1 Sulat itu min aku, dakayuˈ pagmattoˈahan, pinabeyaˈ ni dakayuˈ dˈnda tapeneˈ eˈ Tuhan sampay ni saga panganakna. Alasahan aku kaˈam sabˈnnal-bˈnnal. Lāgi nggaˈi ka hal aku, sampay aˈa kamemon ya ataˈuwan kasabˈnnalan, alasa du isab ma kaˈam. 2 Alasa kami ma sabab kasabˈnnalan ma deyom pangatayantam, ya pataptap ma kitam sampay ni kasaumulan. 3 Mura-murahan, bang paˈin kitam pinaniyaˈan tatabangan maka aseˈ maka kasannangan atay, deyoˈ min Mmaˈtam Tuhan maka min si Isa Al-Masi Anakna. Bang paˈin pinama-kitam luwas min kasabˈnnalanna maka min lasana. 4 Landuˈ aku kinōgan pagka aku kahakaˈan aniyaˈ panganaknu kaseheˈan ameyaˈ ma kasabˈnnalan, buwat bay panohoˈan kitam eˈ Mmaˈtam Tuhan. 5 Jari aniyaˈ amuˈku ni kaˈa, arung: beyaˈun panohoˈan ya sulatku itu. Nggaˈi ka panohoˈan bahaˈu, sagōˈ panohoˈan bay ma kitam sangay min katagnaˈ giˈ, ya yuk-i: maglasa-liyasahi kam. 6 Ya lasa pahˈllingku itu, iya na palantaratam ameyaˈ na paˈin ma panohoˈan Tuhan. Buwat bay takalebi sangay min katagnaˈ, in kitam sinōˈ taptap maglasa-liyasahi. 7 Aheka aˈa pangakkal ma dunya, aˈa mbal angaku in si Isa Al-Masi bay piˈitu ni dunya magbaran manusiyaˈ. Pandogahinbi aˈa buwattēˈ sabab Pangangakkal maka Banta koˈ inān, ya kuntara Al-Masi. 8 Halliˈinbi sigām boˈ mbal kaliman bay pagsangsāˈantam ati boˈ tasambutbi kamemon ya panungbas kaˈam. 9 Sai-sai mbal pataptap ma panduˈ bay min Al-Masi, boˈ paliyu gom paˈin minnēˈ, halam ma iya Tuhan. Ya balikna, sai-sai pataptap na paˈin, inaˈan ma iya Tuhan Mmaˈ maka Anakna. 10 Bang aniyaˈ gantaˈ piˈilu ni kaˈam, boˈ mbal maguyun panduˈna maka panduˈ Al-Masi, daˈa pareyomunbi ni lumaˈbi. Daˈa minsan saginahunbi, 11 sabab sai-sai anagina aˈa buwattēˈ taga-lamud na ma kahinanganna alaˈat. 12 Aheka giˈ pangahakaku ni kaˈam sagōˈ mbal aku bilahi amatahaˈ sulat itu. Aholat aku kalu makatibaw piˈilu magsuli-suli pabaihuˈ maka kaˈam, ati boˈ ajukup kakoyagantam. 13 Saga anak danakanbi dˈnda ya tapeneˈ eˈ Tuhan, amabeyaˈ ni kaˈam minsan laˈa hal lapal sigām. Wassalam
