1 Na, pahali paˈin hiluhalaˈ inān, anambuku si Paul ma saga bebeyaˈan si Isa, sinōˈ patimuk. Amissala iya ma sigām pamatˈttogna pangatayan sigām, boˈ yampa iya amaˈid palanjal ni lahat Makidunya. 2 Nilˈngngan eˈna kalahat-lahatan mainaˈan, maka araran iya amissala ma saga aˈa supaya patˈttogna atay sigām. Puwas eˈ atˈkka na iya ni lahat Akaya, 3 ati tˈllumbulan ya katˈnnaˈna mainaˈan. Sōng paˈin iya pauntas ni jadjahan Siriya, tabistu pasal saga Yahudi magisun amonoˈ iya. Angkan iya agaraˈ amaklay min deya, boˈ pabalik min bay palˈngngananna labay min kaluhaˈan lahat Makidunya. 4 Ya seheˈna inān si Sopater anak si Pirus, aˈa min lahat Bereya, maka disi Aristarkus maka si Sigundu, saga aˈa min Tessaloneka. Ameyaˈ isab si Gayus min Derbe, maka disi Tikikus maka si Trupimus, aˈa min lahat Asiya. Ameyaˈ isab si Timuti. 5 Bay sigām parahū min kami angalagaran kami mainaˈan ma Trowas. 6 Aubus paˈin Hinang Tinapay Halam Pasuligna, atulak kami min Pilipi. Makalabay paˈin limambahangi taˈabut kami saga seheˈ kami mainaˈan ma Trowas. Dapituˈ ya kahantiˈ kami mainaˈan. 7 Taˈabut paˈin sangom Sabtuˈ, magtimuk kami boˈ magbahagiˈan tinapay. Si Paul inān sakap na atulak daiˈ-llaw, angkan iya anganasihatan saga aˈa magtimuk inān sampay ni katongaˈan bahangi. 8 Ya bilik pagtimukan kami inān ma angkap diyataˈ, maka aheka palitaˈan bay mainaˈan. 9 Aniyaˈ mainaˈan dakayuˈ lˈlla abataˈ lagiˈ, ōnna si Utikus, aningkōˈ ma babag tandawan. Manjari itu, pagka pinatahaˈ eˈ si Paul bissalana, kinaruˈ sidda si Utikus itu sampay tatuli. Pagtuli itu, ahūg iya pareyoˈ ni tanaˈ min diyataˈ tˈllu angkap lumaˈ inān. Pagbuhat iya eˈ saga aˈa, asal amatay na. 10 Sagōˈ pareyoˈ si Paul pinaˈan boˈ pakˈppang ni si Utikus maka eˈna anganggapus. Yuk si Paul, "Daˈa kam asusa. Masi giˈ iya allum." 11 Puwas eˈ pabīng si Paul pariyataˈ amahagiˈ tinapay boˈ yampa sigām magkakan. Amissala giˈ iya ma sigām sampay ni karaiˈ-llawan, puwas eˈ atulak na iya. 12 Ya subul bay ahūg inān binowa na eˈ saga seheˈna amoleˈ, allum du isab. Jari pahantap atay sigām. 13 Na, bay na kami parahū min si Paul ni jambatan boˈ ameyaˈ min kappal tudju ni Assos. Ya kapaggaraˈan kami, mahēˈ na ma Assos paruwaˈ si Paul. Min panohoˈanna du isab, sabab hal konoˈ iya amaklay min deya. 14 Makapagbāk paˈin kami ma Assos, magtūy iya paruwaˈ kami ni kappal boˈ palintas tudju ni lahat Mitilini. 15 Akˈtta isab kami minnēˈ, ati pakˈllat llaw dakayuˈ, tumandan kami ni tongod Kiyus. Pagˈllaw dakayuˈ pahapit kami ni Samos, ati pagˈllaw karuwana atˈkka kami ni Militus. 16 Ya garaˈ si Paul subay daˈa pahapit ni Epesos boˈ mbal makalihan mainaˈan ma lahat Asiya. Sabab magdaiˈ-daiˈ iya palanjal tudju ni Awrusalam boˈ tasaˈutna paghinang saga Yahudi ya niōnan Pentekosta. 17 Angkanna, pagtˈkka kami ni Militus, amabeyaˈ lapal si Paul ni Epesos, pinasampay ni saga pagmattoˈahan palhimpunan si Isa. 18 Pagtˈkka paˈin sigām ni Militus, amissala si Paul, yukna, "Kataˈuwanbi kajarihanku tˈggolku bay ma deyomanbi, sangay min tagnaˈ katˈkkaku ni lahat Asiya. 