1 Bˈnnal kabtangan itu, ya yuk-i, "Bang aˈa angangut pinatˈnnaˈ magmakōk ma saga jamaˈa si Isa, ahāp pangangutna." 2 Subay halam aniyaˈ laˈat atawa sāˈ panāˈan aˈa magmakōk. Subay dakayuˈ du hˈndana, subay iya ahantap ma ai-ai hinangna, subay ahāp pikilanna maka ahāp addatna. Bang aniyaˈ pehēˈ ni lumaˈna subay paˈiddana toˈongan. Subay iya apanday isab amanduˈ ma saga seheˈna. 3 Subay iya nggaˈi ka aˈa maglalango. Subay iya mbal abˈngngis sagōˈ subay ahāp bowahanna ni kamemon. Subay iya mbal pangalulugat, subay mbal napsuhan ma pilak. 4 Subay ahāp eˈna angahatul anak-hˈndana, maka in iya baranna subay pinagaddatan eˈ panganakna. Panohoˈanna isab subay bineyaˈ eˈ sigām. 5 Sabab bistahunbi, bang aˈa pinatˈnnaˈ nakuraˈ boˈ mbal ataˈu angahatul ma anak-hˈndana, buwattingga eˈna angahatul katimukan saga aˈa sukuˈ Tuhan? 6 Bang aˈa sōd bahaˈu ni si Isa Al-Masi mbal iya makajari pinatˈnnaˈ nakuraˈ sabab mbal giˈ ahogot pangandolna, gana-gana palanga atayna ati pinatˈkkahan iya hukuman, buwat bay hukuman ma nakuraˈ saitan. 7 Sagōˈ ya aˈa pinatˈnnaˈ pagmakōkan subay pinagaddatan asal eˈ saga aˈa nggaˈi ka jamaˈa si Isa. Sababna, bang iya gantaˈ tasāˈ eˈ sigām, gana-gana iya tabowa eˈ sasat nakuraˈ saitan. 8 Na, in pasal aˈa pinatˈnnaˈ magtatabang ma katimukanbi saga jamaˈa si Isa Al-Masi, subay asaltun addat-tabiˈat sigām, maka subay sigām mbal magduwa-dˈllaˈ. Subay sigām mbal maglalango maka subay mbal napsuhan ma sīn. 9 Subay sigām patotog magatay poteˈ ma panduˈ kasabˈnnalan ya bay pamataˈu eˈ Tuhan pasal si Isa Al-Masi. 10 Subay sigām sinulayan dahū, jari bang kapandogahan na in addat sigām ahāp, makajari na sigām pinatˈnnaˈ magtatabang ma saga nakuraˈ. 11 Damikiyanna hˈnda sigām, subay ahāp isab addat-tabiˈat sigām maka subay mbal biyaksa angalituhan suli-suli. Subay isab mbal angandūl ma napsu sigām, maka subay kapangandolan ma ai-ai indaginis. 12 Saga aˈa pinatˈnnaˈ magtatabang itu subay dakayuˈ du hˈndana maka subay ahāp eˈna angahatul anak-hˈndana maka sasuku ma okomanna. 13 Jari bang ahāp eˈ saga aˈa magtatabang itu maghinang kahinangan sigām, pinaheya du ōn sigām, ati makatawakkal sigām amissala ma pasal pangandol ni si Isa Al-Masi. 14 Na, Timuti, buwattitu panulatku ma kaˈa sabab angasa aku pasaˈut piˈilu. 15 Sagōˈ bang aku tinaggahan, kataˈuwannu du min sulat itu bang buwattingga bowahan saga aˈa ma deyom okoman Tuhan, hatina ma palhimpunanbi saga aˈa sukuˈ Tuhan ya kakkal salama-lama. In palhimpunan ilu ibarat papagan maka hāg ya pasangdolan panduˈ kasabˈnnalan itu. 16 Halam aniyaˈ kalu-kaluna, alalom sidda panduˈ agamatam, panduˈ pasal si Isa Al-Masi ya bay halam kinataˈuwan, sagōˈ pinataˈu na eˈ Tuhan. Bay iya palahil piˈitu magpabaran manusiyaˈ, sinaksiˈan iya eˈ Rū Sussi in iya aˈadil. Taˈndaˈ iya eˈ baˈanan malaˈikat. Pinagnasihat iya ni palbangsahan kamemon, pinagkahagad iya eˈ saga aˈa ma kaluhaˈan dunya. Tabowa iya paˈangkat ni kasahayaˈan sulgaˈ.
