1 Sulat itu min aku, dakayuˈ pagmattoˈahanbi, pinasampay ni si Gayus, bagay kalasahanku sabˈnnal-bˈnnal. 2 Bagay, ya amuˈku ni Tuhan bang paˈin ahāp labayannu kamemon, bang paˈin ahāp anggautaˈnu, pinasaliˈ ni kahāp ataynu tudju ni Tuhan. 3 Landuˈ aku kinōgan pagka aniyaˈ saga danakanta bay atˈkka piˈitu angahakaˈan aku ma pasalannu. In kaˈa konoˈ ahogot toˈongan pamalutnu ma panduˈ bˈnnal. Atˈttog asal pameyaˈnu ma kalˈngnganan bˈnnal. 4 Halam aniyaˈ makalasig atayku liyu min habal pasal saga panganakku ameyaˈ na paˈin ma kalˈngnganan bˈnnal. 5 Bagay, atuyuˈ asal ka ma hinangnu amatuntul saga danakanta bebeyaˈan Al-Masi, minsan aˈa mbal takilānu. 6 Sinuli-suli lasanu eˈ sigām ni saga jamaˈa Al-Masi ma palhimpunan itu. Ahāp asal hinangnu amatuntul saga inān song sigām pauntas ni palˈngnganan sigām. Makasulut Tuhan koˈ ilu. 7 Saga aˈa itu bay angalanjalan lˈngngan sigām ma sabab ōn si Isa ya panabbutan sigām, maka halam aniyaˈ tabang tasambut sigām min aˈa ya mbal magkahagad ma si Isa. 8 Patut kita angayuput saga aˈa buwattēˈ, boˈ aniyaˈ lamudta ma hinang sigām magnasihat panduˈ bˈnnal. 9 Bay na aku amabeyaˈ sulat ni saga jamaˈa si Isa Al-Masi mailu, sagōˈ si Diyutripi, ya bilahi magmakōk ma palhimpunan sigām, mbal toˈongan angasip. 10 Angkan bang aku piˈilu bangkilku du bay hinangna maka bay pangalimutna mˈssaˈ biddaˈ ma pasalan kami. Maka mbal giˈ iya kaˈamuhan ma hinangna buwattēˈ, angkan paruhunna gom paˈin. Mbal taimaˈna saga dauranakanta ya pahapit piˈilu magnasihat, maka nilāng eˈna sasuku bilahi anaimaˈ, pinaokat isab min palhimpunanbi! 11 Bagayku kalasahanku, daˈa sengorin addat-tabiˈat alaˈat. Sengorin addat-tabiˈat ahāp. Sasuku maghinang kahāpan sukuˈ Tuhan iya, sagōˈ sasuku maghinang kalaˈatan halam aniyaˈ kataˈuna ma Tuhan. 12 Si Dimitri ilu sinaksiˈan sangkahāpan eˈ aˈa kamemon, maka saksiˈ sigām maguyun du maka kasabˈnnalan. Kami isab saksiˈna, maka kataˈuwannu in saksiˈ kami bˈnnal sadja. 13 Aheka giˈ pangahakaku kaˈa sagōˈ mbal aku bilahi amatahaˈ sulat itu. 14 Aholat aku makasaˈut piˈilu magˈndaˈ maka kaˈa boˈ kita makapagtampal bissala. 15 Mura-murahan, bang paˈin ka kaniyaˈan kasannangan deyom atay. Amabeyaˈ kamemon saga bagay kami maitu minsan laˈa hal lapal sigām. Hakaˈin saga bagay kami mailu dangan maka dangan, in sigām masi nientom. Wassalam
