1 Sulat itu min aku, si Paul, aˈa kawakilan eˈ si Isa Al-Masi min kahandak Tuhan. Pinabeyaˈ sulat itu ni kaˈam palsukuˈan Tuhan ya maglahat ma Epesos, ya ahogot kapagdakayuˈbi maka si Isa Al-Masi. 2 Mura-murahan, bang paˈin kam pinaniyaˈan tatabangan maka kasannangan deyom atay eˈ Mmaˈtam Tuhan maka eˈ si Isa Al-Masi Panghūˈtam. 3 Pudjitam Tuhan, ya Mmaˈ Panghūˈ Isa Al-Masi. Nilidjikiˈan kitam eˈna ma sabab kasōdtam ma Al-Masi, angkan kitam pinaniyaˈan kahāpan indaginis bay min haddarat Tuhan. 4 Sabab pineneˈ kitam eˈ Tuhan ma halam giˈ bay pinapanjari dunya itu, boˈ pasōd ma Al-Masi ati boˈ asussi pangatayantam ma halam aniyaˈ tamaktam ma pangˈndaˈ Tuhan. Lasana ya sababan 5 angkan iya bay agaraˈ min awal lagiˈ in kitam subay tahinangna anak, sabab min kahinangan si Isa Al-Masi. Min kōgna maka bayaˈ angkan buwattēˈ kagaraˈanna. 6 Patut iya sinanglitan ma sabab aseˈna maka lasana ya mbal tapulaˈ-pulaˈ, ya pangahilasna ma kitam labay min Anakna kinalasahan. 7 Nilˈkkat kitam min hukuman ma sabab Al-Masi, labay min lahaˈ sin kamatayna, hatina niampun dusatam eˈ Tuhan. Mamarahi aheya aseˈna maka lasana, 8 - 9 ya pagmurana ma kitam! Nihinang eˈ Tuhan ma buwat maksudna, min pangitaˈuna kamemon maka min panahuˈanna. Pamataˈuna na ni kitam bang ai kamaksuranna, ya bay halam kinataˈuwan eˈ manusiyaˈ dahū, hatina Al-Masi ya kinahandakan eˈ Tuhan anuman maksudna. 10 Ya itu maksud Tuhan, ya pinaniyaˈ ma sinosōng bang maujud na kamemon: in ai-ai pinapanjari kamemon, ai-na ka ma deyom sulgaˈ, ai-na ka ma dunya itu, subay pinapagdakayuˈ ma deyoˈan Al-Masi. 11 Tahinang kamemon ya minaksud maka kinahandak eˈ Tuhan, ati kami ya pineneˈ nihinang palsukuˈanna, pagka sōd ma Al-Masi. Maksudna koˈ itu, min awal tagnaˈ lagiˈ, 12 in kami itu, ya bay dumahū angaholatan Al-Masi, subay amuwan sababan pananglit Tuhan ma sabab kamahaldikaˈna. 13 Buwattēˈ du isab ma kaˈam. Bay kam angandol ma Al-Masi, waktu kakalebi lapal bˈnnal, ya lapal ahāp pasal kalappas kaˈam min hukuman. Maka pamuwan eˈ Tuhan Rū-na Sussi ma kaˈam, buwat bay panganjanjiˈna boˈ aniyaˈ tandaˈ palsaksiˈan in kaˈam sukuˈna na. 14 Rū Sussi itu pamatantu in kitam anambut ai-ai bay panganjanjiˈ Tuhan ma saga aˈana, ati minnēˈ kitam makatantu in aˈa palsukuˈan Tuhan pinalimaya toˈongan du ma sinosōng. Jari sinanglitan Tuhan ma sabab kamahaldikaˈna. 15 - 16 Ya itu sababanna angkan aku mbal pahali magsukul ni Tuhan ma pasalanbi sangay min waktu kakaleku habal pasal pangandolbi ma Panghūˈ Isa maka ma pasal lasabi ma aˈa palsukuˈan Tuhan kamemon. Kinannal na paˈin kam sakahabaˈ waktu kapangamuˈku duwaˈa, 17 ati abut-abut aku angamuˈ junjung ni Tuhan ya pagtuhanan Panghūˈtam si Isa Al-Masi maka pagˈmmaˈantam mahaldikaˈ. Ya pangamuˈku bang paˈin iya amahōp Rū-na ni kaˈam boˈ kam binuwanan panahuˈan alalom maka panghati pasal kahandak Tuhan, ati boˈ pasōng pangitaˈubi ma iya. 18 Amuˈku isab bang paˈin pinasawa akkalbi boˈ kasakupanbi toˈongan bang ai pangaholatanbi angkan kam pineneˈ eˈ Tuhan. Kabayaˈanku isab subay kasakupanbi bang ai pamusakaˈ eˈ Tuhan ma kaˈam saga aˈa palsukuˈanna, hatina saga lidjikiˈ mamarahi ahāp. 19 Bang paˈin isab kataˈuwanbi kawasana landuˈ apaslod, kawasa mbal tapulaˈ-pulaˈ, ya makahāp kitam sasuku angandol ma iya. Dasaliˈ kawasa Tuhan itu maka kosog barakatna 20 ya bay pamakallumna Al-Masi pabīng min kamatayna. Puwas eˈ, pinatingkōˈ iya ma bihing Tuhan tampal ni kowan, mahēˈ ma sulgaˈ. 21 Pinabangsa na iya, alanga toˈongan min binangsa malaˈikat maka min ai-ai kamemon taga-kawasa, min bangsa pananasat maka min pagnakuraˈan indaginis ya ma diyataˈ ayan. Alanga kagˈllal Al-Masi min kagˈllal kamemon, ma dunya itu sampay ma ahirat. 22 Pinatˈnnaˈ eˈ Tuhan ai-ai kamemon ma deyoˈ pād-tapeˈ si Isa boˈ pinagbayaˈan eˈna. Jari ginˈllal iya pagmakōkan ma palhimpunan saga jamaˈana kamemon. 23 ya dalil pagdayaw pamasugpat baranna, ya amuwan kajatuhan ma ai-ai kamemon.
