1 Makatandan paˈin kami ma halam aniyaˈ baya-baya, aniyaˈ angahakaˈan kami in pūˈ inān niōnan Malta. 2 Asidda kami kinahāpan eˈ saga aˈa Malta inān. Nirokotan eˈ sigām api sabab anagnaˈ na angulan maka ahaggut na, ati pinaˈidda kami kamemon eˈ sigām. 3 Si Paul inān bay animuk engas-engas pangayu, dapˈkkosan. Ma sabuna paˈin amatˈnnaˈ kayu inān ma api, aniyaˈ sowa abisa paluwas sabab min pasuˈna. Jari sowa inaˈan pakeket ma tangan si Paul. 4 Pagˈndaˈ saga aˈa Malta ma sowa inaˈan pagantung ma tangan si Paul, magtūy sigām magupama dangan maka dangan, yuk-i, "Tantu aˈa itu bay amapatay, sabab minsan iya bay makapuwas min deyom tahik, tuˈud mbal katangguhan kadalna." 5 Sagōˈ sowa inān hal pinessekan eˈ si Paul tudju ni deyom api ma halam ainay. 6 Angagad-ngagad na paˈin saga aˈa Malta inān kalu angˈtting tangan si Paul, atawa amatay saruˈun-duˈun. Sagōˈ atˈggol-tˈggol paˈin eˈ sigām angagad, boˈ halam aniyaˈ laˈat tumˈkka ni baran si Paul, apinda pikilan sigām. Yuk sigām, "Dakayuˈ tuhan koˈ aˈa itu!" 7 Na, aniyaˈ ma kasekotan inaˈan saga huma si Publiyus, ya datuˈ ma pūˈ inān. Binowa kami ni humana ati sinagina kami eˈna pahāp-hāp. Pinaˈidda kami eˈna ma deyom tˈllumbahangi. 8 Inaˈan asal mmaˈ si Publiyus palege sabab apasuˈ iya, maka magsungiˈ-sungiˈ. Pasōd si Paul ni deyom bilikna boˈ angamuˈ-ngamuˈ ni Tuhan ma pasalna. Pinatˈnnaˈ isab tangan si Paul ni baran mattoˈa heˈ, magtūy iya kauliˈan. 9 Pagka buwattēˈ, pinaˈan na isab ni si Paul sasuku taga-saki ma pūˈ inān, ati kauliˈan du isab sigām. 10 Aheka bay pamuwan eˈ saga aˈa inān pangahulmat kami, ati song paˈin kami atulak, niruwaˈ eˈ sigām ni kappal ai-ai kagunahan kami palutuˈ. 11 Aniyaˈ kami tˈllumbulan ma pūˈ Malta inān boˈ yampa kami akˈtta minnēˈ. Ya pameyaˈan kami kappal min Iskandari bay palihan ma pūˈ inān tˈggol bay timpu pamaliyu. 12 Atˈkka kami ni daˈira Sirakus, ati tˈllumbahangi ya kahantiˈ kami mainaˈan 13 boˈ yampa kami palaus minnēˈ tudju ni lahat Rigiyum. Pagˈllaw dakayuˈ, baliyu satan na ati duwambahangi boˈ kami atˈkka ni kauman Putiuli. 14 Aniyaˈ tabāk kami saga bebeyaˈan si Isa mainaˈan. Sinōˈ kami paokom ma sigām saga dapituˈ. Puwas eˈ palaus kami amaklay ni daˈira Rōm. 15 Takale paˈin eˈ saga bebeyaˈan si Isa ma Rōm in kami atˈkka na, magtūy sigām bay paˈabut ni tiyanggi Appiyus maka ni kauman Tˈllu-Kadday anampang kami. Pagˈndaˈ si Paul ma sigām, magsukul iya ni Tuhan ati pahogot atayna pabīng. 