1 Na, saga dauranakan, buwattitu hatulanna. Bay kam panduˈan kami bang kaul-piˈil ingga ya makasulutan Tuhan. Buwattēˈ asal kaul-piˈilbi, Sagōˈ buwattinaˈan, pagka aniyaˈ kapatut kami min Panghūˈ Isa, amuˈta kam maka sohoˈta kam amuspus toˈongan ma kaul-piˈil ahāp. 2 Kataˈuwanbi du, in pamanduˈ kami ma kaˈam asal min kapatut Panghūˈ Isa. 3 Ya kabayaˈan Tuhan subay asussi deyom ataybi. Daˈa kam maghinang kalaˈatan dˈnda maka lˈlla. 4 Kaˈam kalˈllahan, subay ahantap eˈbi amowa hˈndabi ma halam aniyaˈ sabulna, maka subay ahatul addatbi ma sigām. 5 Daˈa parūlunbi napsu baranbi magbaˈis-baˈis, buwat saga aˈa mbal magmatāw ma Tuhan. 6 Na, bang takdil ni napsu baran itu, daˈa toˈongan kam angahinang laˈat ma pagkahibi bebeyaˈan si Isa. Daˈa isab kam angulliˈ ai-aina sabab bininasa eˈ Panghūˈ sasuku magdusa buwattēˈ. Bay kam pataˈu kami pasal palkalaˈ itu ma waktu tagnaˈ giˈ, bay na kam asal bandaˈan kami. 7 Pineneˈ kitam eˈ Tuhan supaya anuyuˈan palantara asaltun, daˈa paghinang kalaˈatan dˈnda maka lˈlla. 8 Jari sasuku anaikutan panduˈ itu, Tuhan ya taikutanna, nggaˈi ka manusiyaˈ. Lāgi Tuhan ya amuwanan kaˈam Rū-na Sussi. 9 Na, minsan kam mbal sinulatan pasal paglasabi maka pagkahibi angandol ma Al-Masi, sabab kapanduˈan kam eˈ Tuhan, subay maglasa-liyasahi dangan maka dangan. 10 Maka alasa du kam asal ma saga danakanbi kamemon magpangandol ma si Isa, inaˈan ma kaluhaˈan lahat Makidunya ilu. Sagōˈ amuˈta kam, saga dauranakan, pasōngunbi giˈ lasabi ma sigām. 11 Tuyuˈinbi ai-ai amowa ni kasannangan. Tukirinbi hinangbi luggiyaˈ, daˈa kam anasaw ma hinang pagkahibi. Magusahaˈan kam di-bi boˈ aniyaˈ kallumanbi, buwat bay panohoˈan kami ma kaˈam dahū. 12 Manjari bang beyaˈbi panohoˈan itu, pinagaddatan kam eˈ saga aˈa minsan sigām mbal angandol ma si Isa, ati mbal kam asukkal ma kalluman. 13 Na, saga dauranakanku, bilahi kami amahati kaˈam pasal saga aˈa angandol ma si Isa Al-Masi bang sigām gantaˈ amatay na. Subay kam mbal magdukka buwat saga aˈa kaseheˈan, ya halam aniyaˈ pangasa-ngasahan sigām allum pabalik. 14 Amˈnnal kitam in si Isa bay amatay ati allum pabīng, angkan kitam amˈnnal bang amatay saga aˈa ya angandol ma si Isa, pinakallum du sigām pabīng eˈ Tuhan ati paronganna sigām ma si Isa ma waktu pagbīngna. 15 Pamanduˈ kami itu bay min Panghūˈ Isa, ya yukna in kitam masi allum ma waktu kabīngna piˈitu, mbal du parahū min saga aˈa magpatayan. 16 Sabab dahū aniyaˈ lling pagtawag akosog, maka suwala nakuraˈ malaˈikat, maka lling tiyup-tiyup min Tuhan. Magtūy saruˈun-duˈun ya tˈkka Panghūˈ min sulgaˈ. Puwas eˈ pinabangun dahū saga aˈa bay magpatayan, aˈa asal bay angandol ma Al-Masi. 17 Puwas eˈ kitam ya masi allum ma dunya itu, binowa du magdongan maka sigām paˈangkat ni diyataˈ gabun boˈ anampang Panghūˈtam ma tongaˈan ayan. Manjari parakayuˈ kitam ma Panghūˈ sampay ni kasaumulan. 18 Angkan pangahakaˈunbi saga bissala itu dangan ni dangan, boˈ supaya ahogot pangatayanbi.
