1 "Saga mattoˈa-danakan," yuk si Paul, "kalehunbi daˈawaku." 2 Pagkale sigām bahasa Hibrani ya pamissalana, pahantap sigām boˈ akale pahāp. Jari buwattitu ya pamissalana ma sigām, yukna, 3 "Aku itu aˈa Yahudi. Bay aku nianakan mahēˈ ma daˈira Tarsus, ma lahat Silisi, sagōˈ sulig aku maitu ma Awrusalam. Bay aku magguru ma si Gamaliyal, maka bay aku kapanduˈan pahāp ma saraˈ bay pameyaˈan kaˈmboˈ-mboˈantam. Bay aku amanuyuˈ maghinang ni Tuhan, buwat kapanuyuˈbi kamemon ilu ma buwattinaˈan. 4 Bay pinjalaˈku saga aˈa ameyaˈ ma kalˈngnganan si Isa boˈ supaya sigām pinapatay. Bay sigām saggawku lˈlla maka dˈnda boˈ niˈisi ni deyom kalabusu. 5 Makasaksiˈ Imam Muwallam maka saga palhimpunan mattoˈa kamemon in bissalaku itu bˈnnal sadja. Bay aku pinaniyaˈan eˈ sigām sulat pamapatut, sulat ni saga danakanta Yahudi mahēˈ ma Damaskus. Angkan aku bay pehēˈ ni Damaskus boˈ tasaggawku saga bebeyaˈan si Isa mahēˈ. Pinilisu sigām, binowa ni Awrusalam itu boˈ bininasa." 6 "Jari itu," yuk si Paul, "saga ugtu llaw, asekot paˈin aku ni Damaskus, pataghaˈ sadja aniyaˈ sawa min deyom sulgaˈ anahaya ma sakalibutku. 7 Pahantak aku ni tanaˈ ati aniyaˈ takaleku suwala ahˈlling ni aku, yukna, 'Saul, O Saul! Angay aku pinjalaˈnu?' 8 "Agsai tilawku. 'Sai sa kaˈa ilu, nakuraˈ?' yukku. "Yuk sambungna, 'Aku aˈa Nasaret, ya pinjalaˈnu na paˈin.' 9 "Na, saga seheˈku heˈ," yuk si Paul, "bay makaˈndaˈ sawa itu sagōˈ halam tahati eˈ sigām bang ai pamahˈlling ma aku eˈ suwala inān. 10 Tilawku isab, 'Ai subay hinangku, Nakuraˈ?' "Yuk Panghūˈ inān ni aku, 'Anˈngge ka, boˈ ka palanjal pehēˈ ni Damaskus. Nihakaˈan du ka mahēˈ kamemon ya pamahinang Tuhan ma kaˈa.' 11 Manjari abuta aku eˈ silaw sawa heˈ, angkan aku bay niambit eˈ saga seheˈku pehēˈ ni Damaskus. 12 "Mahēˈ paˈin ma Damaskus aniyaˈ dakayuˈ aˈa niōnan si Ananiyas. Aˈa iya magaˈagama ameyaˈ ma saraˈtam, maka pinagaddatan iya eˈ saga Yahudi kamemon ma daˈira inān. 13 Bay pehēˈ si Ananiyas anˈngge ma atagku. Yukna, 'Saul, magdanakan kita. Makaˈndaˈ na ka pabīng.' Saruˈun-duˈun du aku makaˈndaˈ," yuk si Paul, "ati taˈndaˈku si Ananiyas eˈ. 14 Yukna, 'Saul, tapeneˈ ka eˈ Tuhan ya asal pagtuhanan kaˈmboˈ-mboˈantam, boˈ tataˈunu bang ai kabayaˈanna. Tapeneˈ ka eˈna boˈ supaya taˈndaˈnu Sosohoˈanna Adil, maka boˈ takalenu isab suwalana amissala. 15 Anaksiˈ du ka pasal si Isa. Angahaka isab ka ma aˈa kamemon pasal ai-ai bay taˈndaˈnu maka takalenu. 16 Na, daˈa na ka ananggu,' yuk si Ananiyas ni aku. 