1 Palanjalku giˈ pamanduˈku. Bang saupama aniyaˈ ondeˈ-ondeˈ amatay mmaˈna, pamusakaˈ ma iya pangaltaˈ mmaˈna heˈ. Sagōˈ satˈggol halam giˈ asangpot umulna mbal iya pinahampitan pamusakaˈ. Sapantun iya ata lagiˈ. 2 Pinagbayaˈan iya sampay pangaltaˈna eˈ saga aˈa angulip iya. Subay taˈabut waktu bay panugilaˈ eˈ mmaˈna boˈ yampa aniyaˈ kapatutna magbayaˈ ma altaˈ inān. 3 Buwattēˈ isab kahālanta ma waktu tagnaˈ, hinabu kita ondeˈ-ondeˈ lagiˈ, pinagbayaˈan kita eˈ kagaˈosan ya mbal taˈndaˈ mata. 4 - 5 Saguwāˈ taˈabut paˈin waktu bay panugilaˈ eˈ Tuhan, sinohoˈ eˈna Anakna piˈitu ni dunya. Nianakan iya eˈ manusiyaˈ supaya kitam makataimaˈ kapatutan ya pamusakaˈ panganak. Bangsa Yahudi iya, nianakan ma deyoˈan saraˈ agama, supaya tapaluwas eˈna sasuku binanyagaˈ eˈ saraˈ. 6 Pagga kam panganak Tuhan na, pinahōpan kam Rū si Isa ya anak Tuhan. Angkan kitam makajari na angōn Mmaˈ ma Tuhan, ma sabab Rū-na ya patˈnnaˈ ma deyom pangatayantam. 7 Angkan kam mbal na kaōnan banyagaˈ, sagōˈ panganak Tuhan na. Ati ma kaˈam pusakaˈ kamemon ya pamuwan eˈ Tuhan ma saga anakna, pagka anak Tuhan na kam. 8 Ma waktu tagnaˈ, ma halam giˈ kam ataˈu ma Tuhan, sapantun kam banyagaˈ pinagbayaˈan eˈ kagaˈosan ya mbal taˈndaˈ. 9 Sagōˈ magkataˈu na kam maka Tuhan, kinilā kam eˈna, jari angay kam pabalik pinagbayaˈan eˈ kagaˈosan ya halam aniyaˈ kawasa atawa pūsna? Kabayaˈanbi bahāˈ binanyagaˈ pabīng? 10 Sabab ilu kam angisbat llaw mulliya maka bulan, musim maka tahun! 11 Asusa aku ma pasalbi, kalu kaliman bay sangsāˈku ma deyomanbi. 12 Saga dauranakanku, aniyaˈ panganjunjungku ni kaˈam. Sengorinbi aku, sabab ya du aku bay anengoran kaˈam. Halam aniyaˈ laˈat tahinangbi ma aku. 13 Kataˈuwanbi asal bay kahālanku waktu kahantiˈku ma kaˈam tagnaˈ. Bay aku tˈkkahan saki, angkan aku bay pahantiˈ ma kaˈam anganasihatan kaˈam lapal ahāp. 14 Halam aku bay palehombi, halam aku bay sulakbi, minsan kam kabuhatan ma sabab sakiku. Gom paˈin saginabi aku buwat eˈbi anagina malaˈikat min Tuhan. Bay aku taimaˈbi buwat eˈbi anaimaˈ si Isa Al-Masi bang gantaˈ patibaw ni kaˈam. 15 Ai bay tumaluwaˈ ni kakōganbi tagnaˈ? Saksiˈanta kam, bang sadja makajari, bay kam lillaˈ angalugit matabi panganggantiˈ mataku. 16 Bantahanbi na aku bahāˈ, pagka aku amissala kasabˈnnalan ma kaˈam? 17 Aheya pangannal saga aˈa inān ma kaˈam, sagōˈ aniyaˈ maksud sigām mbal ahāp. Ya kabayaˈan sigām subay kam niokat min aku boˈ amanuyuˈ ma sigām sadja. 18 Ahāp isab bang kam magpanuyuˈ bang paˈin ahāp maksudna. Ahāp bang aku mailu ma kaˈam, sagōˈ labi-labi ahāp bang aku alikut. 19 Kaˈam saga anak-mpuku, kahunitan pikilanku pabīng ma pasalbi, buwat ibarat dˈnda kahunitan bang anganak. Asigpit pikilanku ma pasalbi satˈggol halam giˈ ajatu kajarihan Al-Masi ma deyom pangatayanbi. 20 Aheya kabayaˈanku bang paˈin aku makamailu ma kaˈam buwattinaˈan, boˈ ahanunut pamissalaku ma kaˈam. Sabab alengog pikilanku ma pasalanbi. 21 Aniyaˈ tilawku ma kaˈam: sasuku kam bilahi amogbog panohoˈan-saraˈ, kataˈuwanbi bahāˈ ya tasulat ma deyom Tawrat? 22 Tasulat pasal si Ibrahim, aniyaˈ anakna lˈlla duwa hekana. Dangan inān min atana si Hagar, dangan min si Sara, ya hˈndana poˈon. 23 Ya anakna min ata inān bay nianak buwat panganak kaseheˈ ma dunya itu. Sagōˈ biddaˈ anakna min hˈndana poˈon, ya dˈnda alimaya heˈ, sabab anak panumanan bay panganjanjiˈ Tuhan ma iya. 24 Na buwattitu hatulanna: in duwangan dˈnda itu saliˈ dalil duwa pagsulutan Tuhan maka manusiyaˈ. Jari in pagsulutan dakayuˈ bay min būd Turusina. Bang niralil, ya na si Hagar ya anganakan ata. 25 Si Hagar itu saliˈ dalil būd Turusina mahēˈ ma lahat Arab. Taparalil isab iya ni daˈira Awrusalam ma patahunan ītu, sabab tabanyagaˈ isab saga aˈana. 26 Sagōˈ in daˈira Awrusalam porol, ya ma deyom sulgaˈ, limaya asal. In iya pag-inaˈan ma sasuku kitam angandol ma si Isa. 27 Aniyaˈ ayat Kitab pasal Awrusalam, yuk-i, "Magkōg-koyag ka, arung, minsan ka halam bay makalabay paganak! Angolang ka patanog ma sabab kakōgannu, minsan ka halam bay makananam pˈddiˈ panganak! Sabab aheka lagiˈ anak ma hˈnda kaˈbbahan min anak hˈnda taga-pagholaˈ." 28 Na, saga dauranakan, kaˈam ilu saliˈ dalil anak panumanan janjiˈ Tuhan, buwat si Isaˈak. 29 Bistahunbi bay masa si Ibrahim eˈ. Ya anakna min si Hagar bay nianakan ma buwat paganak kaseheˈ. Aheya paˈin iya, bay iya angalaˈat danakanna, ya nianakan labay min barakat Rū Tuhan. Damikiyanna isab kitam ma buwattinaˈan, aniyaˈ na paˈin pangalaˈat kitam. 30 Kira-kirahunbi ya bay tasulat ma deyom Kitab, yuk-i, "Palaˈanunbi dˈnda ata maka anakna, sabab mbal manjari binahagiˈan pusakaˈ ya pangˈbba anak min hˈnda poˈon, ya alimaya." 31 Manjari itu, saga dauranakanku, nggaˈi ka kitam panganak dˈnda ata. Panganak kitam dˈnda alimaya, ya nggaˈi ka ata.
