1 Sulat itu min aku, si Paul, pinasampay ni kaˈam maglahat ma Galatiya. Kawakilan aku magnasihat sagōˈ nggaˈi ka pangwakil min manusiyaˈ. Nggaˈi ka isāb manusiyaˈ bay anganggˈllal aku. Tuˈud aku kawakilan eˈ si Isa Al-Masi, sampay eˈ Mmaˈtam Tuhan ya bay amakallum ma si Isa min kamatayna. 2 Kami maka dauranakantam maitu, maguyun amabeyaˈ minsan laˈa hal lapal kami ni kaˈam saga jamaˈa si Isa Al-Masi ma baˈanan palhimpunan ma lahat Galatiya. 3 Mura-murahan, bang paˈin kam pinaniyaˈan tatabangan maka kasannangan deyom atay eˈ Mmaˈtam Tuhan sampay eˈ si Isa Al-Masi Panghūˈtam. 4 Bay maglillaˈ amatay si Isa pamapuwas dusatam supaya kitam limaya min kalaˈatan ya taptap nihinang ma ahil jaman itu. Ya na kabayaˈan Mmaˈtam Tuhan subay hinangna. 5 Patut iya pinudji saumul-umul. Amin. 6 Landuˈ aku ainu-inu ma kaˈam. Asaˈut pahāp kam pataikut min Tuhan ya bay ameneˈ kaˈam ma sabab aseˈ maka lasa Al-Masi! Apinda kam magtūy ni lapal saddī! 7 Saguwāˈ halam aniyaˈ kaōnan lapal ahāp bang saddī min lapal pasal si Isa. Atampal asal, aniyaˈ aˈa bilahi anasaw pikilanbi maka amindahan lapal pasal Al-Masi. 8 Minsan kami, minsan isāb malaˈikat min deyom sulgaˈ, bang aniyaˈ amanduˈ lapal saddī min bay panganasihat kami ma kaˈam, aˈa inān subay taluwaˈ mulkaˈ saumul-umul. 9 Balikanku bay pamissala kami dahū: bang aniyaˈ amanduˈ lapal saddī min lapal ahāp ya bay taimaˈbi, aˈa inān subay minulkaˈan. 10 Kira-kirahunbi bang ai mohotku: sanglit min manusiyaˈ atawa sanglit min Tuhan? Kabayaˈanku bahāˈ anulut manusiyaˈ? Bang aku bay bilahi anulut manusiyaˈ, mbal aku niōnan sosohoˈan Al-Masi. 11 Saga danakanku, aniyaˈ pamahatiku kaˈam. Ya lapal pagnasihatku itu nggaˈi ka min pikilan manusiyaˈ ya paluwasanna. 12 Halam bay tasambutku min manusiyaˈ, maka nggaˈi ka manusiyaˈ bay pagguruhanku. Tasambutku asal min si Isa Al-Masi, bay pamabukis ni aku. 13 Kataˈuwanbi pasal kajarihanku tagnaˈ, waktu kapamogbogku ma agama Yahudi, bay apaslod paminjalaˈku ma saga jamaˈa si Isa, ya pinagsambatan palhimpunan Tuhan. Kabayaˈanku subay halam aniyaˈ min sigām takapin allum. 14 Biddaˈ du aku min saga topad-sibuˈku Yahudi bang takdil ni pangisbat ma agama kami. Atuyuˈ lagiˈ aku min sigām amogbog ma usulan bay min kamattoˈahan kami. 15 Sagōˈ tapeneˈ aku eˈ Tuhan ma sabab aseˈna maka lasana tudju ni aku. Pineneˈ asal aku ma halam giˈ bay nianakan. 16 Ya kahandak Tuhan ma aku subay kasakupanku pasal Anakna, boˈ supaya aku makapagnasihat lapal ahāp ma pasalanna ni kabangsahan nggaˈi ka Yahudi. Jari halam bay pangaruhanku sai-sai. 17 Halam aku minsan patukad ni Awrusalam anibaw sigām ya bay kawakilan eˈ si Isa dahū min aku. Bay aku patūy kaleya ni lahat Arab, ati pagubus, pabīng aku ni daˈira Damaskus. 18 Palabay paˈin tˈlluntahun, patukad aku ni Awrusalam boˈ magkataˈu maka si Petros, ati pahantiˈ aku ma iya duwa pituˈ tˈggolna. 19 Saddī min si Petros, halam aniyaˈ taˈndaˈku mainaˈan aˈa kawakilan eˈ si Isa, luwal si Yakub ya siyali Panghūˈtam. 20 Saksiˈku Tuhan, bˈnnal sadja ya panulatku itu. Nggaˈi ka puting. 21 Puwas inaˈan, bay aku pehēˈ ni saga kalumaˈan ma lahat Siriya sampay ma lahat Silisi. 22 Ma waktu inaˈan, mbal aku takilā eˈ saga jamaˈa Al-Masi ya ma baˈanan palhimpunan Al-Masi ma lahat Yahudiya. 23 Ya sadja takale sigām habal pasal kapindaku min bay kajarihanku tagnaˈ. Yuk habal eˈ, "Pinasaplag lapal ahāp eˈ aˈa bay angalaˈat kajamaˈahan si Isa, nirapitan eˈna bowahan pangandol ya bay saggaˈna tagnaˈ." 24 Jari pinudji Tuhan eˈ saga aˈa ya makakale habal pasalan aku.
