1 Ya itu sababanna angkan aku angamuˈ-ngamuˈ ni Tuhan ma pasalbi. Aku si Paul, pilisu Al-Masi ma sabab kaˈam ya bangsa nggaˈi ka Yahudi. 2 Tantu takalebi pasal hinang bay pamaˈatas ma aku eˈ Tuhan sabab min aseˈna maka lasana, hinang pamowa kaˈam ni kahāpan. 3 Bay aku pinabukisan eˈ Tuhan maksudna ya halam bay kinataˈuwan eˈ manusiyaˈ. Bay na kam sulatanku pasal itu, sagōˈ kapuˈutanna hal. 4 Jari bassahunbi sulat itu boˈ tahatibi bang ai bay pinabukis ni aku pasal Al-Masi. 5 Halam itu bay pinataˈu ni manusiyaˈ ma masa awal, sagōˈ pinabukis na eˈ Rū Sussi ni saga aˈa kawakilan maka ni kanabi-nabihan asussi. 6 Ya na itu bay pamabukis eˈ: dambeyaˈan na saga aˈa nggaˈi ka Yahudi maka bangsa Israˈil ma sabab lapal ahāp pasal si Isa Al-Masi ya tapagsabˈnnalbi na. Sapantun sigām pagdayaw baran dakayuˈ-kayuˈ, maka saliˈ-saliˈ sigām pinaniyaˈan janjiˈ pagka sōd si Isa Al-Masi na. 7 Bay aku kabuwanan hinang eˈ Tuhan subay magnasihat lapal ahāp, ati katulunan aku kapandayan min kawasana. 8 Areyoˈ aku min saga aˈa sukuˈ Tuhan kamemon, sagōˈ nihāp aku eˈna. Sinōˈ aku angalapal ni saga aˈa bangsa nggaˈi ka Yahudi pasal anughalaˈ mbal tapulaˈ-pulaˈ ya pamaniyaˈ sigām min Al-Masi. 9 Sinōˈ aku amahati manusiyaˈ kamemon ma pasalan maksud Tuhan bang buwattingga kalˈngngananna. Halam bay pinabukis maksud itu ni sai-na sangay min awal tagnaˈ. Tuˈud bay kinuli-kulihan asal eˈ Tuhan, ya magpapanjari ma kamemon. 10 Jari ya na itu maksud Tuhan: subay pinahati saga bangsa malaˈikat maka bangsa gaˈosan ma diyataˈ ayan pasal kalalom pangitaˈu Tuhan ma indalupa ginis, ya pinaluwas eˈna labay min palhimpunan saga jamaˈa Al-Masi. 11 Ya na koˈ itu maksud Tuhan bay niniyat eˈna dahū lagiˈ min awal tagnaˈ, ya tatuman eˈna labay min si Isa Al-Masi Panghūˈtam. 12 Alimaya na kitam pasōd sampay ni haddarat Tuhan, mbal na tināw sabab Al-Masi ya parakayuˈantam maka pangandolantam. 13 Angkan amuˈku ni kaˈam, daˈa bbahinbi pangimanbi ma sabab aniyaˈ katiksaˈan kalabayanku itu. Ma kahāpbi du angkan subay pagkoyaganbi. 14 Angkanna aku pasujud ma alopan Mmaˈtam Tuhan, 15 ya poˈonan ma pagˈmmaˈan kamemon, ai-na ka ma sulgaˈ, ai-na ka ma dunya. 16 Angamuˈ aku duwaˈa ni Tuhan bang paˈin kam paniyaˈanna kawasa luwas min barakatna mbal tapulaˈ-pulaˈ, labay min Rū-na Sussi ya patˈnnaˈ ma iman-nyawabi. 17 Ya angutku bang paˈin pataptap Al-Masi ma deyom pangatayanbi ma sabab pangandolbi ma iya. Angamuˈ aku junjung isab bang paˈin ahogot lasabi sapantun kayu alalom gamutna, atawa lumaˈ ahāp papaganna. 18 Bang paˈin kam maka aˈa sukuˈ Tuhan kamemon pinaniyaˈan barakat boˈ kasakupanbi lasa Al-Masi, luhana, langana, tahaˈna, maka lalomna. 19 Mura-murahan, bang paˈin kataˈuwanbi lasa itu, ya mbal tatˈkkad eˈ pangitaˈu manusiyaˈ, boˈ supaya kam tinulunan manglabi-labihan min katubus Tuhan. 20 Na, mahaldikaˈ ni Tuhan, ya taga-kawasa maghinang kahāpan ma pangatayanbi paliyu toˈongan min ai-ai amuˈtam maka min ai-ai tahimangkantam. 21 Wajib iya pinagmahaldikaˈan ma deyomantam saga jamaˈana maka ma deyoman si Isa Al-Masi ya parakayuˈantam, waktu ni waktu sampay ni kasaumulan. Amin!
