1 Ma lahat Ikuni paˈin, pasōd si Paul maka si Barnabas ni deyom langgal Yahudi buwat kabiyaksahan sigā. Sidda apaslod bissala sigā angkan landuˈ aheka saga aˈa, Yahudi maka nggaˈi ka Yahudi, amˈnnal ma si Isa. 2 Sagōˈ saga Yahudi ya agagga amˈnnal, bay amidjakan saga aˈa nggaˈi ka Yahudi maka bay amalaˈat atay sigām ni sasuku amˈnnal ma si Isa. 3 Atˈggol-tˈggol ya kahantiˈ disi Paul ma Ikuni. Halam aniyaˈ tāw sigā amissalahan saga aˈa pasal Panghūˈ Isa. Maka si Isa bay amaniyaˈan sigā kawasa pangahinang saga hinang makainu-inu maka saga paltandaˈan, boˈ supaya pinarassaya in lapal sigā pasal kaheya tabang Tuhan. 4 Abahagiˈ duwa saga aˈa ma daˈira heˈ. Aniyaˈ sigām kaseheˈ bay amogbogan saga Yahudi, aniyaˈ isab kaseheˈ amogbogan disi Paul. 5 Jari magisun saga aˈa bangsa saddī maka saga Yahudi, beyaˈ saga pagnakuraˈan sigām. Ya pagisun sigām angalaˈug maka amantung disi Paul. 6 Tataˈu paˈin pagisun itu eˈ disi Paul, magtūy sigā alahi tudju ni daˈira Listara maka daˈira Derbe, ya ma lahat Likauna sampay ni saga kalumaˈan ma sakalibut inaˈan-i. 7 Ati pinasaplag eˈ sigā mainaˈan lapal ahāp pasal si Isa. 8 Sakali itu aniyaˈ aningkōˈ ma Listara inān aˈa akuˈil tapeˈna, halam bay makalˈngngan sangay min kapaganak ma iya. 9 Akale toˈongan aˈa itu ma bissala si Paul. Pinatongan iya pahāp, ati kinataˈuwan eˈ si Paul in aˈa itu taga-pangandol ma si Isa in iya kauliˈan du eˈna. 10 Manjari pinatanog eˈ si Paul suwalana, yukna, "Anˈngge ka pabontol!" Magtūy pabuwang aˈa inān anˈngge maka eˈna lumˈngngan. 11 Pagˈndaˈ baˈanan aˈa inān ma bay tahinang si Paul eˈ, magtūy sigām angolang ma bahasa sigām Likauna, yuk-i, "Itiyaˈ saga tuhan magpasalupa manusiyaˈ pareyoˈ ni kitam." 12 Manjari aniyaˈ ōn tuhan ya pangōn saga aˈa inān ma disi Paul. Si Siyus ya pangōn sigām ma si Barnabas, maka si Hermes ya pangōn sigām ma si Paul sabab in iya bibissalahun. 13 Ya lumaˈ pangarapan ma tuhan Siyus, inaˈan ma luwasan lawang daˈira. Manjari aniyaˈ sapiˈ mandangan ginuyud ni atag lawang inan eˈ imam maghinang ni tuhan Siyus. Aniyaˈ isab tuhugan sumping tabowana sabab in iya maka kahekaˈan aˈa inān bilahi anumbaliˈ sapiˈ pangahulmat sigām ma disi Paul. 14 Sagōˈ pagtaˈu si Barnabas maka si Paul bang ai song nihinang eˈ saga aˈa inān, magtūy gineret sˈmmek sigā, tandaˈ sin susa sigā. Sakali paragan sigā ni tˈngngaˈ pagtimukan aˈa inān maka eˈ sigā angolang, yuk-i, 15 "Oy, saga tuwan! Angay buwattilu hinangbi ma kami? Manusiyaˈ du kami buwat kaˈam. Ya poˈon kami piˈitu sabab lapal ahāp ya pangahaka kami ma kaˈam, supaya kam pataikut min pagtuhananbi ilu, ya halam aniyaˈ kapūsanna. Bay kami piˈitu boˈ kam papinda ni Tuhan ya kakkal salama-lama, ya bay amapanjari langit maka gintanaˈan maka tahik sampay kakayaˈ-kayaˈanna kamemon. 