1 Daˈa paˈin aku kasumuhinbi, minsan saliˈ ula-ula bissalaku itu. Dūlinbi aku daiˈ-daiˈ, 2 sabab aˈllogan aku kaˈam buwat kaˈllog Tuhan. Kaˈam ilu saliˈ dalil budjang halam aniyaˈ lumuˈna, maka aku itu dalil mattoˈa amatunangan kaˈam ni lˈlla dakayuˈ-kayuˈ, ya na Al-Masi. 3 Asusa aku ya aniyaˈ kam binidjakan pataikut min Al-Masi ati angˈbba min bay lasabi tuman ma iya. Kalu kam kaˈakkalan buwat si Sitti Hawa ma awal jaman eˈ. Bay iya kaˈakkalan eˈ sowa ma sabab min kapanday sowa inān magputing. 4 Sabab bang aniyaˈ piˈilu anganasihatan kaˈam, kinōgan sadja kam. Mbal lāngbi minsan saddī pamanduˈ saga aˈa inān pasal si Isa min bay pamanduˈ kami, minsan isab nggaˈi ka Rū Sussi ya pinasambutan kaˈam. 5 Bang ma bistahanku, mbal aku kalakbawan eˈ saga gurubi ilu, ya pinagsambat "kawakilan Al-Masi umbul dakayuˈ". 6 Akulang araiˈ kapandayanku bang takdil ni bissala, sagōˈ ajukup pangitaˈuku bang takdil ni kasabˈnnalan. Pinapastiˈ koˈ itu ma kaˈam kamemon sakahabaˈ waktu. 7 Taga-dusa aku bahāˈ amareyoˈ baranku supaya kaˈam ya pinalanga, pagka kam ninasihatan lapal ahāp ma halam pangamuˈan tamba? 8 Bang pinaralil, bay langpasanku saga jamaˈa ma palhimpunan kaseheˈ supaya kaˈam ya katabangan. 9 Halam aku bay mikibalanjaˈ ma kaˈam tˈggolku bay mailu. Bay aku binowahan ai-ai kulang-kabusku eˈ saga danakantam min Makidunya. Halam kam bay kabuhatan amalanjaˈan aku, maka buwattēˈ na paˈin ma sinosōng! 10 Mbal kapaliluhan pagbantugku itu eˈ sai-sai minsan ma kaluhaˈan lahat Akaya, sabab halam aku bay angamuˈ ai-ai ni kaˈam. Bˈnnal sadja pahˈllingku itu sabab itiyaˈ kasabˈnnalan Al-Masi ma pangatayanku. 11 Angay aku subay anganggastuhan di-ku? Pangannalbi bahāˈ in aku mbal alasa ma kaˈam, ya poˈon aku mbal mikitabang ma kaˈam? Tuhan ya makataˈu in aku alasa du. 12 Togolanku na paˈin hinangku itu. Mbal aku mikitamba ma sai-sai boˈ mbal makapagabbu saga aˈa ya bilahi pasaliˈ ni kami. 13 Halam sigām bay kawakilan eˈ Al-Masi, hal magbauˈ-bauˈ in sigām bay kawakilanna. Pangangakkal isab ma ai-ai tahinang sigām. 14 Sagōˈ mbal sakit makainu-inu, sabab minsan nakuraˈ saitan ataˈu isab magpasalupa ni luwa malaˈikat asahaya. 15 Angkan kitam subay mbal anginu-nginu bang saga aˈa sosohoˈan nakuraˈ saitan maghāp-hāp di-sigām, magbauˈ-bauˈ in sigām maghinang abontol. Sagōˈ magtongod kadal saga aˈa heˈ maka bay kahinangan sigām alaˈat. 16 Balikanku giˈ bay yukku: daˈa aku bistahunbi ula-ula ma sabab bissalaku. Sagōˈ bang aku subay bistabi saliˈ ula-ula, na tugutinbi aku magbantug-bantug, minsan laˈa hal bantug ma karikiˈan. 