'Anˈngge ka boˈ ka pinandi, tandaˈ in kaˈa ma si Isa na. Sabbutun ōn Panghūˈ Isa boˈ ka asussi min paldusahannu.' " 17 "Manjari itu," yuk si Paul, "bay aku pabīng ni Awrusalam itu. Sabuku anambahayang ma deyom langgal pagkulbanan aniyaˈ panyataˈ ni aku. 18 Taˈndaˈku Panghūˈ Isa amissala ni aku. Yukna, 'Paraiˈ-daiˈ ka alaˈan min Awrusalam itu sabab mbal du kinahagad eˈ saga aˈa maitu ya panaksiˈnu ma pasal aku.' 19 " 'Tuwan Panghūˈ', yukku, 'kinataˈuwan asal eˈ saga aˈa itu in aku bay angalatag saga kalanggalan Yahudi boˈ tasaggawku maka tabinasaku sasuku angandol ma kaˈa. 20 Ma waktu kapamapatay saga aˈa ma si Esteban, ya saksiˈnu heˈ, bay aku mahēˈ angahoˈan hinang sigām. Bay aku pamatauˈan sˈmmek saga aˈa bay amapatay iya.' 21 "Sagōˈ anohoˈ giˈ Panghūˈ Isa ma aku, yukna, 'Alaˈan na ka minnitu, sabab papehēˈta ka ni katāhan, ni kabangsa-bangsahan nggaˈi ka Yahudi.' " 22 Akale toˈongan saga aˈa inān ma si Paul sampay tabissalana inaˈan-i, sagōˈ taˈabut paˈin sinibahat eˈna kabangsahan nggaˈi ka Yahudi, magtūy sigām anagnaˈ angamahit pakosog. Yuk sigām, "Papatayunbi aˈa ilu! Mbal iya manjari pinakallum." 23 Inaˈan sigām maggasud na paˈin, anganjabjaban na paˈin badjuˈ sigām, maka eˈ sigām anabulakan bagunbun tudju pariyataˈ. 24 Manjari magpanohoˈan nakuraˈ ma saga sundaluna amowa si Paul ni deyom kutaˈ. Sinōˈ iya niraplosan maka sinumariya boˈ tataˈu bang angay angkan maggasud saga Yahudi heˈ. 25 Kaengkotan paˈin si Paul, song paˈin niraplosan, atilaw iya ni tininti ya anˈngge mainaˈan, yukna, "Patut bahāˈ daplosanbi aˈa Rōm ma halam giˈ bay pinalabay min saraˈ?" 26 Pagkale paˈin itu-i eˈ tininti, pehēˈ iya ni nakuraˈ atilaw. Yukna, "Ai maksudnu ma aˈa itu? Aˈa Rōm koˈ iya!" 27 Angkan pehēˈ nakuraˈ ni si Paul. Yukna, "Hakaˈin aku, aˈa Rōm ka bahāˈ?" "Ahoˈ," yuk si Paul. 28 Yuk nakuraˈ, "Aku itu, aheka sīn bay pamayadku boˈ aku manjari aˈa Rōm." "Sagōˈ aku," yuk si Paul, "aˈa Rōm asal min kapaganak ma aku." 29 Takale paˈin eˈ-i, magtūy pasebog saga aˈa bay arak amariksaˈ si Paul. Sampay nakuraˈ, tināw isab pagtaˈuna in si Paul aˈa Rōm. Sabab iya ya bay magbaran anohoˈ niengkotan si Paul maka kili-kili. 30 Jari bilahi mikihaka nakuraˈ sundalu heˈ bang ai toˈongan panuntut si Paul eˈ saga Yahudi. Angkanna, pagkˈllat llaw dakayuˈ, bay sohoˈna nilaˈanan engkot si Paul. Bay sohoˈna isab magsakaum saga kaimaman alanga maka kamemon saga aˈa min Tumpukan Maghuhukum. Ati pinatampal si Paul ni sigām.
