1 Sulat itu deyoˈ min aku, si Paul, maka min danakantam si Timuti. Kawakilan aku eˈ si Isa Al-Masi min kahandak Tuhan. 2 Pasampayku sulat itu ni kaˈam saga dauranakan ma Kolossa, aˈa asussi taga-pangandol ma Al-Masi. Mura-murahan, bang paˈin kam pinaniyaˈan tatabangan maka kasannangan atay eˈ Mmaˈtam Tuhan. 3 Sakahabaˈ waktu kapangamuˈ-ngamuˈ kami ma pasalanbi, aheya pagsukulan kami ni Tuhan ya Mmaˈ Panghūˈ Isa Al-Masi. 4 Sabab makakale kami habal pasal pangandolbi ma si Isa Al-Masi maka pasal lasabi ma aˈa saga sukuˈ Tuhan kamemon. 5 Angandol kam maka alasa sabab aniyaˈ kaholatan tinauˈan kaˈam ma deyom sulgaˈ. Bay na kam pinakalehan lapal kasabˈnnalan pasal si Isa, ati minnēˈ kataˈuwanbi aniyaˈ niholat. 6 Pasaplag na paˈin lapal ahāp itu ni kaluhaˈan dunya. Aheya du paˈin paluntungan lapal itu ma deyom kaul-piˈil manusiyaˈ, buwat ma kaul-piˈilbi isab sangay min llaw tagnaˈ kakalebi pasal kasi-lasa Tuhan. Tahatibi isab bang ai hatulanna 7 pagka kam pinanduˈan eˈ si Epapras, seheˈ kami kinalasahan ya magbeyaˈ maka kami maghinang panohoˈan Tuhan. Atukid eˈna maghinang ma deyoˈan si Isa Al-Masi, gantiˈ kami. 8 Bay iya amowahan kami haka pasal lasabi ma sabab Rū Tuhan. 9 Angkan na kami halam pahali angamuˈan kaˈam kahāpan ni Tuhan sangay min waktu kapanambut kami lapal pasal kahālanbi. Angamuˈ-ngamuˈ kami tabang ni Tuhan bang paˈin kam binuwanan panghati maka pangitaˈu eˈ Rū-na, boˈ supaya kasakupanbi toˈongan bang ai pangahandak Tuhan ma buwat kaˈam. 10 Manjari ahatul kam ma kaul-piˈilbi buwat kabayaˈan Panghūˈ Isa, ati ai-ai hinangbi makasulut iya maka ajatu kahinanganbi waktu ni waktu, maka pasōng pangitaˈubi pasal Tuhan. 11 Mura-murahan, bang paˈin kam binuwanan kosog eˈ Tuhan deyoˈ min kawasana barakatan, manjari kaimananbi ai-ai minsan buwattingga. 12 Subay kam magkōg-koyag magsukul ni Mmaˈtam Tuhan, ya bay amapatut kaˈam boˈ tataimaˈbi palsukuˈan ma deyom lahat asahaya. 13 Pinuwasan kitam eˈna min deyom kalendoman ya pagbayaˈan nakuraˈ saitan, ati pininda kitam ni pagbayaˈan Anakna kinalasahan. 14 Nilˈkkat na kitam min pagbanyagaˈan nakuraˈ saitan maka taˈampun dusatam. 15 Dasaliˈ Al-Masi maka Tuhan. Mbal taˈndaˈtam Tuhan sagōˈ kasakupanta kajarihanna pagˈndaˈtam Al-Masi. Anak tunggal-kawasa iya, dahū asal min kamemon pinapanjari. 16 Ai-ai kamemon ma deyom sulgaˈ maka ai-ai ma dunya, ya taˈndaˈ eˈ manusiyaˈ maka ya mbal taˈndaˈ, bangsa hibilis maka ai-ai taga-gaˈosan ma diyataˈ ayan, in itu kamemon bay pinapapanjari eˈ Al-Masi, deyoˈ bay min Tuhan. Maka Al-Masi ya taga-kapatut ma kamemon. 17 Asal na iya ma halam giˈ aniyaˈ pinapanjari, maka iya ya angumbangan pinapanjari kamemon boˈ supaya mbal apulag. 18 Pagmakōkan iya ma saga jamaˈana, maka sigām ya buwat ibarat baranna. In iya asal poˈonan kallum ma sigām, maka dahū iya min kamemon pinakallum min kamatay, supaya iya tunggal bangsahan min kamemon. 19 Min kabayaˈan Tuhan isab angkan Al-Masi dasaliˈ maka iya ma kajarihanna kamemon. 20 Ya minaksud asal eˈ Tuhan in ummat pinapanjari kamemon subay maghāp maka iya labay min Anakna. Manjari ai-na ka bangsa ma babaw dunya atawa ma diyataˈ langit, makapagkahāp maka Tuhan ma sabab lahaˈ Anakna bay pabuˈus waktu kamatayna ma hāg. 21 Waktu tagnaˈ, bay kam alawak min Tuhan. Bantana asal kam ma deyom pikilanbi ma sabab kalaˈatan ya hinangbi. 22 Saguwāˈ buwattitu maghāp na kam maka Tuhan sabab min kamatay Al-Masi. Ya maksud Tuhan subay kam magharap maka iya ma asussi pangatayanbi, ma halam aniyaˈ tamak-tamakbi atawa dusa panāˈan kaˈam. 23 Tantu koˈ inān, bang paˈin kam patotog angandol ma Al-Masi. Daˈa bbahinbi lapal ahāp bay takalebi sabab ya na poˈonna angkan aniyaˈ holatbi. Ya na koˈ itu lapal ahāp ya pinasaplagan aˈa kamemon ma kaluhaˈan dunya itu. Aku si Paul taga-kagˈllal min Tuhan magnasihat lapal itu. 24 Kinōgan aku bininasa bang paˈin ma sababanbi, sabab bang aku anandalan kabinasahan, paganap binasaku ni kabinasahan bay kasandalan Al-Masi, ya sasuku halam ajukup. Bay iya anandalan kabinasahan ma sababan saga jamaˈana, ya ibarat baranna. 25 Aku itu tahinang sosohoˈan na eˈ Tuhan boˈ aku anabang ma sasuku magpangandol ma si Isa. Kawakilan aku eˈna anabang kaˈam, sinōˈ aku magnasihat lapalna kamemon. 26 Lapalna itu bay nilimbungan eˈ Tuhan min manusiyaˈ kamemon min masa awal lagiˈ, sagōˈ pamataˈu na buwattinaˈan ni saga aˈa sukuˈna. 27 Sigām sukuˈna ya pinataˈu, boˈ manyatakan saga aˈa ma sabarang bangsa bang ai maksud Tuhan ma manusiyaˈ. Mamarahi ahāp ya bay limbunganna heˈ, ahalgaˈ toˈongan, sagōˈ pinabukis na. Hatina Al-Masi patˈnnaˈ du ma deyom ataytam, angkan aniyaˈ holattam in kitam pinasukuˈan sahaya ma deyom sulgaˈ. 28 Angkanna halam aniyaˈ panganasihat kami saddī min Al-Masi. Ginuna eˈ kami ai-ai tataˈu kami pasal Al-Masi, pamiˈat maka pamanduˈ kami ma aˈa kamemon boˈ supaya sigām dangan maka dangan abontol du ma kaul maka piˈil, pagka ameyaˈ na ma Al-Masi. 29 Ya na itu pagsangsāˈanku na paˈin. Puspusku kosogku, ya bay pamakosog aku eˈ Al-Masi.