16 Makatˈkka paˈin kami ni daˈira Rōm, pinabaˈid si Paul maglumaˈan di-na. Aniyaˈ dakayuˈ sundalu anganjagahan iya. 17 Palabay paˈin tˈllumbahangi, nilinganan eˈ si Paul saga kanakuraˈan Yahudi ya maglahat mainaˈan, sinōˈ patimuk. Atimuk paˈin, yuk si Paul ni sigām, "Saga dauranakanku, halam aniyaˈ dusaku ma pagkahiku Yahudi, maka halam aniyaˈ palsaggaˈanku ma pangaddatan kaˈmboˈantam. Sagōˈ minsan buwattēˈ, bay aku sinaggaw sampay pinakalabusu eˈ saga Yahudi ma Awrusalam, boˈ sinōngan eˈ sigām ni pangˈntanan bangsa Rōm. 18 Bay aku sinumariya eˈ saga bagˈllal Rōm. Jari bilahi na sigām amalˈppa aku sabab halam aniyaˈ tapiha eˈ sigām sababan pamapatayan aku. 19 Sagōˈ mbal toˈongan amarūl saga Yahudi heˈ bang aku gantaˈ pinalˈppa, angkan halam aniyaˈ tahimangkanku saddī min mikitukbal ni Sultan Mahatinggi ma Rōm itu. Saguwāˈ, minsan buwattēˈ, halam aniyaˈ panuntutku ma saga pagkahiku Yahudi. 20 Angkan kam bay amuˈku piˈitu boˈ kitam magˈndaˈ maka magbissala, supaya kataˈuwanbi bang ai ya maksudku. Itiyaˈ aku niengkotan maka kilikili ma sabab pameyaˈku ma aˈa dakayuˈ-kayuˈ ya holattam bangsa Israˈil." 21 Yuk saga aˈa magtimukan inān ni si Paul, "Halam kami bay makasambut sulat min lahat Yahudiya ma pasalannu. Halam isab aniyaˈ saga danakantam Yahudi bay piˈitu minnēˈ amowa haka atawa tuhuma alaˈat bang ma sababannu. 22 Sagōˈ bilahi kami akale bang ai kapamˈnnalannu. Sabab kataˈuwan kami, ya panduˈ pameyaˈannu ilu binissalahan na paˈin alaˈat eˈ saga aˈa ma sabarang lahat." 23 Manjari itu, maggaraˈ sigām maka si Paul bang sumiyan pamissalana ma sigām. Taˈabut paˈin llawna, aheka sigām bay pinaˈan ni lumaˈ pahantiˈan si Paul eˈ. Min subu-subu sampay ni kasangoman pinahatian sigām eˈ si Paul maka ninasihatan pasal kapagparinta Tuhan. Tinōˈan sigām bang ai bay tasulat ma deyom Saraˈ si Musa maka ma Kitab Kanabi-nabihan, boˈ sigām kamattanan sampay tabowa magkahagad ma si Isa. 24 Aniyaˈ min sigām tabowa magkahagad ma bissalana, maka aniyaˈ halam. 25 Minnēˈ aniyaˈ pagsuˈal sigām. Ma song paˈin sigām amoleˈ, aniyaˈ giˈ bissala si Paul ma sigām, yukna, "Atumlang na bay pangallam Rū Sussi, ya bay pinalatun eˈ nabi Isaya ni saga kaˈmboˈ-mboˈanbi. 26 Sabab ya itu bay yukna, 'Pehēˈ na ka ni bangsa itu boˈ sigām hakaˈin: Asal kam pakale, sagōˈ mbal tahatibi. Asal kam papatong, sagōˈ mbal tapanhidbi. 27 Sabab saga aˈa itu hal magmatuwas. Tainga sigām bay tinaplokan, mata sigām bay tinambunan. Bang bay nggaˈi ka buwattēˈ, bay du taˈndaˈ eˈ mata sigām, bay takale eˈ tainga sigām. Bay du isab tahati eˈ tawhid sigām, ati pabalik sigām magtaˈat ma aku,' yuk Tuhan, 'boˈ yampa sigām bawiˈku.' " 28 Tinambol eˈ si Paul bissalana, yukna, "Angkan subay kataˈuwanbi, in lapal Tuhan pasal kalappasna ma manusiyaˈ pinasampay na ni saga kabangsahan ya nggaˈi ka Yahudi. Sigām inān angikut du." [ 29 Akatis paˈin eˈ si Paul amissala, magtūy alaˈan saga Yahudi maka eˈ sigām magjawab sidda.] 30 Ma deyom duwantahun, inaˈan si Paul patˈnnaˈ ma lumaˈ bay padjakna. Sinagina eˈna sasuku bay pinaˈan ni iya, 31 ninasihatan na paˈin pasal pagparinta Tuhan, maka pasal Panghūˈ Isa Al-Masi. Atampal eˈna amanduˈ maka halam aniyaˈ makalāng iya. Tammat
