1 Sulat min si Lukas ni si Teyopilus. Tuwan Teyopilus, ma sulat bay sulatanku kaˈa dahū, bay pangahakaku saga hinang maka panduˈ si Isa kamemon, sangay min tagnaˈ kapaghinangna 2 sampay ni llaw bay pamaˈangkat iya tudju ni sulgaˈ. Ma halam giˈ iya bay paˈangkat, aniyaˈ saga panohoˈan pangˈbba eˈna ma saga aˈa bay kawakilanna, labay min Rū Sussi. 3 Puwas paˈin kamatay si Isa, ma deyom mpatpūˈ llaw araran iya magpanyataˈ magbaran ni saga aˈa bay kawakilanna. Min heka iya amaˈndaˈan di-na boˈ mattan toˈongan in iya asal allum. Taˈndaˈ iya eˈ sigām ati ma deyom mpatpūˈ llaw heˈ, amissala iya ni sigām pasal kapagparinta Tuhan. 4 Aniyaˈ isab waktu kapagsalu si Isa maka saga mulidna inān, pasaltaˈ magpanohoˈan iya ma sigām, yukna, "Daˈa giˈ kam alaˈan min daˈira Awrusalam. Lagarinbi dahū paljanjiˈan Mmaˈku ya pamuwanna ma kaˈam, buwat bay pamataˈuku ma kaˈam. 5 Si Yahiya heˈ, boheˈ ya bay pamandina saga aˈa. Sagōˈ saddī ya pamandi kaˈam. Palabay daka pilangˈllaw, pinahōpan du kam Rū Sussi." 6 Manjari itu, magtimuk paˈin sigām maka si Isa, atilaw sigām ni iya. "Tuwan Panghūˈ," yuk sigām, "ya na itu bahāˈ waktu pamabīngnu ni bangsa kami Israˈil ya bay kapatut kami tagnaˈ angˈntanan pagparinta?" 7 Yuk sambung si Isa, "Mbal kam makataˈu pasal ilu-i, sabab Mmaˈku sadja ya taga-kapatut amatˈnnaˈ waktu maka masa. 8 Saguwāˈ," yuk si Isa, "kabuwanan du kam kawasa ma waktu kahōp Rū Sussi ni kaˈam, ati magpasabˈnnal kam ma pasalku ma daˈira Awrusalam itu, ma kaluhaˈan lahat Yahudiya, ma lahat Samariya, sampay ma mpat pidju alam." 9 Aubus paˈin pamissala si Isa, tabowa iya paˈangkat ni sulgaˈ, ma sabu sigām magpangˈndaˈ. Sakali kalimbuhan iya eˈ gabun, halam na taˈndaˈ eˈ sigām. 10 Masi na paˈin sigām angˈndaˈ papatong ni langit hinabu si Isa paˈangkat, jari aniyaˈ duwangan lˈlla magpamakay poteˈ anˈngge ma atag sigām. 11 Yuk duwangan itu ni sigām, "Kaˈam saga aˈa Jalil! Angay kam magtˈnggehan na paˈin papatong tudju ni langit? Si Isa, ya bay pinaˈangkat min kaˈam tudju ni sulgaˈ, pabīng du, boˈ kabīngna piˈitu magsaliˈ maka buwat bay kaˈangkatna, ya taˈndaˈbi itu." 12 Sakali amoleˈ na saga aˈa kawakilan eˈ min būd Kayu Jaitun tudju ni Awrusalam, saga dakilometro lawakna. 13 Makatˈkka paˈin sigām ni Awrusalam, magtūy sigām pariyataˈ ni bilik paghantiˈan. Ya mainaˈan disi Petros, si Yahiya, si Yakub, si Andariyas, si Pilip, si Tomas, si Bartolome, si Matiyu, si Yakub anak si Alpa, si Simun ya niranglay Pangangatu, maka si Judas dakayuˈ ya anak si Yakub. 14 Araran sigām magtipun angamuˈ-ngamuˈ ni Tuhan. Pabeyaˈ isab ma sigām saga karˈndahan, sampay si Mariyam inaˈ si Isa maka saga danakan si Isa lˈlla. 15 Na mbal atˈggol minnēˈ, magtipun saga aˈa magpangandol ma si Isa. Aniyaˈ sigām kulang-labi dahatus maka duwampūˈ. Manjari anˈngge si Petros ma tˈngngaˈ-tˈngngaˈ sigām amissala. 16 "Saga dauranakanku," yukna, "wajib subay aniyaˈ kamaksuran ma lapal Rū Sussi, ya bay pinasulat ma si Daˈud ma pasal si Judas. Si Judas Iskariyut, ya na bay anuliˈan saga aˈa anaggaw si Isa. 17 Si Judas itu bay danseheˈan maka kitam. Bay iya kawakilan isab eˈ si Isa maghinang buwat hinangtam." 18 Ya sīn bay panamba si Judas ma hinangna alaˈat, ya pamasaggawna si Isa ni saga bantana, bay pamˈllina tanaˈ. Tabˈllina paˈin tanaˈ heˈ, ahūg iya pareyoˈ minnaˈan ati abustak bˈttongna. Paluwas tinaˈina kamemon. 19 Kinataˈuwan itu eˈ aˈa kamemon ma Awrusalam, angkan tanaˈ inān niōnan eˈ sigām Akeldama, ma buwat bahasa Yahudi, hatina 'Tanaˈ Tamba Lahaˈ.' 20 "Na," yuk si Petros, "aniyaˈ tasulat ma deyom Kitab Jabul, ya yuk-i, 'Bang paˈin asiya-siya palahatanna. Subay halam aniyaˈ patˈnnaˈ mainaˈan pabīng.' Maka aniyaˈ isab ayat dakayuˈ, yuk-i, 'Subay aniyaˈ aˈa saddī pagantiˈ ma bay hinangna heˈ.' " 21 - 22 Amissala giˈ si Petros, yukna, "Angkanna subay aniyaˈ ginˈllal saddī ameyaˈ ma kitam anaksiˈ in Panghūˈ Isa allum na pabīng. Ya subay pineneˈ aˈa bay seheˈtam ma waktu kapagbeyaˈ Panghūˈ Isa maka kitam, min waktu bay kapamandi aˈa eˈ si Yahiya sampay ni llaw kaˈangkat si Isa min kitam tudju ni sulgaˈ." 23 Sakali itu sinabbut eˈ sigām ōn duwangan lˈlla pameneˈan. Dakayuˈ inān si Yusup, ya niōnan si Barsabbas (atawa si Justus), maka dakayuˈ si Mattiyas. 24 Angamuˈ-ngamuˈ disi Petros ni Tuhan, yuk sigām, "O Tuhan, kataˈuwannu bang ai ma deyom pikilan manusiyaˈ kamemon. Panduˈin kami bang sai peneˈnu ma duwangan itu 25 gantiˈ si Judas, boˈ tahinangna hinang ya pamasukuˈnu ma saga aˈa kawakilan. Sabab hinang itu bay niˈbbahan eˈ si Judas, pagka waˈi na iya amoleˈ ni lahatna kakkal." 26 Puwas inaˈan magkoˈot-koˈot na sigām ōn aˈa pameneˈan. Ya takoˈot inān ōn si Mattiyas, jari pinakˈnnop iya ni kasangpūˈ maka ssa ya bay kawakilan si Isa inān.
