1 Aniyaˈ ilu amahˈllingan aku, yuk-i, "Atˈmmun si Paul inān bang maitu ma atag kami, sagōˈ aesog amabukag labay min deyom sulat bang makalikut." Sagōˈ panunuranku Al-Masi ma kareyoˈ atayna maka ma kahanunut bissalana, jari angamuˈ aku junjung ni kaˈam. 2 Pahāpunbi kaul-piˈilbi supaya halam aniyaˈ pamabukaganku kaˈam bang aku mailu ma kaˈam. Sabab atawakkal aku amabukag saga aˈa ya angalimut kami, in kami konoˈ hal ameyaˈ ma kahinangan dunya itu. 3 Manusiyaˈ kami patˈnnaˈ ma dunya itu, sagōˈ nggaˈi ka kapandayan manusiyaˈ ya ginuna eˈ kami pamaggat kalaˈatan. 4 Nggaˈi ka patakos manusiyaˈ ya pangatu kami sagōˈ patakos taga-kawasa deyoˈ bay min Tuhan, angkan kami makapakaˈat kutaˈ (hatina ai-ai makasaggaˈ.) 5 Taraˈug eˈ kami pasuˈalan maka pagabbu saga aˈa ya anulak panduˈ kasabˈnnalan pasal Tuhan. Jari tabowa paghonaˈ-honaˈ manusiyaˈ magmalulus ma Al-Masi. 6 Na, sakap na kami amatˈnnaˈ kabinasahan ma sasuku mbal angikut panohoˈanna, bang hatiˈ aniyaˈ ma deyomanbi mbal giˈ angikut. 7 Hal pangluwahan aˈa ya tandingbi, nggaˈi ka deyom atay. Aniyaˈ bahaˈ mailu magabbu-abbu in iya palsukuˈan Al-Masi? Subay iya amikil pahāp sabab ya du kami palsukuˈan Al-Masi. 8 Mbal aku aiyaˈ minsan lumanduˈan kapagbantugku pasal kapatut bay pamuwan kami eˈ Panghūˈ. Nggaˈi ka kapatut pamakaˈat pangandolbi, sagōˈ kapatut pamahogot. 9 Mbal aku bilahi amakitāw kaˈam labay min kasulatanku. 10 Sabab kataˈuwanku aniyaˈ ilu angupama, yukna, "Atumlang bissala si Paul bang anulat, apaslod panganjawabna. Sagōˈ bang iya maitu magbaran saliˈ halam aniyaˈ kosogna, maka mbal iya ataˈu amissala." 11 Subay pahati saga aˈa angupama buwattilu: ai-ai pamissala kami ma deyom sulat ma kalikut kami, hinang kami du bang mailu na kaˈam. 12 Mbal kami makatawakkal amasaliˈ di-kami ni saga aˈa magheya-heya di-sigām inān. Dupang saga aˈa inān! Pangannal sigām in sigām ataˈu anilang ahāp maka alaˈat, boˈ paˈin hal baran sigām ya pamandogahan. Angkan ai-ai nihinang eˈ sigām ahāp-alaˈat, ahāp lullun konoˈ. 13 Saguwāˈ mbal kami magbantug ma baran kami haliyu min hinang bay pamasukuˈ kami eˈ Tuhan. Damikiyanna isab kahinangan kami ma deyomanbi, bay pamasukuˈ isab eˈ Tuhan. 14 Mbal paliyu pagbantug kami, sabab kami ya bay makarahū amowahan kaˈam lapal ahāp pasal Al-Masi. 15 Mbal kami magbantug-bantug ma pasal hinang saga aˈa kaseheˈ. Ya kabayaˈan kami subay pasōng hogot pangandolbi supaya tapasōng isab hinang kami mailu ma deyomanbi. 16 Jari bang ahogot na pangandolbi, makajari na kami palanjal ni saga kalahat-lahatan ma liyuhanbi. Sabab hatina mbal kami bilahi angāˈ kabantugan min kahinangan saga aˈa kaseheˈ, ya pamasukuˈ asal ma sigām. 17 Tasulat asal ma Kitab, "Sai-sai bilahi magbantug, Panghūˈ ya subay pagbantuganna." 18 Sabab mbal kita tinaimaˈ ma saukat na kita ananglitan di-ta, luwal bang kita binuwanan sanglit eˈ Panghūˈ.
