1 Na, pagka aku pilisu ma sabab pameyaˈku ma Panghūˈtam, aniyaˈ amuˈku ni kaˈam: angutunbi palantara ya tōp ma sasuku pineneˈ eˈ Tuhan. 2 Subay areyoˈ pangatayanbi, subay ahanunut bissalabi maka subay kam angimanan pagkahibi. Magkaˈinagon kam dangan-parangan, tandaˈ lasabi. 3 Amanuyuˈ kam magsulut-siyuluti boˈ taptap kapagdakayuˈbi atay, ya pamuwan kaˈam eˈ Rū Tuhan. 4 Kitam magpangandol saliˈ dalil pagdayaw baran Al-Masi, boˈ baranna dakayuˈ du. Dakayuˈ du Rū Tuhan maka dakayuˈ du isab pangaholatantam, waktu kapameneˈ Tuhan ma kitam. 5 Dakayuˈ du Panghūˈ, dakayuˈ du pangandolantam, maka dakayuˈ du pagpandi. 6 Dakayuˈ du Tuhan ya pagˈmmaˈan ma binangsa manusiyaˈ kamemon. Magnakuraˈ iya ma kamemon, taˈabut kamemon eˈ kawasana maka itiyaˈ na iya ma deyom ataytam kamemon. 7 Binuwanan kitam kapandayan pakaniya-pakaniya, ai-ai ya panganggantaˈ eˈ Al-Masi. 8 Buwat bay tasulat ma deyom Kitab, ya yuk-i, "Waktu kaˈangkatna ni sulgaˈ aheka pilisu bay tabowana. Ati pamuwanna kahāpan ma manusiyaˈ." 9 Na, buwattitu hatian ya yukna heˈ, "pariyataˈ ni sulgaˈ". Hatina in iya bay pareyoˈ ni dunya itu dahū, ni deyoˈna katapusan, boˈ yampa pariyataˈ. 10 Jari ya aˈa bay pareyoˈ, iya isab bay paˈangkat pabalik ni liyu saga langit, boˈ supaya aliput eˈna kamemon. 11 In iya isāb bay amuwan saga aˈa kawakilan magnasihat, maka aˈa taga-kapandayan amaluwas bissala Tuhan, maka aˈa magpasaplag lapal ahāp, maka aˈa ataˈu amanduˈ maka angupiksaˈ saga jamaˈa. 12 Ya poˈon aniyaˈ kapandayan buwattēˈ ma kajamaˈahan Al-Masi, boˈ supaya asakap saga aˈa sukuˈ Tuhan kamemon maghinang ai-ai, maka supaya pahogot gom paˈin saga pagdayaw ya pagsambatta baran Al-Masi. 13 Jari makaˈabut du kitam kamemon pinapagdakayuˈ atay ma pangandoltam maka ma pangitaˈutam pasal Anak Tuhan. Jari ajatu kitam ma kaul maka piˈil buwat kajatu Al-Masi. 14 Mbal na kitam saliˈ ondeˈ-ondeˈ halam aniyaˈ panahuˈanna, mbal na 'tabowa papˈllay eˈ baliyu atawa goyak,' hatina panduˈ indalupa ginis ya pinahinang eˈ saga guru pangangakkal, panganjallat ma sasuku mbal giˈ asangpot. 15 Padpad kitam kaddasan ma kaondeˈ-ondeˈtam, gom giˈ kitam amanuyuˈ magbissala kasabˈnnalan luwas min lasatam dangan-parangan, ati pasangpot kitam ma kaul maka piˈil boˈ pasaliˈ ni Al-Masi. In iya pagmakōkantam maka kitam sapantun pagdayaw baranna, 16 ati magbatuk-biyatuki baˈanan pagdayaw itu, magsugpat pahāp min ugat ya karalosanna. Jari bang ajatu na kahinangan pagdayaw kamemon, pasulig du katibuˈukantam. Buwattēˈ isab ma kitam baran Al-Masi, maglasa-liyasahi kitam boˈ ajatu kahinangantam dangan maka dangan, ati tantu aniyaˈ kasōngantam. 17 Magbandaˈ aku ma kaˈam sabab aniyaˈ kapatutku min Panghūˈtam. Pahali kam ameyaˈ ma kasuddahan saga aˈa ya mbal magtaˈat ni Tuhan, ya kulang pūs ma pamikil sigām. 18 Kalaungan akkal sigām maka halam aniyaˈ lamud sigām ma kallum ya pamuwan eˈ Tuhan. Tuˈud sigām magmatuwas di-sigām angkan mbal ataˈuwan iya. 19 Mbal sigām ataˈu aiyaˈ, gom paˈin sigām angandūlan di-sigām maghinang kasabulan makamaru. Paddas sigām maghinang kalumuˈan duhun manduhun. 20 Sagōˈ nggaˈi ka buwattēˈ ya pakataˈubi pasal Al-Masi. 21 Tantu kam bay makakale ma pasalna, bay kam pinanduˈan kasabˈnnalanna labay min lapal ahāp pasal si Isa. 22 Angkanna kam subay angˈbba min bay kabiyaksahanbi tagnaˈ. Bbahinbi kajarihanbi tagnaˈ, waktu kam tabowa-bowa eˈ saga napsu baran pangangakkal. 23 Subay kam pinabahaˈu toˈongan ma itikadbi maka panahuˈanbi. 24 Sulugunbi kajarihanbi bahaˈu (sapantun badjuˈ) ya pinaniyaˈan kaˈam eˈ Tuhan boˈ kam makasaliˈ ni iya ma kabontolan maka kasussihan atay. 25 Angkan koˈ kitam subay pataikut min pagputing. Ai-ai pahˈllingta ma pagkahita subay bˈnnal sadja, sabab dambeyaˈan kitam, sapantun pagdayaw baran Al-Masi. 26 "Bang kam gantaˈ angastol, pahalliˈ kam boˈ mbal tabowa angahinang alaˈat." Daˈa buku-bukuhinbi pangastolbi sampay ni kakohapan. 27 Kamayaˈ-mayaˈ kam boˈ halam aniyaˈ lawang pasōran nakuraˈ saitan anasat kaˈam. 28 Bang aˈa bay panangkaw subay angˈbba min pagtangkawna. Subay iya amiha pagusaha alaba, jari bang manglabi-labihan na aniyaˈ du paˈin panulungna ma saga aˈa miskin. 29 Daˈa kam amaluwas bissala asabul. Ai-ai pamissalabi subay panabang sadja ma kaseheˈanbi, pamahāp panghati sigām ma ai-ai kagunahan. Bang buwattēˈ, aniyaˈ kasōngan ma sasuku makakale. 30 Daˈa pabakatunbi atay Rū Sussi min Tuhan, ya pinatulunan kaˈam boˈ aniyaˈ palsaksiˈan in kaˈam pinalimaya du ma llaw damuli. 31 Timaninbi kotoˈ-kotoˈ deyom ataybi kamemon, maka astolbi. Daˈa pakawasunbi ataybi, daˈa kam angamahit atawa angalimut, daˈa isab kam anganjingki ma sai-sai. 32 Saguwāˈ hāpunbi seheˈbi, kaˈaseˈinbi. Magampun-iyampuni kam, buwat bay pangampun kaˈam eˈ Tuhan sabab min Al-Masi.
