1 Magbantug giˈ aku. Minsan halam aniyaˈ pūsna, magsuli-suli aku pasal ai-ai bay magpasalupa ni aku min Panghūˈ Isa, sampay bay pamataˈuna ma aku. 2 Aniyaˈ kataˈuwanku dakayuˈ lˈlla bebeyaˈan si Isa Al-Masi bay tabowa paˈangkat ni sulgaˈ. Aniyaˈ na sangpūˈ maka mpat tahun palabay. Mbal kataˈuwanku bang iya bay paˈangkat magbaran, atawa hal pinasalupahan. Tuhan sadja makataˈu. 3 Saguwāˈ kataˈuwanku in lˈlla itu bay tabowa paˈangkat ni lahat paliyama. Balikanku, mbal kataˈuwanku bang baranna toˈongan atawa hal umagadna bay pinapehēˈ, atawa bang iya bay pinasalupahan. Luwal Tuhan ya makataˈu. 4 Mahēˈ paˈin, pinakalehan iya kabtangan mbal wajib binissala eˈ manusiyaˈ. 5 Patut du aku magbantug ma sabab aˈa itu sagōˈ mbal aku magbantug-bantug ma baranku, luwal ma pasal kalammahanku. 6 Bang aku gantaˈ bilahi magbantug, nggaˈi ka ula-ula sabab bˈnnal sadja kamemon pahˈllingku. Sagōˈ pahondong na aku magbantug-bantug, sabab mbal aku bilahi sinanglitan labi min kasabˈnnalanna. Kabayaˈanku sinanglitan ma pasal kahinanganku maka pamissalaku. 7 Bay aku pinatˈkkahan pˈddiˈ, ya pinagbahasa 'tugsuk ma isiku', saliˈ hantang sosohoˈan saitan pinabeyaˈ anasat aku boˈ supaya aku mbal makapagabbu ma bay pinaˈndaˈan aku ma deyom sulgaˈ. 8 Min tˈllu aku bay angamuˈ junjung ni Panghūˈ pasal saki itu, bang paˈin nilaˈanan. 9 Sagōˈ anambung iya, yukna, "Sarang ma kaˈa bang ka tabangku na paˈin. Minnēˈ asampulnaˈ kawasaku, pagka kaˈa mbal makakoleˈan di-nu." Angkanna aku kinōgan magbantug ma pasal kalammahanku, sabab bang aku alamma, tananamku toˈongan kawasa Al-Masi. 10 Ya inaˈan sababanna angkan aku kasulutan ma ai-ai atˈkka ni aku, alamma ka baranku atawa pinagudjuˈ-udjuˈ aku, magtiksaˈ aku atawa pininjalaˈ, atawa pinalabayan min kasusahan indaginis. Sandalanku inaˈan kamemon ma sabab Al-Masi ya pameyaˈanku, sabab akosog aku ma waktu kalammaku. 11 Saliˈ aku dupang magpaheya-heya di-ku buwattitu. Sagōˈ min kaˈam du, sabab bang aku bay paheyabi mbal aku bay amaheya di-ku. Minsan halam aniyaˈ pūsku, mbal aku kalakbawan eˈ saga aˈa ya magnahuˈ-nahuˈ in sigām muna-muna kawakilan eˈ Al-Masi. 12 Bay na tahinang ma deyomanbi saga kahinangan ya pamandogahan aˈa kawakilan Al-Masi. Bay na taˈndaˈbi saga paltandaˈan, saga hinang kawasahan maka hinang makainu-inu ya tahinangku hinabuku angimanan kasigpitan. 13 Ya sadja dusaku ma kaˈam, halam aku bay mikibalanjaˈ ma kaˈam. Saddī minnēˈ, saliˈ du bowahanku ma kaˈam maka bowahanku ma saga palhimpunan jamaˈa si Isa kaseheˈ. Bang ya du heˈ kasāˈanku, ampununbi paˈin aku. 14 Agaraˈ aku piˈilu anibaw kaˈam, kamintˈlluku na. Mbal kam pabuhatanku sabab nggaˈi ka altaˈbi ya anguttku, luwal lasabi. Patut isab, sabab nggaˈi ka mattoˈa ya niayuput eˈ anak, sagōˈ anak ya niayuput eˈ mattoˈa sigām. Maka kaˈam ya saliˈ hantang panganakku. 15 Kinōgan aku amuwanan kaˈam kaniyaˈku kamemon. Ahoˈ, paglillaˈku sampay baranku bang paˈin kam tatabangku. Bang pasōng lasaku ma kaˈam, pakōˈ bahāˈ lasabi ma aku? 16 Tantu kam amˈnnal in kaˈam halam bay pabuhatanku. Sagōˈ aniyaˈ mailu ahˈlling, in aku atahaˈ akkalku angulliˈan sīnbi. 17 Buwattingga pangulliˈku kaˈam? Bay bahāˈ kam niakkalan eˈ saga aˈa sohoˈku piˈilu? 18 Bay amuˈku si Titus anibaw kaˈam waktu palabay inān, maka aniyaˈ isab danakantam dakayuˈ sinōˈ aneheˈan iya. Bay kam kinulliˈan bahāˈ eˈ disi Titus? Tantu mbal. Jari saliˈ du kami ma maksud maka ma palantara. 19 Kalu isab pangannalbi in kami hal angandaˈawahan di-kami, ya angkan kami amissala buwattēˈ. Sagōˈ amissala kami ma pangˈndaˈ Tuhan, maka pamissala eˈ kami ai-ai ya patut pamissala saga aˈa palsukuˈan Al-Masi. Ai-ai nihinang eˈ kami, saga bagay, nihinangan kaˈam supaya akosog pangandolbi. 20 Agawa aku piˈiluku, ya aniyaˈ taˈabutku pasaddī kaul-piˈilna min kabayaˈanku. Maka aku isab, kalu saddī kaul-piˈilku min kabayaˈanbi. Kagawahanku isab ya aniyaˈ taˈabutku magsaggaˈ, magihid, alˈkkas angastol. Kalu aniyaˈ magokat-okat, maglimut-limutan, angalituhan suli-suli, magmalangkahi, maka magkasasawan. 21 Lāgi, ya kagawahanku pagbalikku, kalu aku pinareyoˈ-deyoˈ eˈ Tuhanku ma kamailuhanbi, ati taluwaˈ aku kasusahan ma sabab saga aˈa bay makarusa ma waktu tagnaˈ, boˈ paˈin halam giˈ makapangˈbba min kalumuˈan bay tahinang sigām, buwat saga pagbaˈis maka paglango.
