1 Tagaraˈ paˈin in kami subay pinatulak ni Itali, si Paul maka saga pilisu kaseheˈ bay pinajagahan ma si Juliyus, dakayuˈ kapitan ma saga sundalu Rōm. Magnakuraˈ iya ma dambaˈan sundalu niōnan 'Baˈanan sundalu Sultan Mahatinggi'. 2 Paruwaˈ kami ni dakayuˈ kappal min lahat Aramittu, maraiˈ na atulak ni saga lahat paghapit-hapitan ma bihing lahat Asiya. Manjari akˈtta na kami min Kesareya heˈ. Ameyaˈ isab ma kami si Aristarkus aˈa Makidunya min daˈira Tessaloneka. 3 Pagkˈllat paˈin llaw dakayuˈ, pahapit kami ni Sidun. Kinahāpan si Paul eˈ si Juliyus. Pinabaˈid iya anibaw saga bagayna ma lahat Sidun eˈ, boˈ iya tatabang eˈ sigām ma ai-ai kakulanganna. 4 Makalanjal paˈin kami minnēˈ, anusulan kami min limbu pūˈ Kiprus sabab anaggaˈ baliyu. 5 Puwas eˈ palintas kami ni dambilaˈ sˈllang, min dilaut Silisi maka Pampiliya, boˈ yampa kami makatandan ni Mira, dakayuˈ kauman ma lahat Likiya. 6 Aniyaˈ kappal taˈndaˈ eˈ kapitan mahēˈ, kappal min daˈira Iskandari song atulak palanjal ni Itali. Jari pinariyataˈ kami eˈna pinaˈan boˈ atulak na. 7 Agon kami mbal pasōng ma deyom daka pilambahangi. Kahunitan kami tumandan ni kauman Kinidus. Manjari itu, pagka alandos baliyu, mbal kami makasangsang angkan kami palabay min limbu pūˈ Kerete, min dilaut tōng Salmone. 8 Anusul-nusul kami min bihing deya, maka kahunitan kami isab makatˈkka ni loˈok, ya niōnan Parungguˈan Asalamat. Asekot-sekot isab inān ni daˈira Laseya. 9 Pagka atˈggol-tˈggol kami mainaˈan, mbal na kami makalanjal sabab piligdu. Palabay na waktu pagpuwasa ati timpu pamaliyu lagiˈ. Ginaraˈan saga aˈa inān eˈ si Paul, yukna, 10 "Saga tuwan, ma pandogahanku, bang kitam gantaˈ palanjal minnitu, asiya-siya kitam. Piligdu, magkaˈat kappal itu maka duwaˈanna, maka aniyaˈ isab amatay." 11 Sagōˈ kapitan saga sundalu heˈ, tabowa magkahagad ma bissala nakuraˈ kappal maka tag-dapu. Jari halam sigām bay ameyaˈ ma garaˈ si Paul. 12 Ya parungguˈan inān mbal ahāp paglihanan bang saltaˈ timpu pamaliyu, angkan kahekaˈan saga aˈa inān bilahi akˈtta minnēˈ tudju ni lahat Pinik, bang paˈin mura-murahan makatandan, ati boˈ pinalabay timpu pamaliyu mainaˈan. Pinik heˈ dakayuˈ parungguˈan ahāp ma pūˈ Kerete, patampal ni hilagaˈ maka satan. 13 Manjari itu, pagka aniyaˈ baliyu satan mbal sakit akosog, kinabāˈ eˈ saga aˈa inān ahāp na tinawakkalan bay kagaraˈan sigām. Angkan nihellaˈ na sau boˈ yampa kami anusul min bihing pūˈ Kerete. 14 Sagōˈ mbal giˈ atˈggol patumbuk na baliyu min deya, baliyu habagat. 15 Jari katumbukan kami eˈ baliyu. Mbal na tasaggaˈ kami baliyu heˈ, angkan kami pabīng mundaˈ ati hal kami magpatūt laˈa. 16 Makalabay paˈin kami min limbu Kauda, pūˈ-pūˈ arikiˈ, yampa kami makabaggot buti-buti bay tundanan eˈ, sagōˈ kahunitan giˈ kami. 17 Taruwaˈ paˈin buti-buti eˈ sigām ni diyataˈ kappal, magtūy binaggot baran kappal maka kˈllat boˈ mbal pasisa tapiˈna. Puwas eˈ, pagka sigām tināw binowa pasanglad ni katˈbbahan asekot pehēˈ ni Libiya, pinahagmak leha eˈ sigām. Manjari kappal eˈ pinasagaran eˈ sigām tabowa eˈ baliyu. 18 Abinasa kami sidda eˈ goyak angkanna pagkˈllat llaw dakayuˈ, anagnaˈ sigām animanan saga duwaˈan kaseheˈ. 19 Taˈabut paˈin katˈllumbahangina, tinimanan eˈ sigām kapanyapan kappal takapin. 20 Daka pilambahangi kami halam bay makaˈndaˈ mata llaw atawa bituˈun. Halam isab aniyaˈ kahondongan baliyu. Angkan kami mbal na magniyat lappasan. 