1 Ma awal jaman lagiˈ araran eˈ Tuhan amasampay palmanna ni kaˈmboˈ-mboˈantam labay min kanabi-nabihan, maka aheka ginisan lān bay pamasampayna. 2 Saguwāˈ ma ahil jaman itu, Anakna ya amasampay palmanna ni kitam. Bay pinapanjari eˈ Anak saga alam min kahandak Tuhan, maka ginˈllal iya pinusakaˈan kamemon ai-ai ma sakalingkal alam. 3 Takilāta sahaya Tuhan labay min Anakna, taˈndaˈta isab ma kajarihan Anak bang buwattingga kajarihan Tuhan. Tinayak na paˈin alam itu eˈ Anak sabab min kallamna kawasahan. Aubus paˈin eˈna angahinang lawang pamasussi manusiyaˈ min dusa sigām, aningkōˈ iya ma bihing Tuhan Sangat Kawasa, tampal ni kowan. 4 Jari pinabangsa Anak itu labi min saga malaˈikat. Maka alanga isab ōn ya pamusakaˈ Tuhan ma iya, labi alanga min ōn saga malaˈikat. 5 Sabab halam aniyaˈ malaˈikat bay binissalahan eˈ Tuhan buwat bay pamissalana ma Anakna, ya yuk-i, "Kaˈa ya Anakku, maka aku ya mmaˈnu min llaw itu." Damikiyanna isab, halam aniyaˈ malaˈikat bay pinalmanan eˈ Tuhan buwat ma ayat ītu, ya yuk-i, "Mmaˈna du aku, maka anakku du iya." 6 Aniyaˈ isab bay pangallam eˈ Tuhan ma waktu song pinabeyaˈ Anakna tunggal-kawasahan piˈitu ni deyom dunya, yuk-i, "Subay iya pinudji eˈ kamemon saga malaˈikat Tuhan." 7 Buwattitu isab pamissalana ma pasal bangsa malaˈikat: "Tahinangna bangsa malaˈikat saliˈ baliyu, tahinang sosohoˈanna saliˈ dallet api." 8 Malaingkan buwattitu pangallam Tuhan pasal Anakna: "O Tuhan, anatas pagparintanu ni kasaumulan. Abontol sadja kapagsultannu. 9 Kasulutan ka ma ai-ai abontol, kabˈnsihannu ai-ai alaˈat. Angkan ka pineneˈ pinalanga eˈ Tuhannu, angkan ka binuwanan kakōgan maka kabantugan labi giˈ min bay pamuwanna ma kaseheˈannu." 10 Aniyaˈ giˈ pamissala dakayuˈ, yuk-i, "O Panghūˈ, bay papanjarinu dunya itu ma awal tagnaˈ. Tangannu ya bay angahinang kalangit-langitan. 11 Palanyap du babaw dunya itu maka diyataˈ ayan, Magkaˈndang kamemonna buwat sapantun sˈmmek. sagoˈ kaˈa ilu kakkal sadja. 12 Momosnu dunya maka langit buwat sˈmmek nilūnan, ati pindahannu ni saddī, buwat badjuˈ. Malaingkan kaˈa ilu mbal magkapinda, kakkal ka saumul-umul." 13 Halam aniyaˈ malaˈikat bay binissalahan eˈ Tuhan buwat pamissalana ma Anakna, ya yuk-i, "Daiˈ ka aningkōˈ ma bihingku kowan, sampay patˈnnaˈku palbantahannu kamemon, ma deyoˈ pād-tapeˈnu." 14 Na pagka buwattēˈ, ai bahāˈ saga malaˈikat? Ginis umagad sigām pinabeyaˈ eˈ Tuhan anabang ma manusiyaˈ ya makataimaˈ kalappasan min Tuhan.
