1 Sulat itu min aku, si Paul. Kawakilan aku eˈ si Isa Al-Masi sabab min kabayaˈan Tuhan, sinōˈ magnasihat ni saga aˈa pasal kallum kakkal ya bay paljanjiˈan Tuhan ma sasuku parakayuˈ ma si Isa Al-Masi. 2 Pasampayku sulat itu ni kaˈa, Timuti. Saliˈ ka anakku kinalasahan. Mura-murahan, bang paˈin ka pinaniyaˈan tatabangan maka kasannangan deyom atay eˈ Mmaˈta Tuhan maka Panghūˈta si Isa Al-Masi. Bang paˈin ka kinaˈaseˈan isab. 3 Magsukul aku ni Tuhan, ya paghinanganku. Maghinang na paˈin aku ma iya ma abontol itikadku, buwat bay paghinang kamattoˈahanku ma masa awal eˈ. Magsukul aku ni Tuhan ma sababnu, Timuti, pagka taentomta ka ma waktu kapangarapku ni Tuhan llaw maka sangom. 4 Bang taentomku bay panangisnu ma waktu katulakku, landuˈ aku bilahi magˈndaˈ maka kaˈa pabalik supaya aku kinōgan toˈongan. 5 Taentomku isab kapangandolnu sabˈnnal-bˈnnal ma si Isa Al-Masi, buwat bay pangandol mboˈnu dˈnda si Loyda maka bay pangandol inaˈnu si Yunis. Tatantuku isab in kaˈa taga-pangandol buwattēˈ. 6 Ya itu poˈonna angkan ka paentomanku pasal kapandayan bay pamuwan kaˈa eˈ Tuhan, waktu kapatˈnnaˈku tanganku ma kaˈa. Pajatuhun kapandayannu ilu 7 sabab nggaˈi ka tāw ya pamahōp Tuhan ma pangatayantam, sagōˈ kawasa, maka lasa ma pagkahi, maka pamaggat napsu. 8 Daˈa ka aiyaˈ magsabˈnnal ni aˈa pasal Panghūˈtam si Isa Al-Masi. Daˈa ka isab aiyaˈ ma pasalku, pagka aku ma deyom kalabusu itu ma sabab pameyaˈku ma Al-Masi. Sagōˈ maglillaˈ sadja ka ameyaˈan aku anandalan kasigpitan ma sabab lapal ahāp pasal si Isa Al-Masi. Pinakosog du ka eˈ Tuhan boˈ kasandalannu. 9 Lappasan na kitam eˈna min hukuman dusa, tapeneˈ kitam boˈ kitam tahinang aˈa sukuˈna. Nggaˈi ka koˈ itu tungbas ma sabab aniyaˈ bay hinangtam ahāp, sagōˈ ma sabab aniyaˈ lasana maka aseˈna tudju ni kitam. Ya asal mohotna ma halam giˈ tapapanjari dunya, in kitam manusiyaˈ asal kalasahanna maka kaˈaseˈanna sabab min kahinangan si Isa Al-Masi. 10 Aˈawam kitam tagnaˈ sagōˈ pinabukis na ma buwattinaˈan, sabab makapiˈitu na ni dunya si Isa Al-Masi, ya Manglalappas. Tagaˈos eˈna kosog kamatay ati kaniyaˈan kitam kallum kakkal ni kasaumulan luwas min lapal ahāp. 11 Kawakilan aku eˈ Tuhan, sinōˈ magnasihat maka magpanduˈ lapal ahāp. 12 Ya na itu sababna angkan aku katiksaˈan ma deyom kalabusu itu, sagōˈ mbal aku aiyaˈ sabab kataˈuwanku du bang sai ya pangandolanku. Maka tatantuku isab in iya makakoleˈ anganjagahan kamemon bay pangandolna ma aku, sampay taˈabut llaw pabalikna ni dunya. 13 Isbatun toˈongan saga panduˈ bˈnnal bay pamanduˈku ma kaˈa. Panunurin pahāp. Pahogotun pangandolnu ma si Isa Al-Masi maka kalasahin isab pagkahinu, pagka si Isa Al-Masi ya parakayuˈantam saliˈ-saliˈ. 14 Tauˈun panduˈ ahāp ya bay pangandol Tuhan ma kaˈa, pagka ka tinabang eˈ Rū Sussi, ya patˈnnaˈ ma deyom ataytam. 15 Kataˈuwannu, Timuti, bay aku siniya-siya eˈ saga bebeyaˈan si Isa ma lahat Asiya itu, sampay eˈ si Pigilus maka si Hermogen. 16 Saguwāˈ mura-murahan bang paˈin disi Onesepor magtaiˈanak kinaˈaseˈan eˈ Tuhan, sabab araran iya bay amalasig pangatayanku. Halam iya bay aiyaˈ anibaw aku minsan aku ma deyom kalabusu. 17 Sagōˈ pagtˈkkana piˈitu ni daˈira Rōm, magtūy pinuspusan eˈna kosogna amiha aku sampay aku tabākna na. 18 Mura-murahan, bang paˈin iya kinaˈaseˈan eˈ Tuhan ma llaw kabalik si Isa Al-Masi piˈitu angahukum manusiyaˈ. Kataˈuwannu du bang buwattingga bay katabang si Onesepor itu ma aku, waktu kamahēˈku giˈ ma daˈira Epesos eˈ.
