1 Na, kalu tapikilbi in kami magbantug-bantug di-kami supaya kami taimaˈbi. Sagōˈ nggaˈi ka. Mbal sengoran kami saga aˈa kaseheˈan, mbal kami magkagunahan sulat pamakilā kami ni kaˈam. Mbal isab angamuˈ sulat pamakilā min kaˈam bang gantaˈ pehēˈ ni lahat saddī. 2 Kaˈam baranbi ya hantang sulat sinulat maitu ma deyom atay kami. Angkan talhakit in kami itu taga-kapatut, ma sabab kahāp kaul-piˈilbi. 3 Atampal du, Al-Masi ya bay anulat sulat itu, ati pangandolna na ma kami boˈ pinatuntul pahāp. Ya panulat sulat itu nggaˈi ka dawat, sagōˈ Rū min Tuhan kakkal salama-lama. Maka ya panulatan sulat itu nggaˈi ka papan batu buwat bay panulatan saraˈ eˈ si Musa, sagōˈ deyom atay manusiyaˈ. 4 Ya angkan kami makatawakkal amissala buwattitu sabab angandol kami ma Tuhan, min Al-Masi. 5 Mbal isab kami magbauˈ-bauˈ in kami itu taga-kapandayan angkan kami tōp makahinang saga hinang itu. Sagōˈ aniyaˈ barakat bay pamuwan kami eˈ Tuhan. 6 Iya ya bay amuwanan kami kapandayan boˈ supaya kami amalˈngngan kapagsulutan bahaˈu. Nggaˈi ka saraˈ sinulat ma deyom Kitab ya pamuwan eˈ Tuhan ma buwattinaˈan, sagōˈ Rū-na ma deyom atay. Ya saraˈ bay tasulat ma batu ma masa awal eˈ hal amowa ni kamatay, sagōˈ Rū Tuhan itu amowa ni kallum taptap. 7 Bay niukilan ma papan batu in saraˈ bay pamowahan janjiˈ Tuhan waktu tagnaˈ, beyaˈ isab maka sahaya Tuhan landuˈ asawa. Taluwaˈ sahaya isab baihuˈ si Musa, angkan mbal tapandang eˈ aˈa Israˈil minsan anginut-nginut pabaluba. Na, bang saraˈ amowa ni kamatay ya pinabeyaˈan sahaya buwattēˈ, 8 lubaˈ-lagiˈna na janjiˈ ya pinalˈngngan eˈ Rū Tuhan buwattitu, akalap giˈ sahaya-barakatna. 9 Bang abarakat saraˈ awal, ya pamatˈkkahan manusiyaˈ hukuman ni kamatay, labi-labi giˈ abarakat ya kapagsulutan bahaˈu itu, sabab minnitu kitam binista abontol eˈ Tuhan. 10 Ya bˈnnalna, pagka kapagsulutan bahaˈu itu atā biddaˈ barakatna, kalimbuhan na bay kalˈngnganan saraˈ tagnaˈ, minsan painay barakatna. 11 Hatina in kapagsulutan bahaˈu itu alanga giˈ barakatna min saraˈ tagnaˈ ya palabay heˈ, sabab anatas kapagsulutan bahaˈu itu ni kasaumulan. 12 Angkan kami aesog magnasihat, sabab aniyaˈ holatan kami mbal pabaluba. 13 Saddī kami min si Musa, ya bay anambunan baihuˈna boˈ mbal taˈndaˈ eˈ bangsa Israˈil, sabab in sahaya Tuhan bay ma baihuˈna heˈ pabaluba du sampay alanyap. 14 Kakulangan panghati saga bangsa Israˈil ma masa heˈ-i. Maka sampay isab ma waktu itu, sakahabaˈ waktu bang sigām binassahan Kitab si Musa, aniyaˈ saliˈ dalil tambun ma pikilan sigām boˈ mbal makahati. Subay sigām parakayuˈ ni Al-Masi boˈ yampa nilaˈanan tambun inān min pikilan sigām. 15 Sampay isab ma waktu itu, mbal makahati bangsa Israˈil bang aniyaˈ binassa min deyom Kitab si Musa, sabab masi giˈ aniyaˈ patambun ma pikilan sigām. 16 Sagōˈ kalaˈanan du tambun eˈ, buwat bay tasulat ma deyom Kitab, ya yuk-i, "Kalaˈanan tambun min baihuˈna ma waktu kabīngna ameyaˈ ma Panghūˈ." 17 Na, ya Panghūˈ sibahatku itu ya na Rū Tuhan, maka sai-sai kaniyaˈan Rū itu aluhaya na. 18 Manjari kitam kamemon ya halam aniyaˈ tambun ma baihuˈtam, saliˈ kitam dalil samin pamaˈndaˈan sahaya maka barakat Panghūˈtam. Pinindahan kitam eˈna painut-inut, pakˈnnop na paˈin kasahayatam sampay kitam makasaliˈ na ni iya. Ya Panghūˈ amindahan kitam itu, ya na Rū Tuhan.
