1 Ma waktu palabay inān aniyaˈ saga aˈa magnabi-nabi di-sigām bay patuwaˈ ni bangsa kami. Damikiyanna isab ma kaˈam, aniyaˈ du patuwaˈ ma deyomanbi aˈa maglaku-laku in sigām guru, boˈ paˈin mbal bˈnnal pagguru sigām. Binowahan kam eˈ sigām panduˈ amakaˈat pangandolbi ma si Isa. Pinaliluhan eˈ sigām Panghūˈtam si Isa, ya bay angalˈkkat sigām min najaˈ. Sakadjap sadja mulkaˈ ma saga aˈa buwattēˈ. 2 Sagōˈ aheka aˈa ameyaˈ-meyaˈan sigām maghinang kasabulan makatamparasa. Ya heˈ poˈonna angkan binissalahan laˈat bowahan kasabˈnnalan ya pameyaˈantam. 3 Saga guru mbal bˈnnal itu napsuhan sidda, angkan kam pinakalehan saga kissa bay pahinang-hinang sigām, boˈ kam kapanguntungan eˈ sigām. Sagōˈ in hukuman ma saga aˈa inān sakap asal sangay min awal. Mbal atuli mulkaˈ ya tinagamahan sigām. 4 Minsan saga malaˈikat dusahan, halam sigām bay kinaˈaseˈan eˈ Tuhan. Gom paˈin nilarukan eˈna ni nalkaˈ ati kinabbat sigām mainaˈan ma deyom lendom bitu-bituhan, boˈ angalagaran llaw hukuman. 5 Damikiyanna isab saga aˈa bay mbal magmatāw ma Tuhan ma masa awal eˈ, halam sigām bay kinaˈaseˈan eˈ Tuhan, gom paˈin sigām pinatumbukan latap ma sakalingkal dunya. Luwal disi Nū bay hampananna, iya maka seheˈna pituˈ puhuˈ. Ma halam giˈ latap inān, bay ninasihatan eˈ si Nū baˈanan aˈa inān pasal pangatayan sigām subay pinabontol. 6 Bay tinunuˈ isab eˈ Tuhan daˈira Sodom maka Gomora, pangahukumna ma karusahan saga aˈa mainaˈan. Minnēˈ aniyaˈ kapamintāngan saga aˈa kaseheˈan bang ai kamattihan sasuku mbal angisbat Tuhan. 7 Hal si Lōt ya bay pinuwas eˈ Tuhan min saga daˈira inān. Bay ahantap addat-tabiˈatna angkan asasaw pikilanna eˈ saga aˈa pangalanggal saraˈ mainaˈan, sabab hal magbaˈisan. 8 Bay iya patˈnnaˈ ma tˈngngaˈ-tˈngngaˈ sigām angˈndaˈ ma palantara sigām, akale ma himumungan sigām kahabaˈ llaw, ya poˈon abakat atayna eˈ kalaˈatan sigām. 9 Kamattanan kitam min si Nū maka si Lōt in Panghūˈ ataˈu angalappas min deyom katiksaˈan sasuku ameyaˈ ma kabayaˈanna. Ataˈu isab iya anambolan saga aˈa dusahan ma deyom kabinasahan sampay taˈabut llaw hukuman. 10 Lubaˈ-lagiˈna na bang aˈa magdūl-bayaˈan napsu sigām landuˈ asammal, maka mbal magaddat ma sai-sai taga-pagbayaˈ. Atawakkal makalanduˈ saga guru nggaˈi ka bˈnnal itu, maka mamarahi sidda pagmalangkahi sigām. Mbal sigām magaddat ma saga bangsa sulgaˈ, gom paˈin magtunggīng. 11 Labi agaˈos maka akawasa saga malaˈikat min guru putingan itu, sagōˈ minsan malaˈikat, mbal du amahˈllingan laˈat ma pagkahi sigām bangsa sulgaˈ bang taˈabut waktu kapangaharap sigām ni Panghūˈ. 12 Sagōˈ saga guru itu amahˈlling pangkal ma mbal tahati eˈ sigām. Nihinang eˈ sigām ai-ai makani-pikilan sigām, buwat hantang sattuwa talun ya halam taga akkal, hal sinaggaw boˈ pinapatay. Buwattēˈ isab kadal saga aˈa buwattēˈ, magmula du. 13 Katungbasan sigām kalaˈatan ma sabab kalaˈatan ya bay tahinang sigām. Ya makahāp palasahan sigām bang magdūlan napsu sigām sampay ma mata mairan. Ya na paˈin pagkōg-koyagan sigām bang angakkalan kaˈam ma waktu kapagsalubi maka sigām. Tinamakan kam eˈ sigām, binuwanan kamaruhan. 14 Tagihan sigām angˈndaˈ-ngˈndaˈ ma saga dˈnda ya pagbaˈisan sigām, mbal toˈongan sinumu magdusa. Binidjakan eˈ sigām ni kalaˈatan saga aˈa mbal ahogot pangandolna. Kabiyaksahan sigām maghawa napsu ma indaginis. Pagmulkaˈan Tuhan saga aˈa inān! 15 Bay na sigām pasaddī min palˈngnganan abontol, alopas na min paglabayan. Ya panunuran sigām nabi bay ma masa awal, ōnna si Balaˈam anak si Beyor. Si Balaˈam heˈ bay bilahi tinambahan sīn ma sabab kahinanganna alaˈat, 16 sagōˈ pinabukagan iya eˈ kuraˈ ma sabab dusana. Kuraˈ heˈ bay magsuwala buwat suwala manusiyaˈ, angkan halam kalanduˈan eˈ si Balaˈam karupanganna. 17 Halam aniyaˈ pūs pagguru saga aˈa itu. Saliˈ sigām sapantun tuburan boheˈ atˈggang, atawa gabun tabowa paleyang eˈ baliyu. Aniyaˈ lahat tinagamahan sigām eˈ Tuhan ma lendom bitu-bituhan. 18 Bowaˈan sidda sigām, pangangabbu, sagōˈ halam aniyaˈ pūs bissala sigām. Niumpanan eˈ sigām saga aˈa bahaˈu bay angˈbba min kasāˈan ya kabiyaksahan pagkahi sigām. Pinabilahi sigām angandūlan bayaˈ napsu sigām makatamparasa. 19 Bang ma janjiˈ saga guru itu, limaya sasuku ameyaˈ-meyaˈan hinang buwattēˈ. Sagōˈ ya bˈnnalna, saliˈ sigām banyagaˈ kapagagihan eˈ napsu angkan sigām subay maghinang kasabulan. 20 Saupama aˈa bay makapuwas min kalumuˈan dunya pagka si Isa Al-Masi Panghūˈtam ya pangandolanna, bang iya tajallat pabīng maghinang kalumuˈan bay bbahanna, luhūy alaˈat kahālanna damuli min bay dahū. 21 Bang sigām bay ataˈu ma kalˈngnganan ya amowa ni atay abontol, boˈ bay pataikut min panohoˈan deyoˈ min Tuhan, ahāp lagiˈ sigām halam bay makataˈuwan panohoˈan eˈ. 22 Taluwaˈ sigām lling bay min kamattoˈahan, ya yuk-i, "Eroˈ bay anguttaˈ, pabīng amangan uttaˈna," maka itu giˈ, "Bawi bay pinandi, pabīng magtūy paloblob ni kapisakan."
