmalillaˈ amapatay anakna heˈ, pagkulban ni Tuhan. 19 Sabab bang ma bistahan si Ibrahim, tapakallum du anakna eˈ Tuhan. Jari tasambut eˈ si Ibraham anakna saliˈ luwas min kamatay. 20 Si Isaˈak isab bay angandol ma Tuhan, angkan nijanjiˈan eˈna anakna duwangan, si Yakub maka si Esaw, in sigā pinatˈkkahan du lidjikiˈ eˈ Tuhan ma sinosōng. 21 Si Yakub isab, song paˈin iya magkamamatay, bay angandol ma Tuhan ati niamuˈan eˈna barakat mpuna, anak si Yusup duwangan. Binalutan eˈna tungkud pasangdolanna hinabuna amudji Tuhan. 22 Si Yusup isab, song paˈin iya magkamamatay, bay angandol ma Tuhan. Angkan iya bay makapahˈlling pasal kalaˈan bangsa Israˈil min lahat Misil. Pangˈbba eˈna ma sigām panohoˈan pasal bangkayna. 23 Inaˈ-mmaˈ si Musa isab bay angandol ma Tuhan waktu kapanguldin sultan Misil subay pinapatay kamemon anak Yahudi lˈlla sasuku nianakan bahaˈu. Angkan sigā bay anapukan si Musa ma deyom tˈllumbulan puwas min kapaganak ma iya. Taˈndaˈ paˈin eˈ sigā in si Musa mahal-mahal lingkatna, halam sigā tināw ma uldin sultan eˈ. 24 Si Musa isab bay angandol ma Tuhan, sabab taˈabut paˈin kasangpotna mbal na iya angaku niōnan anak dayang-dayang, ya anak Sultan bay amasulig iya. 25 Pād-pād iya ameyaˈ ma hinang alaˈat ma lumaˈ sultan, ya makahāp palasahan daiˈ-daiˈ sadja, bilahi lagiˈ iya parakayuˈ ma pagkahina bangsa Israˈil, aˈa sukuˈ Tuhan. Lillaˈ iya magbeyaˈ maka sigām bininasa. 26 Bang ma iya, minsan iya pinakaiyaˈ ma sabab Al-Masi, ahalgaˈ lagiˈ min kamemon altaˈ ma lahat Misil, sabab ya angutna tungbas min Tuhan ma llaw damuli. 27 Bay alaˈan si Musa min lahat Misil ma sabab kosog pangandolna ma Tuhan, halam iya tināw ma pangastol sultan eˈ. Akosog toˈongan niyatna, sabab taˈndaˈna Tuhan ya mbal taˈndaˈ manusiyaˈ. 28 Ma sabab pangandolna isab, angkan iya bay magpanohoˈan ma bangsa Israˈil. Sinōˈ sigām amigsikan lahaˈ bili-bili ni lusuk-lusuk lawang sigām, boˈ mbal talapay pinapatay anak sigām lˈlla kasiyakahan bang palabay malaˈikat pangmumulkaˈ. Ya heˈ tagnaˈan Hinang Paglakad. 29 Bangsa Israˈil isab, waktu kauntas sigām ni dambilaˈ sˈllang ya niōnan Sˈllang Keyat. Minsan du bay sˈllang, tahinang gintanaˈan magtūy ma sabab pangandol sigām, jari pauntasan sigām parambilaˈ. Saguwāˈ pasulay paˈin saga aˈa Misil pauntas, alembo sigām sabab pabīng magtūy tahik. 30 Waktu kapehēˈ bangsa Israˈil ni daˈira Ariha, pinaglibut-libutan daˈira inān eˈ sigām ma deyom dapituˈ. Taˈabut paˈin kapituˈna, magtūy alubu ādna batu sabab min kosog pangandol sigām. 31 Bay angandol ni Tuhan si Rahab ya dˈnda pagtatambahan ma daˈira Ariha. Pinatuntul eˈna saga aˈa magmata-mata ati halam iya bay talapay pinapatay maka saga aˈa ya agagga ma Tuhan. 32 Na, mbal na sugpatanku sabab mbal aku makasaˈut angahakaˈan kaˈam ma pasal disi Gidiyun, si Barak, si Samson, si Jepta, si Daˈud, si Samwel, sampay ni kanabi-nabihan. 33 Saga aˈa itu bay anganggaˈos pagsultanan ma sabab pangandol sigām. Aniyaˈ kaseheˈ abontol pagsaraˈ sigām ma sabab pangandol, maka aniyaˈ bay makasambut panganjanjiˈ Tuhan ma sabab pangandol sigām. Aniyaˈ isab bay amakˈttop bowaˈ halimaw. 34 Aniyaˈ sigām kaseheˈ bay amˈddahan api aheya, aniyaˈ isab bay makaliyus min patay bonoˈ. Aniyaˈ isab sigām taluwaˈ kalammahan saguwāˈ angosog gom paˈin pamaranan sigām. Landuˈ sigām aesog ma pagbonoˈ, sampay taraˈug eˈ sigām baˈanan sundalu min lahat saddī. 35 Aniyaˈ saga dˈnda bay kamatayan sagōˈ allum pabalik saga lahasiyaˈ sigām magpatayan heˈ. Aniyaˈ isab aˈa kaseheˈ mbal angahoˈ pinalˈppa minsan sigām pinapˈddiˈan toˈongan sampay kamatay. Tuˈud sigām aholat pinakallum pabalik boˈ binuwanan kallum labi ahāp. 36 Aniyaˈ isab kaseheˈ bay pinaggunyak-gunyak sampay niraplosan, aniyaˈ isab kaseheˈ bay kinarenahan boˈ yampa tinambolan ma deyom kalabusu. 37 Aniyaˈ isab sigām bay pinagbantung, aniyaˈ bay pinagkatkat duwa, maka aniyaˈ isab bay binonoˈ maka kalis. Aniyaˈ sigām kaseheˈ hal kuwit bili-bili atawa kambing ya pasˈmmek sigām, miskin toˈongan. Nilaˈugan na paˈin sigām, nijahulakaˈ. 38 Dunya itu mbal tōp paglahatan saga aˈa inān, subay lahat labi ahāp. Satˈggol sigām ma dunya itu, hal sigām maglihan na paˈin sumaˈan ma lahat paslangan, sumaˈan ma kabūd-būran. Bay sigām patˈnnaˈ ma deyom sengab batu atawa ma lowang ma deyom tanaˈ. 39 Babantugun saga aˈa itu kamemon ma sabab kosog pangandol sigām ma Tuhan. Saguwāˈ halam sigām bay makasambut panganjanjiˈ Tuhan tˈggol sigām allum, 40 sabab aniyaˈ labi ahāp panganggantaˈ kitam eˈ Tuhan. Hatina in kitam maka saga aˈa bay masa awal inān subay magbeyaˈ anambut paljanjiˈan maka kasampulnaˈanna.