21 Sakali itu, pagka atˈggol saga aˈa inān halam bay makakakan, anˈngge si Paul ma tˈngngaˈ sigām amissala. "Saga bagay," yukna, "arapun bay beyaˈbi kagaraˈan daˈa subay atulak min pūˈ Kerete. Bang bay aku beyaˈbi mbal kitam bay magkaˈat maka halam aniyaˈ ai-ai alungay. 22 Sagōˈ buwattinaˈan sohoˈta kam paiman, sabab halam du aniyaˈ min kaˈam amatay. Luwal du kappal itu magkaˈat. 23 Sabab dibuhiˈ," yuk si Paul, "aniyaˈ bay panyataˈ ni aku dakayuˈ malaˈikat min Tuhan ya asal pagtaˈatanku. Aku itu palsukuˈanna asal. 24 Yuk malaˈikat ni aku, 'Paul, daˈa ka tināw. Subay ka paharap ni Sultan Mahatinggi. Pinakallum du isab saga seheˈnu ma kappal itu, ma sabab kahāp Tuhan ma kaˈa!' 25 Angkan, saga bagay," yuk si Paul, "subay kam aiman. Sabab angandol aku ma Tuhan in bay pamissalana ma aku maujud du. 26 Sagōˈ tabowa du kitam eˈ baliyu paragsaˈ ni dakayuˈ pūˈ." 27 Manjari itu, taˈabut paˈin sangpūˈ maka mpat bahangi min katagnaˈ badju inān, tapepe na paˈin kami eˈ baliyu ma olangan sˈllang Adriya. Sōng-sōng paˈin tongaˈ bahangi, tapandoga eˈ saga aˈa kappal inān in kami asekot na ni bihing lahat. 28 Angkan tinˈkkad deyoˈ inān boˈ kinataˈuwan bang pila lalomna. Jari tˈkkaranna heˈ aniyaˈ saga duwampūˈ dˈppa. Mbal atˈggol tinˈkkad pabīng, ati sangpūˈ laˈa maka limandˈppa. 29 Tināw sigām tabowa paragsaˈ ni kabatuhan, angkan sigām angahūg mpat sau min buliˈ kappal boˈ yampa sigām aminta-minta bang paˈin alˈkkas pakˈllat llaw. 30 Saga aˈa maghinang ma kappal inān bay pasulay alahi. Magbauˈ-bauˈ sigām angahūg saga sau min mundaˈ kappal, sagōˈ inaˈan sigām bay anontonan buti-buti tudju ni tahik. 31 Sagōˈ ahˈlling si Paul ni kapitan maka ni saga sundalu, yukna, "Bang saga aˈa inān mbal patˈttog ma kappal, magmula du kam!" 32 Angkan kinˈttob eˈ saga sundalu lubid bay panonton buti-buti. Hal pinalˈbbos ni tahik. 33 Apoteˈ paˈin sobangan, nilogos sigām kamemon eˈ si Paul, sinōˈ amangan. Yukna, "Kasangpūˈ na maka mpat bahangi llaw itu ya pagsusabi. Halam kam bay makatimtim ai-ai. 34 Angkan kam logosku subay amangan, boˈ kam makatatas. Sabab minsan hal dalamba buˈunbi mbal du magmula." 35 Akatis paˈin eˈ si Paul ahˈlling, angāˈ iya tinapay ati boˈ pinagsukulan eˈna ni Tuhan ma alopan sigām kamemon. Puwas eˈ pinagpōng eˈna tinapay boˈ iya amangan. 36 Jari itu pahogot atay sigām ati amangan sigām kamemon. 37 Aniyaˈ kami duwa hatus maka pitumpūˈ maka nnom aˈa bay ma diyataˈ kappal eˈ. 38 Makaˈssohan paˈin sigām, tinimanan eˈ sigām ni tahik saga buwas tirigu ya ma deyom mohang, boˈ supaya palantung kappal inān. 39 Pagˈllaw paˈin halam takilā eˈ saga aˈa kappal bang pūˈ ai ya pataˈndaˈ inān, sagōˈ aniyaˈ taˈndaˈ eˈ sigām loˈok taga-gusung ma bihing. Ya paggaraˈ sigām, bang makajari, pinasanglad kappal pinaˈan ni gusung. 40 Angkan kinehet eˈ sigām engkot saga sau, niˈbbahan ma deyom tahik. Nihubaran isab lubid bay pamaggot saga bansān. Puwas eˈ pinatˈngge eˈ sigām leha-leha ma mundaˈ boˈ tabowa eˈ baliyu patandan ni bihing. 41 Sagōˈ makaragsaˈ sigām ni kahanggalan. Amalut mundaˈ kappal, mbal pajudjal, maka buliˈna heˈ abagbag eˈ goyak. 42 Maggaraˈ saga sundalu inān amapatay saga pilisu kamemon boˈ supaya halam aniyaˈ makalangi ni bihing alahi. 43 Sagōˈ nakuraˈ sigām inān mbal bilahi niˈinay si Paul, angkan lāngna saga sundalu, sinōˈ daˈa angalanjalan eˈ-i. Gom paˈin sohoˈna saga aˈa inān, sasuku ataˈu palangi, palaksu dahū ni deyom tahik boˈ palangi kaleya. 44 Saga aˈa kaseheˈan sinōˈ paturul, ameyaˈ pagūng ma papan atawa ma kayu bay magkaˈat ma kappal inān. Manjari tabuwattēˈ kami kamemon, makatandan ni bihing, halam ainay.