17 Nggaˈi ka min panohoˈan Panghūˈ angkan aku magbantug sagōˈ min baranku. Hatina min ula-ulaku angkan aku magbantug-bantug di-ku. 18 Malaingkan, pagka aheka aˈa magbantug-bantug pasal kahinangan sigām, ameyaˈ-meyaˈ isab aku magbantug-bantug di-ku. 19 Alalom konoˈ pamikilbi angkan kam mbal sinumu akale minsan ma bissala saga ula-ula itu! 20 Ya bˈnnalna, sabalanbi saga aˈa minsan sigām magmandahan kaˈam, minsan isab angulliˈ atawa angakkal ma kaˈam. Minsan aˈa amareyoˈ kaˈam atawa anampak kaˈam, ahāp sadja ma kaˈam. 21 Aiyaˈ aku angahakaˈan kaˈam, kulang esog kami angkan kami mbal makasengod ni hinang sigām! Min ula-ulaku angkan aku atawakkal magbantug ma buwat pagbantug aˈa kaseheˈ. 22 Bangsa Hibrani bahāˈ sigām? Ya du aku. Bangsa Israˈil bahāˈ? Ya du aku. Panubuˈ si Ibrahim bahāˈ? Ya du aku, panubuˈ si Ibrahim isab. 23 Sosohoˈan Al-Masi bahāˈ? Sosohoˈan Al-Masi isab aku, sagōˈ akalap lagiˈ min sigām. (Ula-ula pahāp pamissalaku buwattitu.) Minsan painay kaluˈugan sigām, palabi giˈ kaluˈuganku. Minsan sigām bay pinakalabusu, aheka lagiˈ kapangalabusu ma aku. Min pila aku bay nilappet? Labi giˈ min sigām. Min heka aku agon-agon amatay. 24 Min lima aku bay niraplosan eˈ saga Yahudi, tˈllumpūˈ maka siyam pangandaplos min tˈdda. 25 Min tˈllu aku bay niraplosan eˈ bangsa Rōm, maka min tˈdda aku bay pinagbantung. Min tˈllu aku bay alogdang ma dilaut, maka aniyaˈ isab waktu hal pagūng ma sˈllang, dangˈllaw dambahangi tˈggolna. 26 Maglatun-latun na paˈin aku min lahat dakayuˈ ni dakayuˈ, maka aheka kaˈaniban bay kalabayanku. Bay aku nirunukan, bay minunduhan. Bay aku nirogpaˈan, sumaˈan eˈ saga pagkahiku Yahudi, sumaˈan eˈ bangsa saddī. Ai na ka kaˈaniban ma deyom kalumaˈan, ai na ka kaˈaniban ma deya-dilaut, bay na kalabayanku kamemon. Kalabayanku isab kalaˈatan min saga aˈa magbauˈ-bauˈ in sigām pagkahiku bebeyaˈan si Isa. 27 Bay aku makapagsangsāˈ, bay aku abinasa. Araran aku halam bay atuli sangom. Bay aku pinunung maka patay boheˈ. Maumu aku kulang-kabus ma kapamangan maka ma kapanˈmmek, angkan kasandalanku haggut. 28 Ahunit koˈ inān, sagōˈ aniyaˈ giˈ kasusahanku paliyu minnēˈ. Makananam aku kasukkalan kahabaˈ llaw ma sabab saga palhimpunan jamaˈa Al-Masi ma kalahat-lahatan. 29 Bang aniyaˈ gantaˈ alamma imanna tudju ni si Isa, tananamku kalammahanna. Bang aniyaˈ tabowa-bowa angahinang dusa, tabowa isab aku magkarukkaˈan. 30 Mbal aku bilahi magbantug, sagōˈ bang aku subay magbantug, gom pagbantuganku ai-ai bay kalabayanku supaya manyatakan in aku halam aniyaˈ kosogku. 31 Bˈnnal sadja ya bay pahˈllingku inān, kinataˈuwan asal eˈ Tuhan, ya Mmaˈ Panghūˈ Isa. Wajib iya sinanglitan sampay ni kasaumulan. 32 - 33 Waktu kamahēˈku ma daˈira Damaskus, saga lawang paluwasan min daˈira bay pinajagahan ma sundalu eˈ gubnul ya ma deyoˈan sultan Aretas. Sinohoˈ sigām anaggaw aku, mandaˈ aku tinontonan pareyoˈ ma deyom ambung labay min tandawan ma ād daˈira. Jari makalˈppa aku.
