1 Ma waktu inān magheheka na paˈin saga aˈa bebeyaˈan si Isa. Jari aniyaˈ palkalaˈ ma sigām: saga Yahudi ya amissala bahasa Girīk magsaggaˈ maka saga Yahudi porol ma lahat Yahudiya. Ya makalaˈat atay saga Yahudi amissala Girīk inān, in karˈndahan sigām balu takalipat konoˈ ma waktu kapagbahagiˈ balanjaˈ kahabaˈ llaw. 2 Angkan saga bebeyaˈan si Isa kamemon sinōˈ pinatimpuk eˈ sangpūˈ maka duwa aˈa kawakilan ati ahˈlling ni sigām. Yuk-i, "Mbal taluwaˈ bang kami angˈbbahan hinang kami magnasihat palman Tuhan, ati boˈ amahagiˈ saga balanjaˈ. 3 Angkanna, saga dauranakan, subay kam ameneˈ pituˈ lˈlla min deyomanbi ilu, aˈa kahōpan eˈ Rū Sussi, maka taga-pangitaˈu alalom. Bang tapeneˈbi na, patanggung kami ni sigām ya hinang amahagiˈ balanjaˈ itu. 4 Manjari kami itu," yuk aˈa kawakilan eˈ, "amanuyuˈ na paˈin angamuˈ-ngamuˈ ni Tuhan maka anganasihat palmanna." 5 Na, kasulutan aˈa inān kamemon ma bay kagaraˈan eˈ, ati tapeneˈ eˈ sigām si Esteban, aˈa bal-iman maka kahōpan eˈ Rū Tuhan. Tapeneˈ isab si Pilip, si Prokoros, si Nikanur, si Timun, si Parmenas, maka si Nikulas min Antiyuk. Si Nikulas itu nggaˈi ka Yahudi, aˈa ya bay apinda ni agama Yahudi. 6 Ya kapituˈ aˈa itu bay binowa patampal ni saga aˈa kawakilan boˈ niamuˈan tabang min Tuhan. Pinatˈppakan isab sigām tangan, tandaˈ in sigām pinasukuˈan hinang inān. 7 Manjari pasaplag na paˈin palman Tuhan. Pakˈnnop toˈongan heka saga aˈa ameyaˈ ma si Isa ma deyom Awrusalam, maka aheka isab kaimaman ameyaˈ angandol ma si Isa. 8 Si Esteban inān aˈa sidda tinabang eˈ Tuhan, aˈa binarakatan, angkan aheka hinang makainu-inu maka paltandaˈan bay tahinang eˈna ma deyoman saga aˈa ma Awrusalam. 9 Sagōˈ aniyaˈ saga aˈa anaggaˈ iya, jamaˈa min dakayuˈ langgal niōnan Langgal Aˈa Aluhaya. Saga aˈa inān asal min daˈira Kirini maka min daˈira Iskandari. Jari magbeyaˈ sigām maka saga Yahudi kaseheˈ min lahat Silisi maka min lahat Asiya isab, ati amowa magjawab ma si Esteban. 10 Daipara saga aˈa inān mbal makaˈatu ma bissala si Esteban ma sabab pangitaˈu ya asal pamuwan ma iya eˈ Rū Tuhan. 11 Sakali aniyaˈ aˈa saddī tinambahan eˈ saga anaggaˈ inān. Binidjakan sigām, sinōˈ angahaka puting pasal si Esteban. Ya yuk puting sigām, "Bay takale kami aˈa itu amūng-mūng pangkal ma si Musa maka ma Tuhan." 12 Minnēˈ aniyaˈ sasaw ma kahekaˈan aˈa inān maka ma saga pagmattoˈahan maka saga guru saraˈ agama. Angkan sigām pinaˈan anaggaw si Esteban, ati tinandanan iya ni Tumpukan Maghuhukum. 13 Aniyaˈ isab saga aˈa binidjakan eˈ sigām magsaksiˈ puting ma pasal si Esteban. Yuk saksiˈ heˈ, "Aˈa itu mbal pahali amissala kalaˈatan pasal langgaltam sussi itu, maka pasal saraˈ agamatam. 14 Bay iya takale kami ahˈlling in si Isa, aˈa Nasaret eˈ, song angalangkat langgal itu. Maka pinindahan konoˈ eˈna pangaddatan kamemon bay pangˈbba kitam eˈ si Musa." 15 Manjari pinatongan si Esteban eˈ saga aˈa aningkōˈ ma Paghuhukum eˈ, ati tandaˈ eˈ sigām pamaihuˈan si Esteban angaluwa pamaihuˈan malaˈikat.