16 Ma masa awal in kabangsa-bangsahan kamemon bay pinasagaran eˈ Tuhan ameyaˈ ma ai-ai kabayaˈan sigām. 17 Sagōˈ minsan buwattēˈ, aniyaˈ na paˈin saksiˈ pamamattan manusiyaˈ pasal kapagtuhanna. Pinaˈndaˈan eˈna kahāpna, binuwanan kam ulan pamusug tinanombi boˈ aniyaˈ buwaˈna bang taˈabut musimna. Pinaniyaˈan kam pagkakan aheka, maka pinalasig ataybi." 18 Minsan buwattēˈ pamahati disi Paul mbal agon pahawid saga aˈa. Subay magkulban toˈongan ni sigām. 19 Manjari itu aniyaˈ atˈkka ni daˈira Listara heˈ saga Yahudi bay min Antiyuk ma Pisidiya maka aniyaˈ min Ikuni. Jari tabowa-bowa eˈ sigām saga katimukan aˈa inān, ati pinagbantung si Paul. Puwas eˈ ginuyud iya eˈ sigām tudju paluwas min kalumaˈan inān pagka kinabāˈ amatay na. 20 Sagōˈ kapagtimukan paˈin si Paul eˈ saga bebeyaˈan si Isa, magtūy iya anˈngge boˈ pabīng ni deyom daˈira. Pagkˈllat llaw dakayuˈ, palanjal iya maka si Barnabas tudju ni Derbe. 21 Mahēˈ paˈin sigā ma Derbe, ninasihat eˈ sigā lapal ahāp ni saga aˈa mahēˈ, ati aheka tabowa ameyaˈ ma si Isa. Puwas eˈ, pabīng sigā ni Antiyuk labay min Listara maka Ikuni. 22 Pinahogot eˈ disi Paul iman saga bebeyaˈan si Isa mahēˈ. Sinōˈ sigām patˈttog angandol ma Tuhan. Yuk panduˈ disi Paul, "Subay aheka katiksaˈan kalabayanta boˈ kita pinasōd ni deyom pagparintahan Tuhan." 23 Aniyaˈ aˈa ginˈllal eˈ sigā pagmattoˈahan saga jamaˈa si Isa Al-Masi, maingga-maingga aniyaˈ lahat pagtipunan sigām. Amuwasa disi Paul sampay angamuˈ-ngamuˈ boˈ pajagahanna saga aˈa inān ma Tuhan, ya pangandolan na eˈ sigām. 24 Tauntas paˈin lahat Pisidiya eˈ disi Paul, atˈkka sigā ni Pampiliya. 25 Palanjal isab ni daˈira Perga, boˈ ninasihat eˈ sigā lapal Tuhan mainaˈan. Puwas eˈ palūd sigām tudju ni Attali. 26 Aleha na sigā minnēˈ boˈ pabīng ni Antiyuk dakayuˈ, ni saga bebeyaˈan si Isa ya bay amajagahan sigā ma Tuhan boˈ makahinang ai-ai pangahandakna. 27 Makatandan paˈin sigā ni Antiyuk, pinatipun eˈ sigā saga jamaˈa si Isa mainaˈan. Nihakaˈan sigām eˈ disi Paul kamemon bay tahinang sigā, ma sabab tabang min Tuhan. Kabuwanan labayan konoˈ saga bangsa nggaˈi ka Yahudi boˈ supaya makapangandol ma si Isa. 28 Atˈggol disi Paul paralahat ma saga bebeyaˈan si Isa mainaˈan ma Antiyuk.