19 Bay aku maghinang ma Panghūˈ Isa ma areyoˈ pangatayanku. Araran bay amˈttak boheˈ mataku. Bay sandalanku katiksaˈan ya pinatˈkka ni aku sabab min pagisun saga Yahudi. 20 Kataˈuwanbi du isab halam bay kaˈlloganku ai-ai bang paˈin makahāp kaˈam. Gom paˈin bay kam nasihatanku sampay panduˈanku, sumaˈan ma kahekaˈan aˈa, sumaˈan isab ma lumaˈbi. 21 Bangsa Yahudi maka bangsa nggaˈi ka Yahudi, bay bandaˈanku saliˈ-saliˈ subay angˈbba toˈongan min dusa sigām boˈ papinda tudju ni Tuhan, maka subay angandol isab ma Panghūˈtam si Isa. 22 "Na buwattinaˈan," yuk si Paul, "itiyaˈ na aku ni Awrusalam ma sabab panohoˈan min Rū Sussi. Mbal kataˈuwanku bang ai makani-aku mahēˈ. 23 Sagōˈ pinataˈu toˈongan aku eˈ Rū Sussi, ma kamemon saga daˈira ya papehēˈanku in aku kinalabusu du maka pininjalaˈ. 24 Sagōˈ mbal kaˈlloganku kallumku bang paˈin tatalusku ai-ai bay panganggantaˈ aku. Bang paˈin isab takatisku hinang bay pamahinang aku eˈ Panghūˈ Isa, hatina magpasaplag lapal ahāp pasal aseˈ maka lasa Tuhan. 25 "Bay na kam talatagku kamemon. Bay kam nasihatanku pagparinta Tuhan. Maka kataˈuwanku na, puwas itu mbal na kitam magˈndaˈ pabalik. 26 Angkan kam hakaˈanku toˈongan ma llaw itu: bang aniyaˈ min kaˈam gantaˈ amutawan ni deyom nalkaˈ, min kaˈam du, angiyas aku. 27 Sabab halam aniyaˈ bay limbunganku min kaˈam. Bay kam pataˈuku pasal niyat maka maksud Tuhan kamemon. 28 Kamayaˈ-mayaˈ kam. Upiksaˈunbi isab saga aˈa kamemon bay pangandol ma kaˈam eˈ Rū Sussi. Upiksaˈunbi saga jamaˈa ma palhimpunanbi ilu, ya bay pinasukuˈ ma Tuhan sabab min lahaˈ si Isa bay min kamatayna. 29 Sabab kataˈuwanku, bang aku alikut na, aniyaˈ du palamud ni kaˈam saga guru putingan, saliˈ hantang eroˈ sidda aesog. Mbal sigām maˈaseˈ ma kaˈam. 30 Minsan min deyomanbi ilu, ma sinosōng aniyaˈ du magputing boˈ supaya aniyaˈ saga bebeyaˈan si Isa tabowa ameyaˈ ma sigām. 31 Kamayaˈ-mayaˈ kam! Entomunbi bay ka-eˈku ma kaˈam. Ma deyom tˈlluntahun alandos bay pˈttak boheˈ mataku ma sababbi, pagka kam bandaˈanku dangan maka dangan llaw-sangom. 32 "Na buwattinaˈan, pajagahanta na kam ma Tuhan. Bang paˈin kam mura-murahan pinahōpan lapalna pasal tabangna, sabab minnēˈ pahogot gom paˈin pangandolbi tudju ni Tuhan. Minnēˈ kam pinaniyaˈan kahāpan, ya asal pamusakaˈ Tuhan ma sasuku ameyaˈ ma iya. 33 Tˈggolku ma kaˈam halam aku bay anganapsuhan altaˈ sai-na, ai-na ka pilakna atawa bulawanna atawa saga sˈmmekna. 34 Kataˈuwanbi du, bay aku magbaran angusaha boˈ aniyaˈ kalluman kami maka saga seheˈku. 35 Ai-ai bay hinangku heˈ bay pamaˈndaˈku kaˈam panunuranbi," yuk si Paul. "Hatina in kitam subay angusaha toˈongan supaya katabangantam saga aˈa ya mbal makausaha. Entomunbi bay bissala Panghūˈ Isa, ya yukna, 'Bang kita amuwan, labi giˈ kakoyaganta min aˈa binuwanan.' " 36 Akatis paˈin eˈ si Paul amissala, magtūy iya angōk-tuˈut magbeyaˈ maka sigām kamemon angamuˈ-ngamuˈ ni Tuhan. 37 Magtangisan sigām kamemon saltaˈ sigām maggapus maka magsiyum, pagka sigām magˈbba na maka iya. 38 Ya makasusa sigām toˈongan, ya bay yukna in iya mbal na taˈndaˈ eˈ sigām pabīng. Manjari sineheˈan iya eˈ sigām tudju ni kappal.
